Te rata ia Philemona

1 O Paulo tei tapeahia+ no te Mesia ra o Iesu e o Timoteo+ to tatou taeae, ia Philemona to mâua taeae here e hoa ohipa, 2 ia Apephia to mâua tuahine, ia Arehipo+ to mâua hoa faehau na te Mesia, e i te amuiraa e putuputu i roto i to oe fare:+

3 Ei ia outou te hamani maitai rahi e te hau no ǒ mai i te Atua to tatou Metua e i te Fatu ra o Iesu Mesia.

4 E haamauruuru noa vau i to ˈu Atua ia faahiti au ia outou i roto i ta ˈu mau pure,+ 5 a faarooroo noa ˈi au i to outou faaroo e to outou here no te Fatu ra* o Iesu e no te feia moˈa atoa.* 6 Te pure nei au e maoti to oe faaroo e te faaroo o to oe mau taeae e farii ai oe e mea na roto i te Mesia te mau mea maitatai atoa ta mâua e fanaˈo nei. 7 Ua oaoa e ua mahanahana roa hoi to ˈu aau i te faaroorooraa i to oe here, no te mea maoti oe, to ˈu taeae, i tamahanahanahia ˈi te aau o te feia moˈa.

8 No reira, noa ˈtu e mana rahi to ˈu i te iˈoa o te Mesia no te faaue ia oe e rave i te mea tia, 9 e mea maitai aˈe na ˈu e taparu ia oe no to oe here, no te mea ua ruhiruhia vau o Paulo nei, e ua tapea-atoa-hia nei no te Mesia ra o Iesu. 10 Te taparu nei au ia oe no ta ˈu tamaiti o Onesimo,+ ua riro hoi au ei metua no ˈna+ a tapeahia ˈi au.* 11 E tîtî faufaa ore oia no oe na mua ˈˈe, i teie nei râ, e mea faufaa oia no tâua. 12 Te faahoˈi atu nei au ia ˈna, ta ˈu hoi e here nei, ia oe ra.

13 Te hinaaro nei hoi au e tapea mai ia ˈna no te tavini ia ˈu ei mono ia oe a tapea-noa-hia ˈi au no te parau apî oaoa.+ 14 Aita râ vau e hinaaro ra e rave i te tahi mea maori noa râ ia farii oe, ia rave oe i ta ˈu e ani atu eiaha ma te faahepohia, ma te aau tae râ.+ 15 No reira paha oia i horo ê ai maa taime poto,* ia parahi tamau oia ia oe ra ua hoˈi anaˈe atu oia, 16 eiaha faahou ei tîtî,+ hau aˈe râ i te hoê tîtî, ei taeae ta ˈu e here rahi nei,+ ta oe râ e here rahi atu â, i te pae tino e i roto i te Fatu. 17 Mai te peu hoi e hoa* vau no oe, a farii maitai ia ˈna mai te mea ra o vau tera. 18 E mai te peu e ua pau oe ia ˈna aore ra e tarahu ta ˈna ia oe, na ˈu ïa e faahoˈi atu. 19 Te papai atu nei au, o Paulo, i to ˈu iho rima: e faahoˈi atu iho â vau i ta oe. Ua ite hoi oe e e tarahu ta oe ia ˈu, to oe iho ora. 20 Oia mau to ˈu taeae, ia tauturu mai oe ia ˈu no to tâua hoêraa e te Fatu. A haamahanahana i to ˈu aau na roto i to oe hoêraa e te Mesia.

21 Te tiaturi nei au e na reira iho â oe, no reira ïa vau e papai atu ai, ua ite hoi au e rave hau atu â oe i ta ˈu e ani atu ra. 22 A faanaho atoa mai na râ i te hoê piha no ˈu, te tiai nei hoi au ia faahoˈihia ˈtu vau ia outou ra* maoti ta outou mau pure.+

23 Te aroha ˈtu nei o Epaphera+ to ˈu hoa i roto i te tapearaa tei hoê e te Mesia ra o Iesu, 24 na reira atoa o Mareko, o Arisetareho,+ o Dema+ e o Luka,+ to ˈu mau hoa ohipa.

25 Ei ia outou te hamani maitai rahi o te Fatu ra o Iesu Mesia a faaite ai outou i te huru feruriraa tano.