Deuteronomi

26 “Ua tomo anaˈe oe i te fenua ta Iehova to Atua e horoa nei no oe ei tuhaa, ua fatu anaˈe oe i te reira e te parahi ra oe i reira, 2 e rave oe vetahi o te mau hotu matamua o te mau maa* atoa o te fenua, ta oe e haaputu i to fenua ta Iehova to Atua e horoa nei no oe, e e tuu oe i te reira i roto i te hoê farii e e haere oe i te vahi ta Iehova to Atua e maiti no te haamau i to ˈna iˈoa.+ 3 E haere oe i te tahuˈa e tavini ra i taua mau mahana ra e e parau oe ia ˈna: ‘I teie mahana, te faaite nei au ia Iehova to Atua e ua tomo vau i te fenua ta Iehova i horeo i to tatou mau tupuna e horoa no tatou.’+

4 “E rave mai te tahuˈa i te farii i to rima, a tuu atu ai i mua i te fata a Iehova to Atua. 5 E parau oe i mua ia Iehova to Atua: ‘E ati Arama+ to ˈu metua tei overe noa na,* e ua pou oia i Aiphiti+ e ua faaea i reira ei taata ê, e to ˈna utuafare iti.+ I reira râ, ua riro mai oia ei nunaa rahi e te puai mau â.+ 6 E ua hamani ino, ua haavî e ua faatîtî to Aiphiti ia matou i te ohipa teimaha.+ 7 Haamata aˈera ïa matou i te tiaoro ia Iehova, te Atua o to matou tupuna. Faaroo maira Iehova i to matou reo e hiˈo maira i to matou ahoaho, to matou ati e to matou haavîraahia.+ 8 Aratai maira Iehova ia matou i rapae i Aiphiti ma te rima puai, te rima faatorohia,+ te ohipa riaria mau, te tapao e te semeio.+ 9 Aratai maira oia ia matou i teie vahi e horoa maira i teie fenua no matou, e fenua e tahe noa te û e te meri.+ 10 I teie nei, ua hopoi mai au i te mau maa matamua o te fenua ta Iehova i horoa mai no ˈu.’+

“E tuu oe i te reira i mua ia Iehova to Atua e e tipapa oe i mua ia Iehova to Atua. 11 E oaoa ïa oe no te mau maitai atoa ta Iehova to Atua i horoa na oe e to utuafare, oe e te ati Levi e te taata ê e noho ra i ǒ oe.+

12 “Ua oti anaˈe ia oe i te haaputu i te tuhaa ahuru+ taatoa o ta oe i ooti i te toru o te matahiti, te matahiti o te tuhaa ahuru, e horoa oe i te reira na te ati Levi, te taata ê e noho ra i ǒ oe, te tamarii aita e metua tane,* e te vahine ivi, e e amu ratou i te reira e ia paia roa i roto i to mau oire.*+ 13 E e parau oe i mua ia Iehova to Atua: ‘Ua rave au i teie mau mea moˈa mai roto i to ˈu fare e ua horoa ˈtu vau na te ati Levi, te taata ê e noho ra i ǒ ˈu, te tamarii aita e metua tane, e te vahine ivi,+ mai ta oe iho â i faaue ia ˈu. Aita vau i ofati aore ra i haafaufaa ore i ta oe mau faaueraa. 14 Aita vau i amu i te reira a oto ai au, aita vau i iriti ê i te reira a viivii ai au e aita vau i horoa i te reira na tei pohe. Ua faaroo vau i te reo o Iehova to ˈu Atua e ua rave pauroa ta oe i faaue ia ˈu. 15 I teie nei, a hiˈo mai na mai to nohoraa moˈa mai, te raˈi, e a haamaitai i to nunaa o Iseraela e te fenua ta oe i horoa mai no matou,+ mai ta oe iho â i horeo i to matou mau tupuna,+ te fenua e tahe noa te û e te meri.’+

16 “I teie mahana, te faaue nei Iehova to Atua ia oe ia faaohipa i teie mau faaueraa e faaotiraa haavaraa. E haapao e e faaohipa oe i te reira ma to oe aau atoa+ e to oe ora* atoa. 17 I teie mahana, ua faaroo oe i ta Iehova parau e riro oia ei Atua no oe a haere ai oe na to ˈna mau eˈa e a haapao ai oe i ta ˈna mau ture,+ ta ˈna mau faaueraa,+ e ta ˈna mau faaotiraa haavaraa,+ e a faaroo ai oe i to ˈna reo. 18 E i teie mahana, ua faaroo Iehova i ta oe parau e riro oe ei nunaa no ˈna, ta ˈna faufaa taa ê,*+ mai ta ˈna iho â i fafau ia oe, e e haapao oe i ta ˈna mau faaueraa atoa 19 e e tuu oia ia oe i nia ˈˈe i te tahi atu mau nunaa atoa ta ˈna i hamani,+ a fanaˈo atu ai oe i te arueraa e te roo e te hanahana a faaite ai oe e nunaa moˈa oe no Iehova to Atua,+ mai ta ˈna iho â i fafau.”