Zekaria

2 Hiˈo atura vau e ite atura vau i te hoê taata e taura faito+ to roto i to ˈna rima. 2 Ui atura ïa vau: “Te haere ra oe ihea?”

Pahono maira oia: “Te haere ra vau e faito ia Ierusalema, no te ite eaha to ˈna aano e to ˈna roa.”+

3 E inaha, faaatea ˈtura te melahi o te paraparau ra ia ˈu e haere maira te tahi atu melahi e farerei ia ˈna. 4 Na ô atura oia ia ˈna: “A horo i ǒ e a parau i tera taurearea: ‘“E parahi te taata i Ierusalema+ mai i roto i te tahi mau oire rii aita e aua, e rahi roa hoi te taata e te animara i reira.+ 5 E riro vau no ˈna ei aua auahi ati aˈe ia ˈna,+ e e faaî au ia ˈna i to ˈu hanahana,”+ te na reira mai ra Iehova.’”

6 “Haere mai! Haere mai! A horo ê i te fenua o apatoerau,”+ te na reira mai ra Iehova.

“Ua haapurara ê hoi au ia outou i na mataˈi e maha o te raˈi,”+ te na reira mai ra Iehova.

7 “A haere mai e Ziona! A horo, oe o te parahi ra i ǒ te tamahine o Babulonia.+ 8 I muri aˈe i te faahanahanaraahia Iehova o te mau nuu,* ua tono oia ia ˈu i te mau nunaa ra o tei haru i ta outou mau taoˈa, e teie ta ˈna i parau:+ ‘Te taata o te hauti ia outou, te hauti ra ïa i to ˈu orio mata.+ 9 I teie nei, e tuu vau i to ˈu rima no te aro ia ratou, e e riro ratou ei taoˈa haru na ta ratou mau tîtî.’+ E e ite mau â outou e na Iehova o te mau nuu i tono ia ˈu.

10 “A umere, e te tamahine o Ziona.+ Te haere mai ra hoi au+ e e parahi au i rotopu ia oe,”+ te na reira mai ra Iehova. 11 “E apiti mai te nunaa e rave rahi ia Iehova ra i tera mahana,+ e e riro ratou ei nunaa no ˈu. E e parahi au i rotopu ia oe.” E e ite mau â outou e na Iehova o te mau nuu i tono ia ˈu ia outou ra. 12 E rave mai Iehova ia Iuda ei tuhaa na ˈna i nia i te vahi moˈa, e e maiti faahou oia ia Ierusalema.+ 13 Ia mamû te taata atoa i mua ia Iehova, te haere mai ra hoi oia mai to ˈna nohoraa moˈa ra a ohipa ˈtu ai.