Philemona

Te Episetole ia Philemona ra

TE FAAITE NEI PAULO I TO ˈNA OAOA I TE FAAROO E TE AROHA O PHILEMONA.

1 Paulo, e taata no te Mesia ra no Iesu i tapeahia nei, e te taeae nei o Timoteo, i to matou hoa rave ohipa i herehia ra, ia Philemona; 2 e ia Apephia herehia ra hoi, e to matou taetaeae aito hoi ia Arehipo ra, e te ekalesia atoa i roto i to fare na: 3 ei ia outou te aroha mau, e te hau no ǒ mai i to tatou Metua ra i te Atua, e no ǒ hoi i te Fatu ra ia Iesu Mesia.

4 Te haamaitai nei au i tau Atua, ma te faahiti atoa ia oe i ta ˈu nei pure aore e faaea, 5 ite aˈenei hoi au i to oe faaroo i te Fatu ra ia Iesu, e te aroha i te feia moˈa atoa ra; 6 ia tupu te ohiparaa o to oe faaroo, ia itea te mau maitai atoa i roto ia outou ia Iesu Mesia nei. 7 E oaoa rahi hoi to matou e te mahanahana i to oe aroha, no te mea ua anaanaea te aau o te feia moˈa ia oe na, e to matou taeae.

8 E teie nei, tia noâ ia ˈu i te Mesia nei ia faaue hua ˈtu ia oe i te mea au ra, 9 no te aroha râ to ˈu e parau maite noa ˈtu ai au ia oe, o Paulo taata paari hoi au, e taata no Iesu Mesia i tapeahia i te auri fifi i teie nei. 10 Te parau maite noa ˈtu nei au ia oe, i tau tamaiti, i ta ˈu i fanau i tau tapearaa nei, ia Onesimo ra: 11 i te tavini faufaa ore no oe i mutaa ihora, i teie nei râ e faufaa ïa ta oe ia ˈna, e ta ˈu atoa hoi: 12 o ta ˈu ïa e faahoˈi atu ia oe na; e tena na, e farii mai oe ia ˈna o to ˈu ïa aau mau: 13 i hinaaro hoi au i te tapea ia ˈna i ǒ nei ia ˈu nei, ia onohia oe ia ˈna i te poihereraa mai ia ˈu, i to ˈu nei tapearaahia i te evanelia nei: 14 aita râ vau e rave noa i tei ore i tia ia oe ra; ia riro to oe hamani maitai no te hinaaro mau, eiaha no te tahi mea ê. 15 Peneiaˈe hoi i taa ê iti poto noa mai ai oia, ia farii mai oe ia ˈna ia parahi mau atu; 16 eiaha râ ei tavini, ia hau atu râ oia i te tavini, ei taeae here ra, ia ˈu nei ïa, a tae atu ai hoi ia oe ra, i te Fatu nei, e te tino atoa nei hoi? 17 E tena na, te parau na oe ia ˈu e e hoa, e farii mai oe ia ˈna mai te mea e o vau iho. 18 E i hamani ino na oia ia oe, e e amutarahu oia na oe, e tuu mai oe i te reira i nia ia ˈu nei; 19 o vau teie o Paulo, na to ˈu iho rima i papai i teie nei parau, na ˈu ïa e hoo atu, eiaha noa ˈtu râ vau e parau noa ˈtu ia oe e, e amutarahu oe na ˈu ia oe iho na. 20 Oia ïa, e tau taeae, ei oaoa to ˈu ia oe i te Fatu nei; e haamahanahana mai oe i tau aau i te Fatu nei. 21 Te tiaturi nei au i to oe faatiaraa mai i papai atu ai au i teie nei parau ia oe, ua ite hoi au e, e rahi atu â ta oe i ta ˈu e ani nei. 22 E faanahonaho râ oe i te tahi parahiraa no ˈu; te manaˈo nei hoi au e, e riro vau i te horoahia ia outou i ta outou na pure.

23 Te aroha ˈtu nei Epaphera, tau hoa tapea-atoa-hia i te Mesia nei ia Iesu, ia oe. 24 E tau mau hoa rave ohipa nei o Mareko, e o Arisetareho, e o Dema, e o Luka hoi. 25 Ei to outou na mau varua te aroha mau o to tatou ra Fatu o Iesu Mesia. Amene.