Ieremia
38 Tera râ, faaroo aˈera Sephatia te tamaiti a Matatana, Gedalia te tamaiti a Pasura, Iukala+ te tamaiti a Selemia e Pasura+ te tamaiti a Malakia i to Ieremia parauraa i te nunaa taatoa: 2 “Teie ta Iehova e parau ra: ‘Te taata o te faaea noa i roto i teie oire, e pohe ïa i te ˈoˈe, te oˈe e te maˈi pee.*+ Area te taata o te tuu ia ˈna i* te mau Kaladaio, e ora noa ïa. O to ˈna ora te taoˈa haruhia* e e ora oia.’+ 3 Teie ta Iehova e parau ra: ‘E tuuhia mau â teie oire i te nuu a te arii o Babulonia, e e haru oia i te reira.’”+
4 Na ô atura te huiarii i te arii: “A haapohe na i teie taata,+ na roto hoi i tera mau huru parau e faatoaruaru ai oia i* te mau faehau e toe ra i roto i teie oire, e oia atoa te nunaa taatoa. Te imi ra hoi teie taata, eiaha te hau o teie nunaa, to ratou râ ati.” 5 Pahono maira te arii Zedekia: “Inaha, tei to outou rima ra oia, eita hoi ta te arii e nehenehe e tapea ia outou.”
6 Rave ihora ïa ratou ia Ieremia e huri ihora ia ˈna i roto i te tura pape a Malakia te tamaiti a te arii, to roto hoi i te Aua tiairaa.+ Ua haapou ratou ia Ieremia i te taura. Aita râ e pape to roto i te tura, e vari anaˈe, e haamata ihora Ieremia i te mure i roto i te vari.
7 Faaroo ihora Ebeda-meleka+ te taata Etiopia, e tia mana* i te aorai* o te arii, e ua tuu ratou ia Ieremia i roto i te tura pape. Te parahi ra hoi te arii i te Uputa o Beniamina.+ 8 Haere ihora ïa Ebeda-meleka i rapae i te aorai* o te arii e paraparau i te arii, a na ô ai: 9 “E to ˈu fatu te arii, mea ino ta taua mau taata ra i rave ia Ieremia te peropheta! Ua huri ratou ia ˈna i roto i te tura pape, e e pohe oia i reira no te poia, aita hoi e faraoa faahou i roto i te oire.”+
10 Faaue ihora ïa te arii ia Ebeda-meleka te taata Etiopia: “A rave na muri ia oe e 30 tane i ǒ nei, e a huti mai ia Ieremia te peropheta i rapae i te tura pape hou oia a pohe ai.” 11 Rave ihora ïa Ebeda-meleka i na tane na muri ia ˈna, e tomo ihora i roto i te aorai* o te arii i te tahi vahi i raro aˈe i te vairaa taoˈa.+ I reira rave aˈera ratou i te tahi mau ahu rii mutumutu tahito e huˈahuˈa ahu tahito, e haapou ihora i te reira i te taura ia Ieremia ra i roto i te tura pape. 12 E parau atura Ebeda-meleka te taata Etiopia ia Ieremia: “A tuu na i te mau ahu rii mutumutu e huˈahuˈa ahu i raro aˈe i to oe ee e te taura.” Na reira ihora Ieremia, 13 e huti maira ratou ia Ieremia i te taura i rapae i te tura pape. E faaea noa ˈtura Ieremia i roto i te Aua tiairaa.+
14 Faaue ihora te arii Zedekia ia tiihia e ia arataihia mai Ieremia te peropheta ia ˈna ra i te toru o te tomoraa, e vai ra i roto i te hiero* o Iehova, e na ô atura te arii ia Ieremia: “E ohipa ta ˈu e ani ia oe. Eiaha oe e huna i te tahi parau ia ˈu.” 15 Na ô maira Ieremia ia Zedekia: “Ia parau vau ia oe, e haapohe mau â oe ia ˈu. E ia horoa ˈtu vau i te tahi aˈoraa, eita oe e faaroo ia ˈu.” 16 Horeo omoˈe ihora ïa te arii Zedekia ia Ieremia, a na ô ai: “Te horeo nei au i te ora o Iehova, o tei horoa mai i teie ora, eita vau e haapohe ia oe, e eita vau e tuu ia oe i tera mau taata o te imi ra i te rave i to oe ora.”
17 Na ô maira Ieremia ia Zedekia: “Teie ta Iehova te Atua o te mau nuu,* te Atua o Iseraela, e parau ra: ‘Ia tuu oe ia oe i te huiarii a te arii o Babulonia, e faahereherehia to oe ora e eita teie oire e taninahia. E faahereherehia oe e to oe utuafare.+ 18 Ia ore râ oe e tuu ia oe* i te huiarii a te arii o Babulonia, e tuuhia teie oire i te mau Kaladaio e e tanina ratou i te reira,+ e eita oe e ora ˈtu i to ratou rima.’”+
19 Na ô atura te arii Zedekia ia Ieremia: “Te mǎtaˈu nei au i te ati Iuda tei horo i ǒ te mau Kaladaio, inaha ia tuu-noa-hia ˈtu vau ia ratou ra, e nehenehe ratou e rave ino ia ˈu.” 20 Na ô maira râ Ieremia: “Eita oe e tuuhia ia ratou ra. A faaroo na i te reo o Iehova ma te rave i ta ˈu e parau ia oe. E maitai ïa oe e e tamau noa oe* i te ora. 21 Ia ore râ oe e tuu ia oe* ia ratou ra, teie ta Iehova i faaite mai ia ˈu: 22 Inaha, pauroa te vahine tei faaea noa i roto i te aorai* o te arii o Iuda, te arataihia ra ïa i te huiarii a te arii o Babulonia,+ e te parau ra taua mau vahine ra:
‘Ua haavarevare te mau tane ta oe i tiaturi* ia oe e ua pau oe.+
Ua haamure ratou i to oe avae i roto i te vari.
I teie nei, ua otohe ratou i muri.’
23 E pauroa ta oe vahine faaipoipo e ta oe tamaiti te arataihia ra i ǒ te mau Kaladaio e eita oe e ora ˈtu i to ratou rima, e haruhia râ oe e te arii o Babulonia,+ e no oe aˈe e taninahia ˈi teie oire.”+
24 Na ô atura Zedekia ia Ieremia: “Eiaha oe e faaite i teie mau parau i te tahi taata, ia ore oe ia pohe. 25 E ia faaroo noa ˈtu te huiarii e ua paraparau vau ia oe e ia haere noa mai ratou e ani ia oe: ‘A faaite mai na eaha ta oe i parau i te arii. Eiaha oe e huna i te tahi parau ia matou, e eita matou e haapohe ia oe.+ Eaha ta te arii i parau ia oe?,’ 26 e pahono ïa oe ia ratou: ‘Ua ani au i te arii eiaha e faahoˈi ia ˈu i te fare o Iehonatana, a pohe au i ǒ.’”+
27 I muri iho, haere maira pauroa te huiarii ia Ieremia ra e uiui maira ia ˈna. Faaite atura Ieremia ia ratou pauroa ta te arii i faaue ia ˈna e parau. Aita ˈtura ratou i paraparau faahou ia ˈna, aita hoi hoê aˈe i faaroo i ta raua aparauraa. 28 Faaea noa ihora Ieremia i roto i te Aua tiairaa+ tae roa i te mahana i haruhia ˈi Ierusalema. To reira â oia i to Ierusalema haruraahia.+