Zekaria

1 I te vaˈu o te avaˈe i te piti o te matahiti te faatereraa o Dariu,+ tae maira te parau a Iehova i te peropheta ra ia Zekaria*+ te tamaiti a Berekia te tamaiti a Ido e na ô ra: 2 “E riri rahi to Iehova i to outou mau metua.+

3 “A parau ia ratou: ‘Teie ta Iehova o te mau nuu* e parau ra: “‘A hoˈi mai ia ˈu nei,’ te na reira ra Iehova o te mau nuu, ‘e e hoˈi atu vau ia outou ra,’+ te parau ra Iehova o te mau nuu.”’

4 “‘Eiaha e riro mai to outou mau metua, ta te mau peropheta i tahito ra i parau atu: “Teie ta Iehova o te mau nuu e parau ra: ‘A faarue na i to outou haerea ino e ta outou mau ohipa iino.’”’+

“‘Aita râ ratou i faaroo e aita ratou i tâuˈa ia ˈu,’+ te na reira mai ra Iehova.

5 “‘Teihea to outou mau metua i teie nei? E te mau peropheta, ua ora anei ratou e a muri noa ˈtu? 6 Tera râ, ua ite to outou mau metua i te tupuraa ta ˈu mau parau e faaueraa mana ta ˈu i horoa i ta ˈu mau tavini, te mau peropheta, e ere anei?’+ Hoˈi maira ïa ratou ia ˈu nei e na ô maira: ‘Ua haa Iehova o te mau nuu i nia ia tatou ia au i to tatou haerea e ta tatou mau ohipa, mai ta ˈna i faaoti i te rave.’”+

7 I te 24 o te mahana o te 11 o te avaˈe, oia hoi te avaˈe o Sebata,* i te piti o te matahiti te faatereraa o Dariu,+ tae maira te parau a Iehova i te peropheta ra ia Zekaria te tamaiti a Berekia te tamaiti a Ido. 8 I te maororaa po, ite atura vau i te hoê orama. E taata to nia i te hoê puaahorofenua uteute, e te tia noa ra oia i ropu i te mau tumu hedesa i roto i te afaa. E i muri ia ˈna, e mau puaahorofenua uteute ïa, maereere e uouo.

9 Ui atura ïa vau: “O vai ma teie, to ˈu fatu?”

Pahono maira te melahi o te paraparau ra ia ˈu: “E faaite atu vau ia oe o vai ma teie.”

10 Parau ihora te taata o te faaea noa ra i ropu i te mau tumu hedesa: “O ratou ta Iehova i tono no te hiˈopoa haere na te fenua taatoa.” 11 Na ô aˈera ratou i te melahi a Iehova o te faaea noa ra i ropu i te mau tumu hedesa: “Ua hiˈopoa haere matou na te fenua taatoa, e inaha te vai noa ra te fenua ma te peapea ore e te hau.”+

12 Na ô aˈera ïa te melahi a Iehova: “E Iehova o te mau nuu, ehia maororaa oe e ore ai e aroha ia Ierusalema e te mau oire o Iuda,+ ta oe i riri noa na e 70 matahiti te maoro?”+

13 Pahono maira Iehova i te melahi o te paraparau ra ia ˈu ma te parau maitatai e te mahanahana. 14 Na ô maira te melahi o te paraparau ra ia ˈu: “A tuô: ‘Teie ta Iehova o te mau nuu e parau ra: “E paruru vau ia Ierusalema e Ziona ma te itoito rahi.+ 15 E riri rahi to ˈu i te mau nunaa o te parahi hau noa ra.+ Mea iti hoi to ˈu riri i to ˈu nunaa,+ ua faarahi atu â râ tera mau nunaa i te ati.”’+

16 “No reira, teie ta Iehova e parau ra: ‘“E hoˈi mai au i Ierusalema ma te aroha hamani maitai,+ e e patuhia to ˈu fare i reira,”+ te parau ra Iehova o te mau nuu, “e e hutihia te hoê taura faito i nia ia Ierusalema.”’+

17 “A tuô faahou e a faaite: ‘Teie ta Iehova o te mau nuu e parau ra: “E î faahou to ˈu mau oire i te mea maitai. E tamahanahana faahou Iehova ia Ziona+ e e maiti faahou oia ia Ierusalema.”’”+

18 Hiˈo haere atura vau e ite atura vau e maha tara.+ 19 Ui atura ïa vau i te melahi o te paraparau ra ia ˈu: “Eaha teie?” Pahono maira oia: “O te mau tara teie o tei haapurara ê ia Iuda,+ Iseraela+ e Ierusalema.”+

20 Faaite maira Iehova ia ˈu e maha taata rimaî. 21 Ui atura vau: “Eaha ta ratou e haere mai ra e rave?”

Na ô maira oia: “O te mau tara teie tei haapurara ê ia Iuda e aita ˈtura te taata i faateitei faahou i te upoo. E teie mau taata, e haere mai ratou no te haamǎtaˈu i teie mau tara, no te tuparari i te mau tara o te mau nunaa, tera mau nunaa o tei faateitei i to ratou mau tara i nia i te fenua o Iuda ia purara ê to ˈna nunaa.”