Deuteronomi

25 “Ia tupu te tahi peapea i rotopu e piti taata, e nehenehe raua e haere i mua i te mau haava,+ e na ratou e haava ia raua, a parau atu ai aita e hapa ta te taata parau-tia e a faahapa ˈi i te taata ino.+ 2 Ua tano anaˈe ia tairihia te taata ino,+ e faatipapa te haava ia ˈna i raro, e e tairihia oia i mua i te aro o te haava. Ia tuati te rahiraa tairiraa i te ino o ta ˈna ohipa i rave. 3 E nehenehe oia e tairihia tae roa e 40 tairiraa,+ eiaha râ ia hau atu. Ia tamau oia i te tairihia hau aˈe i tera numera, e faahaamahia ïa to taeae i mua i to aro.

4 “Eiaha oe e tavaha i te tahi puaatoro oni ia taataahi oia i te sitona.+

5 “Mai te peu hoê â faaearaa to te tahi nau taeae, e e pohe hoê ma te tamarii ore, eiaha te vahine a tei pohe e faaipoipo i te tahi tane e ere i te fetii. E haere to ˈna taoete ia ˈna ra, e rave oia ia ˈna ei vahine faaipoipo na ˈna e e haapao oia i ta ˈna hopoia ia ˈna ei taeae no ta ˈna tane faaipoipo tei pohe.+ 6 Na roto te matahiapo ta ˈna e fanau mai e vai noa ˈi te iˈoa o tei pohe,+ a ore atu ai to ˈna iˈoa e mou mai rotopu ia Iseraela.+

7 “Ia ore râ tera tane e hinaaro e faaipoipo i te vahine ivi a to ˈna taeae, e haere ïa te vahine ivi a to ˈna taeae i te mau matahiapo i te uputa o te oire e e parau oia: ‘Aita te taeae o ta ˈu tane faaipoipo i hinaaro ia vai noa te iˈoa o to ˈna taeae i Iseraela. Aita oia i farii i te haapao i ta ˈna hopoia ia ˈu ei taeae no ta ˈu tane faaipoipo tei pohe.’ 8 E titau ïa te mau matahiapo o to ˈna oire ia ˈna e e paraparau ratou ia ˈna. Ia onoono oia i te parau: ‘Eita vau e hinaaro e faaipoipo ia ˈna,’ 9 e tapiri mai ïa te vahine ivi a to ˈna taeae ia ˈna i mua i te mau matahiapo, e tatara oia i te tiaa o to ˈna taoete i to ˈna avae,+ e tutuha oia i nia i to ˈna mata e e parau oia: ‘Tera te ravehia i te tane o te ore e haamau i te tahi utuafare no to ˈna taeae.’ 10 I muri iho, e topahia to ˈna utuafare* i teie iˈoa i Iseraela ‘Te utuafare o tei tatarahia te tiaa.’

11 “Ia taputô e piti tane e ia faaô mai te vahine faaipoipo a te hoê o na tane no te paruru i ta ˈna tane i tei tupai ra ia ˈna e ia toro oia i to ˈna rima a haru atu ai ia ˈna i to ˈna mero atiraa, 12 e tâpû ïa oe i to ˈna rima. Eiaha oe* e aroha ia ˈna.

13 “Eiaha ta oe ei piti ofai faito taa ê i roto i ta oe pute,+ te mea rahi e te mea nainai. 14 Eiaha ta oe ei piti farii faito taa ê*+ i roto i to oe fare, te mea rahi e te mea nainai. 15 Ei ofai faito tia e te afaro e ei mauhaa faito tia e te afaro noa ta oe, ia ora maoro oe i te fenua ta Iehova to Atua e horoa nei no oe.+ 16 Mea faufau hoi no Iehova to Atua te taata parau-tia ore o te rave i tera mau mea.+

17 “A haamanaˈo i ta Amaleka i rave ia oe a haere ai oe i to oe tere i rapae i Aiphiti,+ 18 to ˈna farereiraa ia oe i to oe tere e haapoheraa i te feia atoa e faataere ra i muri ia oe tei rohirohi e tei paruparu. Aita oia i mǎtaˈu i te Atua. 19 Ua paruru anaˈe Iehova to Atua ia oe i to oe mau enemi atoa ati aˈe ia oe i te fenua ta Iehova to Atua e horoa nei no oe ei tuhaa ia fatu oe,+ e faaore ïa oe i te parau o Amaleka i raro aˈe i te raˈi.+ Eiaha oe e haamoˈe i te reira.