Te faatiaraa a Mareko
9 Na ô atoa ˈtura Iesu ia ratou: “Oia mau ta ˈu e parau atu: Te vai ra vetahi o te feia i ǒ nei o te ore e pohe hou a ite ai na mua i te Faatereraa arii a* te Atua ia tae mai ma te mana.”+ 2 E ono mahana i muri aˈe, rave ihora Iesu ia Petero, Iakobo e Ioane e aratai atura ia ratou i nia i te hoê mouˈa teitei o ratou anaˈe. Faahuru-ê-hia ihora Iesu i mua ia ratou,+ 3 anaana ˈtura to ˈna ahu e uouo roa aˈera. Aita hoi e taata puˈa ahu i te ao nei e noaa ia ˈna teie huru uouo. 4 Fa atoa maira o Elia raua Mose e te paraparau ra raua e o Iesu. 5 Na ô atura Petero ia Iesu: “Rabi, mea fanaˈo matou i te tiaraa mai i ǒ nei. Vaiiho na ia matou ia faatia e toru fare ie, hoê no oe, hoê no Mose e hoê no Elia.” 6 Aita hoi Petero i ite e nafea râ, ua mehameha roa hoi ratou. 7 Fa maira te hoê ata, tapoˈi ihora ia ratou, e na ô maira te hoê reo+ no roto mai i taua ata ra: “O ta ˈu Tamaiti teie, tei herehia.+ A faaroo ia ˈna.”+ 8 Hiˈo aˈera ratou ati aˈe, o Iesu anaˈe ta ratou e ite ra, aita ˈtu e taata.
9 A pou mai ai ratou mai nia mai i te mouˈa, faaue maitai ihora Iesu ia ratou eiaha e faaite i te taata i ta ratou i ite+ e ia tia roa mai te Tamaiti a te taata nei mai te pohe mai.+ 10 Tapea maite atura ratou i taua parau ra i roto i to ratou aau,* paraparau aˈera râ te tahi i te tahi no nia i te auraa o to ˈna tiaraa mai te pohe mai. 11 Ui maira ratou ia ˈna: “No te aha te mau papai parau e na ô ai e o Elia+ na mua te haere mai?”+ 12 Na ô atura oia: “O Elia iho â na mua te haere mai e e faahoˈi oia i te mau mea atoa mai i te matamua ra.+ No te aha râ i papaihia ˈi e e roohia te Tamaiti a te taata nei i te mauiui rahi+ e e vahavahahia oia?+ 13 Te parau atu nei râ vau e ua haere mai iho â Elia+ e ua rave ratou ia ˈna mai ta ratou i hinaaro, mai tei papaihia no nia ia ˈna.”+
14 I te haereraa ˈtu Iesu, Petero, Iakobo e Ioane i te tahi atu mau pǐpǐ ra, ite aˈera ratou i te hoê nahoa rahi ati aˈe i taua mau pǐpǐ ra e te mau papai parau e mârô ra ia ratou.+ 15 I te iteraa mai iho â râ te nahoa ia Iesu, maere ihora ratou e horo maira e aroha ia ˈna. 16 Ui atura ïa oia: “Eaha ta outou e mârô nei i te mau pǐpǐ?” 17 Pahono maira te hoê o te nahoa: “Orometua, ua afai mai au i ta ˈu tamaiti ia oe nei, no te mea e varua to ˈna i vava ˈi oia.+ 18 I te mau taime atoa e uruhia ˈi oia, e taorahia oia i raro, e tahe to ˈna haae, e mauu to ˈna niho, a paruparu atu ai. Ua parau hoi au i ta oe mau pǐpǐ ia tiavaru i taua varua ra, aita râ i haere ia ratou.” 19 Na ô atura oia: “Auê ïa uˈi aita e faaroo,+ ehia â maororaa e parahi ai au ia outou nei? Ehia â maororaa e faaoromai ai au ia outou? Afai mai ia ˈna.”+ 20 Afai maira ratou i te tamaroa. I to te varua râ iteraa mai ia Iesu, rave ihora oia e ia iriti te tamaroa. Topa ˈtura oia e taaviriviri ihora a tahe noa ˈi te haae. 21 Ui atura Iesu i te metua tane: “Mai afea mai â e na ô noa ˈi oia?” Parau maira te metua tane: “Mai to ˈna nainairaa mai â, 22 pinepine to te varua huriraa ia ˈna i roto i te auahi e i roto atoa i te pape ia pohe oia. Ia tia râ ia oe ia faaora ia ˈna, aroha mai na e a tauturu mai.” 23 Na ô atura Iesu: “Eaha oe e parau ai: ‘Ia tia ia oe’? I te taata hoi e faaroo to ˈna, e tia ïa te mau mea atoa.”+ 24 Tuô ihora te metua tane o te tamaiti a na ô ai: “E faaroo to ˈu! A tauturu mai ia rahi atu â to ˈu faaroo!”+
25 A ite ai Iesu e te haere ru mai ra te nahoa, tamaˈi ihora oia i te varua viivii a na ô ai: “Oe te varua i vava ˈi teie tamarii e i turi ai to ˈna tariˈa, te faaue nei au ia oe, a haere i rapae e eiaha e hoˈi faahou i roto ia ˈna.”+ 26 Rave ihora te varua viivii e ia tuô e ia iriti roa te tamaiti e faarue maira. Tarava noa ˈtura te tamaiti mai te huru ra e ua pohe e na ô aˈera te rahiraa: “Ua pohe oia!” 27 Rave ihora râ Iesu i to ˈna rima, faatia aˈera ia ˈna e tia aˈera oia. 28 Tomo atura Iesu e ta ˈna mau pǐpǐ i roto i te hoê fare e ui maira ratou ia ˈna: “No te aha aita i haere ia matou ia tiavaru i te varua viivii?”+ 29 Parau atura Iesu: “I te pure noa e faarue mai ai teie huru varua viivii.”
30 Reva ˈtura ratou e haere atura na roto ia Galilea, aita râ Iesu i hinaaro ia ite te taata teihea oia. 31 I haapii na hoi oia i ta ˈna mau pǐpǐ e i parau atu na: “E tuuhia te Tamaiti a te taata nei i te rima o to ˈna mau enemi, e haapohe ratou ia ˈna,+ noa ˈtu râ e ua haapohehia, e tia mai oia i te toru o te mahana.”+ 32 Aita râ ratou i taa i ta ˈna i parau e ua taiâ ratou i te uiui ia ˈna.
33 Haere atura ratou i Kaperenaumi. Tei roto Iesu i te fare i ui ai oia i ta ˈna mau pǐpǐ: “Eaha ta outou i mârô na a haere noa ˈi tatou na nia i te purumu?”+ 34 Mamû noa ihora ratou, i mârô na hoi te tahi i te tahi na nia i te purumu o vai tei rahi aˈe. 35 Parahi ihora Iesu, pii atura i na 12 ia tapiri mai e na ô atura: “O tei hinaaro ia rahi aˈe oia, ia haehaa roa ïa e ia riro ei tavini no te taata atoa.”+ 36 Rave maira oia i te hoê tamarii, tuu atura ia ˈna i ropu ia ratou e a tapea ˈi i te tapono o taua tamarii ra, na ô atura: 37 “Te taata o te farii hoê o teie mau tamarii+ no to ˈu nei iˈoa, e farii atoa ïa ia ˈu. E te taata o te farii ia ˈu, e farii ïa eiaha ia ˈu noa, i tei tono atoa mai râ ia ˈu.”+
38 Parau ihora Ioane ia Iesu: “Orometua, ua ite matou i te hoê taata i te tiavaruraa i te mau demoni ma te faaohipa i to oe iˈoa, e ua tamata matou i te tapea ia ˈna, no te mea e ere oia i te pǐpǐ na oe.”+ 39 Na ô atura râ Iesu: “Eiaha e tamata i te tapea ia ˈna, aita hoi e taata e tia ia rave i te hoê ohipa mana ma to ˈu nei iˈoa, a faaino mai ai ia ˈu. 40 Te taata hoi aita e patoi mai ra, te turu mai ra ïa.+ 41 Te taata hoi e horoa i te tahi auˈa pape na outou no te mea no te Mesia outou,+ oia mau ta ˈu e parau atu, e ore roa oia e ere i ta ˈna haamaitairaa.+ 42 Ia faaturori râ te tahi taata i te hoê o teie feia o te au i te tamarii, mea maitai aˈe ia taamuhia i nia i to ˈna aˈî te hoê ofai oro e hutihia na e te asini, a huri atu ai ia ˈna i raro i te moana.+
43 “Ia hapa oe no to oe rima, a tâpû ïa. Mea maitai aˈe ia tae atu oe i te ora ma te hoê noa rima, i te haere ma to oe rima i Gehena,* i roto i te auahi pohe ore.+ 44 *—— 45 E ia hapa oe no to oe avae, a tâpû ïa. Mea maitai aˈe ia tae atu oe i te ora ma te hoê noa avae, i te hurihia oe ma to oe na avae i Gehena.*+ 46 *—— 47 E ia hapa oe no to oe mata, a faarue atu.+ Mea maitai aˈe ia ô atu oe i roto i te Faatereraa arii a te Atua ma te hoê noa mata, i te hurihia oe ma to oe na mata i Gehena,*+ 48 e ore te mau tuˈa e te auahi e pohe i reira.+
49 “E haamairihia te auahi i nia i tera huru taata atoa, mai te miti papaa e ueuehia i nia i te maa.+ 50 Mea maitai roa te miti papaa, ia maaro râ te reira, e nafea ïa e avaava faahou ai?+ Ia vai te miti papaa i roto ia outou,+ e ia vai te hau i rotopu ia outou.”+