Genese

TO DINA RAVERAAHIA E SEKEMA, E TE TITAURAA ˈTU IA DINA E FAAIPOIPO.

34 Haere atura te tamahine a Lea ra o Dina, ta ˈna i fanau ia Iakoba ra, e hiˈo i te mau vahine o taua fenua ra. 2 E ite aˈera te taata mana o taua fenua ra, o Sekema a Hamora ati Hevi ra, ia ˈna, ua rave ihora, e taoto atura ia ˈna, e hamani ino atura. 3 Riro atura to ˈna aau ia Dina, i taua tamahine a Iakoba ra; hinaaro atura oia i taua potii ra, e ua parau maitai atura i taua potii ra. 4 Ua parau atura hoi Sekema i to ˈna ra metua ia Hamora, na ô atura, E tii oe i taua potii nei ei vahine na ˈu.

5 Ite aˈera Iakoba e, ua rave Sekema i ta ˈna tamahine ia Dina, no te mea râ tei te aru te mau tamarii, tei te mau puaa ra, mamu noa ihora Iakoba e tae maira ratou. 6 Haere atura taua metua o Sekema ra, o Hamora, ia Iakoba ra e paraparau ia ˈna ra. 7 Tei te faarooraa ratou i taua parau ra, ua haere maira te mau tamarii a Iakoba mai te aru mai; inoino roa aˈera taua mau taata ra, riri roa aˈera i te hamani ino ia Iseraela, i te reira mea faufau i taua tamahine na Iakoba i ravehia ra; e ore hoi te reira e tia ia rave.

8 Ua paraparau maira Hamora ia ratou, na ô maira, Ua hinaaro roa te aau o tau tamaiti nei, o Sekema, i tena na tamahine; teie ta ˈu parau ia outou, e tuu mai outou ia ˈna ei vahine na ˈna: 9 e e faaipoipo mai outou i to matou; ho mai i ta outou mau tamahine na matou, e rave mai hoi outou i ta matou mau tamahine na outou: 10 e e parahi mai outou i ǒ matou nei; tei mua i to outou aro teie nei fenua; a parahi, e e hoo, e ia taoˈahia ta outou i ǒ nei. 11 Ua parau maira Sekema i te metua tane, e te mau tuaane o taua potii ra, Ia itehia mai au e outou na e ta outou e faaite mai ia ˈu ra, na ˈu ïa e horoa ˈtu: 12 e faarahi noa mai i te hoo, e te taoˈa hopoi noa, e ta outou e parau mai na, na ˈu ïa e horoa ˈtu, a tuu mai na râ i te potii ei vahine na ˈu ra.

13 Ua parau haavare atura râ te tamarii a Iakoba ia Sekema e to ˈna metua ia Hamora, na ô atura, no te mea ua rave oia i to ratou tuahine ia Dina: 14 na ô atura ia ratou, Eita matou e tia ia na reira, ia horoa i to matou tuahine i te taata peritome-ore-hia; e riro hoi te reira ei faainoraa ia matou. 15 Teie râ te mea e faatia ˈtu ai matou, Ia tia ia outou i te faariro ia outou mai ia matou atoa nei te huru, ia peritomehia te mau tane atoa i roto ia outou na; 16 e horoa matou i ta matou mau tamahine ia outou i reira, e e rave hoi matou i ta outou na mau tamahine, e e parahi matou i ǒ outou nei, e e faariro tatou ei nunaa hoê. 17 Ia ore râ outou ia faaroo mai, e e peritome ia outou, e rave matou i to matou potii nei, e e haere matou. 18 Mauruuru aˈera Hamora e te tamaiti a Hamora ra, o Sekema, i taua parau na ratou ra. 19 Aore aˈera taua tamaiti apî ra i faaroaroa i te rave i taua peu ra, no te mea, ua hinaaro oia i taua tamahine a Iakoba ra; e o te taata i hau noa iho hoi oia i te tura i te fetii o tana metua ra.

20 Haere atura Hamora e te tamaiti ra o Sekema i te uputa o to ratou iho oire, ua paraparau atura i te mau taata no taua oire ra, na ô atura, 21 E feia hau teie nei feia i roto ia tatou nei; e parahi noa ratou i ǒ nei i te fenua nei, hoo noa ˈi i ta ratou hooraa; e fenua rahi hoi, eita e apǐ ia ratou. E rave hoi tatou i ta ratou mau tamahine ei vahine, e e horoa ˈtu hoi tatou i ta tatou mau tamahine na ratou. 22 Teie râ te mea e tia ˈi i taua mau taata nei ia parahi i roto ia tatou, e ia riro ei nunaa hoê; ia peritomehia te mau tane atoa i ǒ tatou nei, mai ia ratou atoa i peritomehia ra. 23 E ore anei e riro mai ta ratou atoa ra, ta ratou mau taoˈa, e ta ratou mau puaa atoa, ia tatou nei? E faatia noa ˈtu tatou i ta ratou parau, e e parahi ïa ratou i ǒ tatou nei. 24 Ua faaroo maira te feia atoa i tomo na te uputa o taua oire ra ia Hamora, e ta ˈna tamaiti ra ia Sekema; e peritomehia ihora te mau tane atoa i tomo i te uputa o taua oire ra.

25 Ia tae râ i te toru o te mahana, ia mauiui ratou ra, ua rave aˈera e toopiti o na tamarii a Iakoba ra, o Simeona raua o Levi, na tuaane o Dina ra, i te ˈoˈe te tahi e te tahi, ua tomo atura i roto i te oire aore i mǎtaˈu, taparahi ihora i te mau tane atoa ra e pohe roa aˈera. 26 Taparahi ihora hoi raua ia Hamora e te tamaiti iho ia Sekema i te ˈoˈe, haru atura hoi ia Dina i roto i te fare o Sekema ra, e ua haere anaˈe maira i rapae au. 27 Tei nia noa maira te tamarii a Iakoba i taua feia i pohe ra, haru ihora i to taua oire ra, no te mea ua rave ratou i to ratou tuahine ra. 28 Ta ratou mau mamoe, e ta ratou mau puaatoro, e ta ratou mau asini: o to roto i te oire, e to rapae au atoa ra, ua hopoi-ê-hia ïa e ratou, 29 e ta ratou mau taoˈa atoa ra; e ta ratou mau vahine, e ta ratou mau tamarii rii ra, faarirohia ïa ei tîtî; e haruhia ihora te mau taoˈa atoa i roto i to ratou mau fare. 30 Ua parau maira Iakoba ia Simeona raua o Levi, Ua hauriria vau ia orua, i te faariroraa ia ˈu ei mea faufau i te mau taata o teie nei fenua, i te ati Kanaana e te ati Perezi; e no te mea e iti au nei, e riro ratou i te haaputuputu e rave ia ˈu e taparahi; pohe ihora vau e to ˈu atoa ra fetii. 31 Ua parau atura raua, E rave mai hoi oia i to mâua tuahine mai te rave i te faaturi ra?