Mareko

TO IESU FAAHURU-Ê-RAAHIA RA.

9 E ua parau atura oia ia ratou, E parau mau ta ˈu e parau atu ia outou nei, te tia nei te tahi pae i ô nei e ore e pohe e ite ai i te basileia o te Atua i te taeraa mai ma te mana. 2 E rui ono aˈera, ua aratai atura Iesu ia Petero, e ia Iakobo, e ia Ioane, ratou anaˈe ra i nia iho i te hoê mouˈa teitei; e faahuru-ê-hia ihora oia i mua ia ratou. 3 Anaana roa aˈera to ˈna ahu, e te teatea rahi mai te hiona ra, aore roa e tahupe ahu o te ao nei e noaa ˈi te teatea. 4 E ua fa maira hoi Elia raua o Mose, e te paraparau ra raua e o Iesu atoa hoi. 5 Ua parau maira Petero ia Iesu, E Rabi, e mea maitai ia parahi tatou i ô nei: e faatia matou i te fare autâ e toru aˈe, no oe e tahi, no Mose e tahi, no Elia e tahi: 6 aore hoi oia i ite i ta ˈna parau, e horiri rahi hoi to ratou. 7 E te hoê ata maira i te tapoˈiraa mai ia ratou, e te hoê reo maira hoi no roto i taua ata ra, na ô maira, O ta ˈu Tamaiti here teie, a faaroo ia ˈna. 8 Ua nevaneva noa ihora ratou i reira ra e aore roa e taata i itea ia ratou, maori râ o Iesu e o ratou iho hoi.

9 E tei to ratou pouraa mai mai nia mai i taua mouˈa ra, ua aˈo atura oia ia ratou e eiaha roa e faaite noa ˈtu i te hoê taata i ta ratou i ite ra, e ia tia mai te Tamaiti a te taata mai te pohe maira. 10 Tamau maite ihora ratou i taua parau ra, e ua feruri ihora ratou ratou iho, i te auraa i taua tia faahou raa mai te pohe maira.

11 Ua ui maira ratou ia ˈna, na ô maira, Eaha te mau papai parau i parau mai e, O Elia na te haere mai? 12 Ua parau atura oia ia ratou, na ô atura, O Elia na â hoi te haere mai, ia tia te mau mea atoa ra, e mai tei papaihia hoi i te Tamaiti a te taata nei, e rave rahi atoa to ˈna pohe, e e hamani-ino-hia. 13 E faaite atu râ vau ia outou, Ua reva mai na Elia, mai tei papaihia ia ˈna ra, e ua rave ratou i ta ratou i hinaaro ia ˈna.

14 E ia hoˈi mai oia i te mau pǐpǐ ra, ite maira oia i te taata e rave rahi i te haapuniraa ia ratou, e te mau papai parau i te mârôraa ia ratou. 15 E tei te iteraa ˈtu taua mau taata ra ia ˈna, hitimaue atura ratou, horo atura e aroha ˈtu ia ˈna. 16 Ua ui maira oia i taua mau papai parau ra, Eaha ta outou i mârô ia ratou nei? 17 Ua parau atura te hoê i taua feia rahi ra, na ô atura, E Rabi, i aratai mai nei au i tau tamaiti ia oe nei, e varua vava to ˈna; 18 e i te vahi e rave mai ai oia ia ˈna, ua taora noa ia ˈna i raro i te repo; e haaehia ihora oia i reira ra, e auau hoi i te niho, e hope noa ˈˈe to ˈna puai: i parau na hoi au i te mau pǐpǐ na oe e tiavaru i te demoni, aita râ i tia ia ratou. 19 Ua parau maira oia ia ˈna, na ô maira, Auê ïa ui faaroo ore e mai te aha ra te maoro o to ˈu parahiraa i ô outou nei? mai te aha hoi te maoro o to ˈu faaoromairaa ia outou? a aratai mai ia ˈna ia ˈu nei. 20 Ua aratai maira ratou ia ˈna: tei te iteraa ˈtu Iesu ia ˈna, ua rave maira taua varua ra ia ˈna; hiˈa ihora oia i raro i te repo, taaviriviri ihora ma te haae. 21 Ua ui atura Iesu i te metua tane, Mai te aha mai â to ˈna roohiaraahia i teie nei pohe? Ua parau maira oia, Mai to ˈna itiraa mai â; 22 a tai rau aˈenei huriraahia i roto i te auahi, e i raro i te pape ia pohe oia, e i tia ia oe ia rave ra, aroha mai oe ia matou, e e tauturu mai. 23 Ua parau atura Iesu ia ˈna, I tia ia oe ia faaroo ra, e tia te mau mea atoa nei i te taata i faaroo. 24 Ua pii noa maira te metua tane o taua tamaiti ra i reira ra, na ô maira ma te roimata, E te Fatu, ua faaroo vau, e turu mai oe i tau faaroo paruparu nei. 25 E ia hiˈo atura Iesu i te taata i te neneiraa mai i nia ia ˈna, ua avau atura oia i taua varua faufau ra, na ô atura ia ˈna, E tera ra varua vava e te turi, e haere oe i rapae au, te faaue atu nei au ia oe, e eiaha roa e tomo faahou i roto ia ˈna. 26 Ua pii hua maira taua demoni ra, ua rave uˈana maira ia ˈna, reva ˈtura i rapae, riro atura oia mai te taata pohe ra; e rave rahi hoi tei parau e, Ua pohe roa. 27 Ua rave ihora râ Iesu i tana rima, faatia aˈera ia ˈna, ua tia noa maira oia i nia. 28 E tae maira Iesu i roto i te fare ua ui huna ˈtura ta ˈna mau pǐpǐ ia ˈna, Eaha i ore i tae ai ia matou te demoni i rapae? 29 Ua parau maira oia ia ratou, E ore teie huru demoni e tae noa i rapae maori râ i te pure e te haapaeraa maa.

30 Faarue ihora ratou i taua vahi ra, haere atura na Galilea: te hinaaro ra hoi oia e eiaha roa te taata ia ite. 31 Te haapii ra hoi oia i ta ˈna mau pǐpǐ, te na ô atura ia ratou, Ua tuuhia te Tamaiti a te taata nei i te rima o te taata, e e taparahi pohe roa ratou ia ˈna; e ia oti i te taparahihia ra, e tia faahou ïa oia i nia i te rui toru ra. 32 Aita râ ratou i ite i te auraa i taua parau ra, e i mǎtaˈu hoi ia ui atu ia ˈna. 33 E tae atura oia i Kaperena, ua ui atura oia ia ratou i roto i te fare, Eaha ta outou i mârô noa ia outou iho i te eˈatia ra? 34 Mamû noa ihora râ ratou, i mârô na hoi ratou iho i te aratia ra i to ratou e hau i te rahi. 35 Parahi ihora oia i raro, ua parau atura i te tino ahuru ma piti ra, na ô atura ia ratou, O te taata i hinaaro e ei mua oia, ei hopea roa oia e tia ˈi, e ei tavini no ratou atoa. 36 Ua rave atura oia i te hoê tamaiti iti, ua tuu atura i ropu ia ratou, ua rave atura hoi e ua hii ihora na ô atura ia ratou, 37 O te ite mai i te hoê tamaiti iti mai teie nei no to ˈu nei iˈoa, ua ite mai ïa ia ˈu; e o te ite mai ia ˈu ra, e ere ïa o vau anaˈe ra ta ˈna i ite maira, oia atoa râ o tei tono mai ia ˈu nei ra.

38 Ua parau maira Ioane ia ˈna, na ô maira, E Rabi, i hiˈo atura matou i te hoê i te tatairaa i te demoni i to oe iˈoa tei ore i pee mai ia tatou; e ua parau atura matou ia ˈna eiaha, no te mea aore oia i pee mai ia tatou. 39 Ua parau atura Iesu, Eiaha te reira e faaorehia ˈtu; aore roa hoi e taata e rave i te semeio i to ˈu nei iˈoa e faaino vave mai ia ˈu. 40 E ere oia i to ǒ maira, no tatou ïa. 41 O te horoa noa mai hoi i te hoê auˈa pape na outou no to ˈu nei iˈoa, no te mea no te Mesia outou, oia mau ta ˈu e parau atu ia outou na, e ore roa oia e ere i ta ˈna utua. 42 Area te faaturori i te hoê i teie nei mau taata rii i faaroo mai ia ˈu nei, e huru maitai aˈe oia ia taamuhia te hoê ofai rahi mule i nia i tana aˈî e ia taorahia oia i raro i te tai. 43 E te hapa ra oe i to rima, e tâpû ê atu; e maitai hoi oe i te rima hoê ia tae i te ao ra, i te rima piti ia tae i te po i roto i te auahi pohe ore ra; 44 te vahi e ore e pohe to ratou tuˈa, e to ratou auahi e ore e tinaihia. 45 E te hapa ra oe i to avae e tâpû ê atu, e maitai hoi oe ia tae pirioi i te ao, i te avae piti ia hurihia i te po, i roto i te auahi pohe ore ra; 46 te vahi e ore e pohe to ratou tuˈa, e to ratou auahi e ore e tinaihia. 47 E te hapa ra oe i to mata, e ohiti ê atu, e maitai hoi oe ia tae mata hoê i te basileia o te Atua, i te mata piti ia hurihia i te auahi i te po; 48 te vahi e ore e pohe to ratou tuˈa, e to ratou auahi e ore e tinaihia. 49 E hope roa hoi i te rapaauhia i te auahi, mai te mau tusia atoa i rapaauhia i te miti ra. 50 E mea maitai te miti, ia maˈaro râ te miti ra, eaha ta outou ia faataitai? Ia vai â te miti i roto ia outou, e tamau hoi i te hau outou outou iho.