Te mau arii 1
TE HAU O AHABA, E TE TOHU O ELIA IA ˈNA RA.
17 Ua parau maira te peropheta ra o Elia i Tisebi, no te mau taata i Gileada, ia Ahaba, Te ora ra te Atua o Iseraela o Iehova, ta ˈu e tia noa nei i mua i tana aro, e ore e hauhia, e ore hoi e ûa, i eie nei pue matahiti, maori râ ia parauhia e au ra. 2 Ua tae maira te parau a Iehova ia ˈna, na ô maira, 3 A haere oe, e fariu tia ˈtu i te hitia o te râ ra; a tapuni atu ai i te pae pape ra o Kerita, i pihaiiho i Ioridana. 4 E riro hoi oe i te inu i taua pape ra; e ua faauehia e au te mau oreba ei faaamu ia oe i reira. 5 Haere atura oia, e ua na reira i ta Iehova i parau maira; haere atura e ua parahi ihora i taua pape ra o Kerita, i pihaiiho i Ioridana. 6 E ua hopoi maira te oreba i te pane e te maa puaa i te poipoi, e te pane e te maa puaa i te ahiahi; e ua inu noa oia i te pape i taua pape ra. 7 E maoro iti aˈera, mǎrô atura taua pape ra, no te mea aita e ûa i taua fenua ra.
8 Ua tae maira te parau a Iehova ia ˈna, na ô maira, 9 A tia, e e haere i Zarephate i Sidona, a parahi ai i reira; ua parauhia e au te tahi vahine ivi i reira na ˈna e faaamu ia oe. 10 Ua tia aˈera oia haere atura i Zarephate. E tae atura oia i te uputa o te oire, inaha, e vahine ivi te ohi haere ra i te vahie: ua pii atura oia ia ˈna, na ô atura, A hopoi mai na i te hoê maa pape i roto i te farii, ia inu vau. 11 E te tii atura oia i taua pape ra, ua parau atura oia ia ˈna, na ô atura, Hopoi atoa mai i te tahi maa pane i to rima na. 12 Ua parau maira oia, Te ora ra to Atua o Iehova, aita roa a ˈu e maa ama, maori râ te hoê maa faraoa hoê rima e î tei roto i te hue, e te hoê maa hinu i roto i te farii; e inaha, te ohi haere nei au i te maa vahie, a haere ai au i roto a tunu ai na mâua o tau tamaiti, a amu ai mâua, a pohe atu ai. 13 Ua parau atura Elia ia ˈna, Eiaha e mǎtaˈu; e haere râ oe e na reira ta oe i parau ra: e mata na râ i te hamani i te hoê vahi iti na ˈu, a hopoi mai ai ia ˈu nei, a hamani ai i ta oe e ta to tamaiti. 14 Te na ô maira hoi te Atua o Iseraela a Iehova, E ore te hue faraoa e iti, e ore hoi e pau te farii hinu, e tae noa ˈtu i te mahana e hopoi mai ai Iehova i te ûa i te fenua nei. 15 Ua tii atura oia, ua rave i ta Elia i parau maira; ua amu ihora oia e o Elia, e to ˈna atoa utuafare, e rave rahi aˈera te mahana. 16 Aore hoi taua hue faraoa ra i iti, aore hoi te farii hinu i pau, ta Iehova hoi i parau mai, i te vaha o Elia ra.
17 E i muri aˈe i te reira, roohia ihora te tamaiti a taua vahine ra, te vahine utuafare, i te pohe i te maˈi: e maˈi rahi to ˈna, aita ˈtura e aho i toe i roto ia ˈna. 18 Ua parau maira oia ia Elia, Eaha ta ˈu ia oe, e te taata no te Atua na? I haere mai anei oe e faaite i ta ˈu nei hara, e ia pohe hoi tau tamaiti? 19 Ua parau atura oia ia ˈna, Ho mai na i to tamaiti. Ua rave maira oia tei nia ia ˈna te vairaa, ua hopoi atura ia ˈna i tei nia piha, i parahihia e ana iho, ua tuu ihora ia ˈna i nia i to ˈna ihora roi. 20 Ua pii atura oia ia Iehova, na ô atura, E tau Atua, e Iehova e, ua hopoi mai hoi oe i te ino i te vahine ivi ta ˈu e parahi nei i pohe ai ta ˈna tamaiti? 21 Ua titoo aˈera oia i nia iho i taua tamaiti ra, e a toru aˈera o ˈna titooraa, ua pii atura ia Iehova, na ô atura, E tau Atua, e Iehova e, teie ta ˈu parau ia oe, e faahoˈi mai oe i te Varua o teie nei tamaiti. 22 Ua faaroo maira Iehova i te pure a Elia ra; e ua hoˈi maira te varua o taua tamaiti ra ia ˈna, e ora ihora oia. 23 Ua rave aˈera Elia i taua tamaiti ra, ua hopoi maira i raro mai nia mai na i taua piha i nia ra, e i roto i te fare, e ua hopoi atura i te metua vahine ra: e ua na ô atura Elia, Inaha, ua ora to tamaiti. 24 Ua parau maira taua vahine ra ia Elia, O te mea teie i ite ai au e, e taata oe no te Atua, e tei roto te parau mau a Iehova i to vaha.