Zekaria
6 Hiˈo faahou atura vau i nia e ite atura vau e maha pereoo e haere mai ra mai ropu mai e piti mouˈa, e e mouˈa veo taua na mouˈa ra. 2 E puaahorofenua uteute to te pereoo matamua e e puaahorofenua ereere to te piti o te pereoo.+ 3 E puaahorofenua uouo to te toru o te pereoo, e e puaahorofenua opatapata e te û e rave rau to te maha o te pereoo.+
4 Ui atura vau i te melahi o te paraparau ra ia ˈu: “Eaha teie mau pereoo, to ˈu fatu?”
5 Pahono maira te melahi ia ˈu: “O na varua e maha o te raˈi teie,+ te haere ra ratou mai mua ˈtu i te Fatu o te fenua taatoa.+ 6 Te haere ra te pereoo e na puaahorofenua ereere i te fenua o apatoerau.+ Te haere ra na puaahorofenua uouo i pihai atu i te miti, e te haere ra na puaahorofenua opatapata i te fenua o apatoa. 7 E hinaaro ru to te mau puaahorofenua ua rau te û e haere e haaati i te fenua.” Na ô ihora oia: “A haere e haaati i te fenua.” Haere atura ratou e haaati i te fenua.
8 Tuô maira oia ia ˈu e na ô maira: “A hiˈo na, ua tamǎrû te mau puaahorofenua o te haere ra i te fenua o apatoerau i te varua o Iehova i te fenua o apatoerau.”
9 Tae faahou maira te parau a Iehova ia ˈu nei e na ô ra: 10 “A hopoi mai i ta Heledai, Tôbia e Iedaia i rave mai i te feia ra i afai-tîtî-hia. I tera mahana, e haere oe i te fare o Iosia te tamaiti a Zephania e te feia atoa tei tae mai mai Babulonia mai. 11 E rave oe i te ario e te auro, e hamani oe i te hoê hei upoo* a tuu atu ai i te reira i nia i te upoo o Iosua+ te tamaiti a Iehozadaka, te tahuˈa rahi. 12 I muri iho, e parau oe ia ˈna:
“‘Teie ta Iehova o te mau nuu* e parau ra: “Teie te taata o Ohi te iˈoa.+ E oteo oia mai to ˈna ra vahi e e patu oia i te hiero o Iehova.+ 13 Na ˈna e patu i te hiero o Iehova e e riro ia ˈna te hanahana. E parahi oia i nia i to ˈna terono a faatere atu ai. E riro atoa oia ei tahuˈa i nia i to ˈna terono+ e e tuea na toroa e piti. 14 E vai noa te hei upoo* i roto i te hiero o Iehova ei haamanaˈoraa no Helema, Tôbia, Iedaia+ e Hena te tamaiti a Zephania. 15 E haere mai to te atea ê e apiti i te paturaa o te hiero o Iehova.” E ite mau â outou e na Iehova o te mau nuu i tono ia ˈu ia outou ra. E tupu te reira ia faaroo maite outou i te reo o Iehova to outou Atua.’”