Te rata i to Ephesia
2 Hau atu â, ua faaora mai te Atua ia outou, pohe noa â outou i ta outou mau hapa e hara,+ 2 i au na hoi to outou haerea i to teie nei ao*+ e i to te raatira o te reva e mana ra i nia i te taata, e o taua reva ra+ aore ra huru feruriraa*+ te ohipa nei i roto i te mau tamaiti faaroo ore. 3 Oia mau, i ora na tatou paatoa i rotopu ia ratou ia au i te mau hinaaro o to tatou tino,+ i te raveraa i te hinaaro o te tino e o to tatou mau manaˈo.+ E mai te tahi pae atoa ra, i au na ia tatou te riri rahi tahoo o te Atua+ mai to tatou fanauraahia mai. 4 Tera râ, e Atua aroha hamani maitai rahi oia,+ e no to ˈna here rahi ia tatou+ 5 ua faaora oia ia tatou ia hoê tatou e te Mesia, pohe noa ˈi tatou i ta tatou mau hapa,+ e i te hamani maitai rahi i faaorahia ˈi outou. 6 E ua faatia mai oia ia tatou e ua horoa mai i te hoê parahiraa i te raˈi no te mea ua hoê tatou e te Mesia ra o Iesu,+ 7 e i roto i te mau faanahoraa o te ao nei* no a muri aˈe, ia faaite oia i te rahi hau ê o to ˈna hamani maitai e to ˈna anaanatae* ia tatou tei hoê e te Mesia ra o Iesu.
8 I taua hamani maitai rahi ra i faaorahia ˈi outou na roto i te faaroo,+ e ere hoi no ta outou i rave, e ô râ te reira na te Atua. 9 E ere iho â no te ohipa ta outou i rave i faaorahia ˈi outou,+ no reira aita ˈtura e tumu to te taata ia teoteo. 10 E ohipa tatou na te rima o te Atua,* e na roto i to tatou hoêraa e te Mesia ra o Iesu+ ua poietehia tatou+ no te rave i te mau mea maitatai ta te Atua i faanaho atea ia haapao tatou.
11 No reira e te feia o te mau nunaa ěê i ta te tino, e haamanaˈo na e i piihia na outou e feia “peritome-ore-hia” e te feia i “peritomehia” te tino i te rima taata nei. 12 I tera ra tau aita outou i ite i te Mesia, e taata ěê outou i te nunaa Iseraela, e aita ta outou e tuhaa i te mau faufaa o te parau fafau.+ E aita na to outou e tiaturiraa e aita atoa na e Atua to outou i roto i teie nei ao.+ 13 I te atea ê outou i mutaa ihora, i teie nei râ ua hoê outou e te Mesia ra o Iesu, ua faafatata ïa outou i te Atua na roto i te toto o te Mesia. 14 Na te Mesia hoi i hopoi mai i te hau,+ na ˈna i tahoê i na pǔpǔ e piti+ e i vavahi i te patu i faataa ê i teie na pǔpǔ.+ 15 Na roto i to ˈna tino i faaore ai oia i te tumu o te enemiraa, oia hoi te Ture e ta ˈna mau faaueraa, e ia riro na pǔpǔ e piti ei nunaa* apî hoê na roto ia ˈna+ e no te faatupu i te hau, 16 e no te faahau roa i na pǔpǔ e piti i te Atua ra i roto i te hoê â nunaa* maoti te pou haamauiuiraa,*+ no te mea ua faaore oia i te tumu o te enemiraa+ maoti to ˈna tino. 17 E ua haere mai oia e ua faaite i te parau apî oaoa o te hau ia outou tei atea ê i te Atua e oia atoa i te feia tei fatata i te Atua, 18 no te mea na roto ia ˈna i nehenehe ai tatou, na pǔpǔ e piti, e faafatata ˈtu i te Metua maoti te varua moˈa.
19 I teie nei, e ere faahou ïa outou i te taata ěê,+ hoê â râ oire to outou+ e to te feia moˈa e e mero outou no te utuafare o te Atua,+ 20 e ua patuhia outou i nia i te niu o te mau aposetolo e te mau peropheta.+ Area te Mesia ra o Iesu, o te ofai tihi* faufaa roa ïa.+ 21 Na roto ia ˈna e faatuatiati-maitai-hia ˈi te mau tuhaa atoa+ o te paturaa ia riro roa mai ei hiero moˈa no Iehova.*+ 22 E na roto ia ˈna, te patuhia ra outou ei vahi e parahi ai te Atua maoti to ˈna varua moˈa.+