Ieremia
49 No te ati Amona,+ teie ta Iehova e parau ra:
“Aita anei ta Iseraela e tamaiti?
Aita anei to ˈna e huaai?
Eaha o Malakama+ i fatu ai ia Gada?+
E eaha to ˈna mau taata e ora ˈi i te mau oire o Iseraela?”
2 “‘No reira,’ te parau ra Iehova, ‘inaha, te haere mai ra te mau mahana
E rave ai au ia faaroohia te faaararaa tamaˈi* no te aro ia Raba+ o te ati Amona.+
E riro oia ei pueraa huˈahuˈa,
E e taninahia to ˈna mau oire ati aˈe.’
‘E e fatu faahou Iseraela i te fenua ta ratou i rave mai ia ˈna,’+ te parau ra Iehova.
3 ‘A auê, e Hesebona, ua haamouhia hoi o Ai!
A tutuô, e te mau oire ati aˈe ia Raba.
A oomo i te ahu oto.
A auê e a hahaere na roto i te mau aua ofai,*
E hopoi-ê-hia hoi o Malakama,
Oia atoa ta ˈna mau tahuˈa e to ˈna huiarii.+
4 Eaha ta oe e faateoteo ra no te mau peho,
No to oe aivi e tahe noa te pape, oe te tamahine taiva,
O te tiaturi i ta oe mau pueraa taoˈa
E o te parau: “O vai te haere mai e aro ia ˈu?”’”
5 “‘E faatae au i te tahi mea riaria i nia ia oe,’ te parau ra te Arii hau ê e Fatu ra, o Iehova o te mau nuu,*
‘No ǒ mai i to ati aˈe ia oe.
E haapurarahia oe na te mau vahi atoa,
E aita hoê no te haaputuputu i tei horo ê.’”
6 “‘I muri aˈe râ, e haaputuputu vau i te ati Amona tei hopoi-tîtî-hia,’ te parau ra Iehova.”
7 No Edoma, teie ta Iehova o te mau nuu e parau ra:
“Aita faahou anei e paari i Temana?+
Aita faahou anei ta te feia maramarama e aˈoraa maitai ia horoa?
Ua pê anei to ratou paari?
8 A maue ê, a faahoˈi i muri!
A haere a parahi i te hohonuraa, outou e parahi ra i Dedana!+
E faatae hoi au i te ati i nia ia Esau
Ia tae i te taime e faautua ˈi au ia ˈna.
9 Ia tomo te feia pofai vine i ǒ oe,
Eita anei ratou e vaiiho maa vine ia ohi-haere-hia?
Ia haere mai te eiâ i te po,
E eiâ noa ratou i ta ratou e hinaaro.+
10 E vaiiho tahaa râ vau ia Esau.
E heheu vau i to ˈna mau vahi tapuniraa,
A ore atu ai oia e nehenehe e tapuni.
11 A vaiiho i ta oe mau tamarii aita e metua tane,
E e faaherehere au i to ratou ora,
E e tiaturi mai to oe mau vahine ivi ia ˈu.”
12 Teie hoi ta Iehova e parau ra: “Inaha, e inu iho â te feia tei ore i faautuahia e inu i te hapaina o te riri rahi. E vaiihohia anei ïa oe aita hoê aˈe utua? E faautuahia iho â oe, ia inu hoi oe i te reira.”+
13 “Ua horeo hoi au i to ˈu nei ora,” te parau ra Iehova, “e e riro Bozara ei riariaraa,+ ei faaoooraa, ei vahi ano e ei faainoraa. E e vai ano to ˈna mau oire atoa e a muri noa ˈtu.”+
14 E parau apî ta ˈu i faaroo ia Iehova,
Ua tonohia te tahi vea i rotopu i te mau nunaa, o te na ô ra:
“A haaputuputu mai outou pauroa e a haere mai e aro ia ˈna.
A faaineine no te aroraa.”+
15 “Inaha hoi, ua haafaufaa ore au ia oe i rotopu i te mau nunaa,
Ei mea vahavahahia i rotopu i te taata.+
16 Ua vare oe i te rûrû ta oe i faatupu na,
Oia atoa te teoteo o to oe aau,
Oe o te parahi ra i roto i te mau afâ mato,
O te ora ra i te aivi teitei roa ˈˈe.
Noa ˈtu ua hamani oe i to oe ofaaraa i nia roa mai te hoê aeto,
E haapou mai au ia oe mai reira mai,” te parau ra Iehova.
17 “E ia riro Edoma ei riariaraa.+ E hiˈo te taata atoa e haere ra na pihai iho ia ˈna ma te riaria e e hio faaooo no to ˈna mau ati atoa. 18 Mai i Sodoma e i Gomora e i te mau oire tapiri tei haamouhia,”+ te parau ra Iehova, “aita e taata e parahi i reira, e aita e taata e ora i reira.+
19 “Inaha, e taata te haere mai e aro i te mau vahi e amu ai te animara i te aihere ma te taiâ ore mai te hoê liona+ no roto i te uru aihere meumeu i pihai iho i Ioridana, no te hoê taime poto râ, e rave au ia horo ê ratou* i to ratou fenua. E e faatoroa vau i te hoê aratai ta ˈu i maiti no ˈna. O vai hoi mai ia ˈu, e o vai te aa ia ˈu? O vai te tiai mamoe te nehenehe e mau i mua ia ˈu?+ 20 No reira, a faaroo i ta Iehova i faaoti* no Edoma e ta ˈna i manaˈo no te aro i tei parahi ra i Temana:+
E aratai-ê-hia mau â te mau fanauˈa o te nǎnǎ.
No ratou aˈe, e faaano oia i to ratou parahiraa.+
21 I te haruru o to ratou toparaa, ua aueue te fenua.
E tutuô te faaroohia ra!
Ua faaroo-roa-hia te haruru i te miti Uteute.+
22 Inaha, mai te hoê aeto e maue oia i nia a titapou mai ai,+
E e hohora oia i to ˈna na pererau i nia ia Bozara.+
I tera mahana, e riro te aau o te mau aito o Edoma
Mai te aau o te hoê vahine e fanau ra.”
“Ua faahaamahia o Hamata+ e o Arapada,
E parau peapea hoi ta ratou i faaroo.
Ua riaria ratou e ua toaruaru.
E hepohepo to roto i te miti te ore e nehenehe e tamǎrû.
24 Ua toaruaru o Damaseko.
Ua huri oia no te maue ê, ua roohia râ oia i te taiâ.
Ua roohia oia i te ahoaho e te mauiui,
Mai te hoê vahine e fanau ra.
25 Mea nafea hoi aita te oire aruehia i faaruehia,
Te oire o te oaoa?
26 E topa hoi to ˈna feia apî i te mau mahora o to ˈna oire,
E e pohe pauroa te faehau i tera mahana,” te parau ra Iehova o te mau nuu.
28 No Kedara+ e te mau faatereraa arii a Hazora, ta Nebukanesa te arii o Babulonia i tairi, teie ta Iehova e parau ra:
“A tia mai, a pauma i Kedara,
E a haapohe i te mau tamarii no hitia o te râ.
29 E ravehia to ratou mau fare ie e ta ratou mau nǎnǎ,
Te ie o to ratou mau fare e ta ratou mau faufaa atoa.
E hopoi-ê-hia ta ratou mau kamela,
E e tuôhia ratou: ‘E mehameha na te mau vahi atoa!’”
30 “A maue ê, a horo ê i te atea!
A haere a parahi i te hohonuraa, outou e parahi ra i Hazora,” te parau ra Iehova.
“E ravea hoi ta Nebukanesa te arii o Babulonia i feruri no te aro ia outou,
E opuaraa ta ˈna i manaˈo no te aro ia outou.”
31 “A tia mai, a pauma e aro i te nunaa e parahi hau ra,
E parahi ra ma te taiâ ore!” te parau ra Iehova.
“Aita to ˈna e uputa e e raau tarava. E ora noa ratou o ratou anaˈe.
32 E riro ta ratou mau kamela ei taoˈa haruhia,
E e haruhia ta ratou rahiraa animara.
E haapurara vau ia ratou i tera e tera mataˈi,*
Ratou e tâpû ra i to ratou rouru tae roa i te aoao o te upoo,+
E e faatae mai au i to ratou ati na te mau vahi atoa,” te parau ra Iehova.
33 “E e riro o Hazora ei tapuniraa no te urî taehae,
Ei vahi ano e a muri noa ˈtu.
Aita e taata e parahi i reira,
E aita e taata e ora i reira.”
34 Teie te parau a Iehova ia Ieremia te peropheta no nia ia Elama+ i te haamataraa o te faatereraa a Zedekia+ te arii o Iuda: 35 “Teie ta Iehova o te mau nuu e parau ra: ‘E ofati au i te fana a Elama,+ te tumu* o to ratou puai. 36 E faatae au i nia ia Elama i na mataˈi e maha no ǒ mai i na poro e maha o te raˈi, e e haapurara vau ia ratou i taua na mataˈi e maha ra. E haapurarahia to Elama na te mau nunaa atoa, aita e faataaraa.’”
37 “E haapurara vau i te ati Elama mai mua mai i to ratou mau enemi e mai mua mai i tei imi ra e rave i to ratou ora. E e faatae au i te ati i nia ia ratou, to ˈu riri ura,” te parau ra Iehova. “E e faatae au i te ˈoˈe e aˈuaˈu ia ratou e mou roa ˈtu ai ratou.”
38 “E e tuu vau i to ˈu terono i Elama,+ e e haapohe au i te arii e te huiarii no reira,” te parau ra Iehova.
39 “I te pae hopea râ o te mau mahana, e haaputuputu vau i te mau tîtî o Elama,” te parau ra Iehova.