Zekaria

7 I te maha o te matahiti te faatereraa te arii Dariu, tae maira te parau a Iehova ia Zekaria+ ra i te maha o te mahana o te iva o te avaˈe, oia hoi i te avaˈe o Kisilu.* 2 Tono aˈera te feia no Betela ia Sarezera e ia Regeme-meleka e to ˈna mau taata no te taparu i te farii maitai a* Iehova, 3 ma te parau i te mau tahuˈa o te hiero o Iehova o te mau nuu* e i te mau peropheta: “Ia taˈi anei au i te pae o te avaˈe+ a haapae atu ai i te maa, mai ta ˈu i rave na ehia rahiraa matahiti?”

4 Tae faahou maira te parau a Iehova o te mau nuu ia ˈu nei e na ô ra: 5 “A parau i te taata atoa o teie fenua e i te mau tahuˈa: ‘A haapae ai outou i te maa e a auê ai i te pae o te avaˈe e i te hitu o te avaˈe+ e 70 matahiti te maoro,+ no ˈu mau anei outou i haapae ai i te maa? 6 A tamaa ˈi e a inu ai outou, e ere anei no outou iho outou i tamaa e i inu ai? 7 Eiaha anei outou ia faaroo i te mau parau ta Iehova i faaite na roto i te mau peropheta i tahito ra,+ i te tau e taata â to Ierusalema e to te mau oire ati aˈe e a vai hau noa ˈi taua mau oire ra, e a faaeahia ˈi te Negeba e te Sephela e te taata?’”

8 Tae faahou mai ra te parau a Iehova ia Zekaria ra e na ô ra: 9 “Teie ta Iehova o te mau nuu e parau ra: ‘A haava ma te parau-tia mau+ e a faaite i te here taiva ore+ e te aroha hamani maitai te tahi i nia i te tahi. 10 Eiaha e taviri i te vahine ivi aore ra te tamarii aita e metua tane,*+ te feia ěê+ aore ra te feia veve.+ Eiaha e opua i te ohipa ino te tahi i te tahi i roto i to outou aau.’+ 11 Aita iho â râ ratou i hinaaro e faaroo.+ Ua tamau noa ratou i te huri tua ia ˈu+ a tapiri atu ai i to ratou tariˈa ia ore ratou e faaroo.+ 12 Ua faariro ratou i to ratou aau mai te hoê taiamani*+ e aita ratou i faaroo i te ture* e te mau parau ta Iehova o te mau nuu i faatae ia ratou ma to ˈna varua na roto i te mau peropheta i tahito ra.+ No reira Iehova o te mau nuu i riri roa ˈi.”+

13 “‘Mai ia ratou i ore i faaroo i to ˈu* piiraa,+ aita atoa vau i faaroo i te piiraa mai ratou ia ˈu,’+ te parau ra Iehova o te mau nuu. 14 ‘E ua haapurara ê au ia ratou i te hoê vero i roto i te mau nunaa atoa ta ratou i ore i matau.+ Ua vai ano te fenua i muri ia ratou. Aita e taata i haere na reira, aita e taata i hoˈi atu i reira,+ ua faariro hoi ratou i taua fenua nehenehe ra ei riariaraa.’”