Te mau arii 1

O ELIA I HAAMǍTAˈUHIA E IEZEBELA, HAERE ATURA I HOREBA.

19 Ua faaite aˈera Ahaba ia Iezebela i ta Elia i rave; e ua pau te mau peropheta i te taparahihia e ana i te ˈoˈe. 2 Ua tono aˈera Iezebela i te vea ia Elia ra, na ô maira, Ia na reira mai te mau atua ia ˈu, e ia rahi mai â, ia ore oe ia riro mai te hoê o ratou, ananahi â mai teie nei. 3 Mǎtaˈu aˈera oia, e ua tia aˈera, haere atura ia ora, e tae atura i Bere-seba i ǒ Iuda ra, vaiiho ihora i to ˈna tavini i reira; 4 haere atura râ oia iho na te medebara e hoê aˈera mahana; haere atura e ua parahi ihora i raro aˈe i te hoê raau retama: ua ani atura i te pohe; na ô aˈera, Atire; e teie nei, e Iehova, a rave mai oe ia ˈu; aita hoi o ˈu maitai i hau i to tau mau metua ra. 5 Te taoto noa ra oia i raro aˈe i taua retama ra, ua rave noa maira te hoê melahi ia ˈna, na ô maira, A tia, a amu. 6 Ua hiˈo ihora oia, e inaha, te vai maira te hoê pane iti, tei te pae turua, ua tunuhia i nia i te arahu, e te hoê farii pape. Ua amu ihora e ua inu, e ua taoto atura i raro. 7 Ua hoˈi faahou maira te melahi a Iehova, ua faatiaia faahou maira, o te piti ïa, e ua na ô maira, A tia, a amu, no te mea, e vahi maoro tei haapaohia na oe. 8 Ua tia aˈera oia, ua amu, e ua inu, e ua haere atura i te itoito o taua maa ra, e e piti taau aˈera te mahana, e piti taau hoi arui, e tae atura i Horeba i te mouˈa o te Atua ra.

9 Tae atura oia i reira i roto i te hoê ana, e ua taoto ihora i reira; e inaha, ua tae maira te parau a Iehova ia ˈna, na ô maira, Te aha noa na oe i ǒ na, e Elia? 10 Ua parau atura oia, Itoito noa na vau i te Atua sabaota ia Iehova: ua faarue te tamarii a Iseraela i ta oe parau, e ua huri i ta oe fata i raro, ua taparahi i te mau peropheta na oe i te ˈoˈe; e o vau nei, o vau anaˈe nei tei toe: e te imi mai nei ratou ia ˈu nei ia pohe. 11 Ua na ô maira oia, A haere, ei nia i te mouˈa tia noa ˈi i te aro o Iehova. E inaha, ua haere ihora Iehova na reira iho, o te mataˈi rahi ihora e te etaeta, i te haaparariraa i te mouˈa, e te vavahiraa i te mato i mua i te aro o Iehova; aita râ Iehova i roto i taua mataˈi ra; e mure aˈera te mataˈi, o te aueue fenua ihora; aita râ Iehova i roto i taua aueueraa fenua ra: 12 e oti aˈera te aueueraa fenua, e auahi; aita râ Iehova i roto i taua auahi ra: e oti aˈera te auahi, e reo iti haihai maira, tei reira Iehova. 13 E ite aˈera Elia i taua parau nei, ua purou oia i to ˈna mata i to ˈna ra ahu, haere atura i rapae au, tia noa ihora i te tomoraa i roto i te ana ra. E inaha, te hoê reo maira ia ˈna, na ô maira, Te aha noa na oe i ǒ na, e Elia? 14 Ua parau atura oia, Itoito noa na vau i te Atua sabaota ia Iehova: no te mea, ua faarue te tamarii a Iseraela i ta oe parau, ua faarue i ta oe mau fata i raro, e ua taparahi i te mau peropheta na oe i te ˈoˈe; e o vau nei, o vau anaˈe ra tei toe; e te imi mai nei ratou ia ˈu nei ia pohe. 15 Ua parau maira Iehova ia ˈna, A haere, mai te medebara ˈtu nei e Damaseko; e ia tae oe i reira, e faatahinu oe ia Hazaela ei arii no Arama; 16 e faatahinu hoi oe ia Iehu a Nimesi, ei arii no Iseraela; e faatahinu hoi oe ia Elisaia a Saphata, no Abele-mehola, ei peropheta ei mono ia oe ra. 17 E o tei ora i te ˈoˈe a Hazaela ra, na Iehu ïa e taparahi; e o tei ora i to ˈoˈe a Iehu ra, na Elisaia ïa e taparahi. 18 Ua vaiiho râ vau i e hitu tausani taata o Iseraela no ˈu iho, o tei ore i tuu i te turi i raro ia Baala, e tei ore i hôˈi atu te vaha ia ˈna.

19 Haere atura oia; e ite atura ia Elisaia a Saphata, roohia ˈtu te arote ra, hoê ahuru ma piti apitiraa puaatoro i mua ia ˈna, tei ia ˈna hoi te ma piti: haere noa ˈtura Elia ia ˈna ra, e ua huri aˈera i to ˈna ahu i nia iho ia ˈna. 20 Ua faarue ihora oia i taua mau puaatoro ra, e ua auau atura ia Elia, ua parau atura E haere na vau e hôˈi i tau metua tane e tau metua vahine, a pee atu ai au ia oe. Ua parau maira oia ia ˈna, A haere, e hoˈi: eaha ˈtu hoi au ia oe? 21 Ua hoˈi atura oia, ua rave ihora i e piti puaatoro, ua tupai ihora, e ua tunu ihora, no nia te puaatoro te raau ei vahie, e ua hopoi na te mau taata, e ua amu ihora ratou. Ua tia aˈera oia, ua pee atura ia Elia, ati atura ia ˈna.