Ieremia

I HAAVAREHIA IEREMIA I TAPEAHIA ˈI I ROTO I TE TAPEARAA RA.

38 Ua faaroo Sephatia a Matana, e Gedalia a Pasura, e Iukala a Selemia, e Pasura a Malekia, i te mau parau ta Ieremia i mataro i te parau i te taata atoa ra, i te na ôraa e, Te parau maira Iehova, 2 O tei toe i roto i teie nei oire, e pohe ïa i te ˈoˈe, e te poia, e te maˈi: o tei haere ra i ǒ te Kaladaio ra, e ora ïa; e riro hoi to ˈna ora ei taoˈa no ˈna, e ora ïa oia. 3 Te na ô maira Iehova, E riro mau teie nei oire i te rima o te nuu a te arii o Babulonia, e pau ïa ia ˈna. 4 Ua na ô atura te pǔpǔ arii atoa ra i taua arii ra, Ia pohe atu teie nei taata e tia ˈi, ta matou ïa parau ia oe, no te mea no ˈna i paruparu ai te rima o te feia tamaˈi e toe i roto i teie nei oire, e te rima atoa o te taata atoa nei, oia i na reira i te parauraa mai: aore teie nei taata i imi i te maitai no teie nei feia, o te ino râ. 5 Ua parau maira taua arii ra o Zedekia, Inaha, tei to outou rima; aita hoi a te arii parau ia etaeta outou. 6 Ua rave ihora ratou ia Ieremia, e ua huri atura ia ˈna i roto i te apoo i ǒ te tamaiti a te arii ra i ô Malekia, i te aumoa o te tapearaa ra; i tataurahia Ieremia e ratou i te tuuraa i raro ra: e aore e pape i roto i taua apoo ra, o te vari anaˈe râ, mairi ihora Ieremia i raro i taua vari ra.

7 Ite aˈera te ati Kusa ra o Ebeda-meleka, e eunuka i roto i te fare o taua arii ra, e ua huri ratou ia Ieremia i raro i te apoo; te parahi noa ra te arii i te uputa o Beniamina ra; 8 ua haere ihora Ebeda-meleka i rapae au i taua fare o te arii ra, e ua parau atura i te arii, na ô atura, 9 E tau fatu, e te arii, hamani ino to teie nei feia i te peropheta nei ia Ieremia, tei hurihia e ratou i roto i te apoo: e pohe roa hoi oia i reira i te poia, aita ˈtura o te oire nei e maa. 10 Ua faaue atura te arii ia Ebeda-meleka ati Kusa ra, na ô atura, E aratai atoa oe i te taata ia toru aˈe ahuru, a rave ai i taua peropheta ra ia Ieremia e iriti mai i rapae, a pohe oia. 11 Ua rave atura Ebeda-meleka i taua mau taata ra, haere atura i roto i te fare o te arii ra, i raro aˈe i te piha taoˈa ra, ua rave ihora i te ahu rii motumotu e te huˈahuˈa, e ua tataura ihora i te tuuraa i raro ia Ieremia i roto i te apoo ra. 12 Ua parau atura Ebeda-meleka ati Kusa ra ia Ieremia, A tuu na i tera ra mau ahu rii motumotu huˈahuˈa i raro aˈe i to ee ra, i raro aˈe i te taura ra. Ua na reira ˈtura Ieremia. 13 Ua rave ihora ratou ia Ieremia ua huti aˈera i nia i taua taura ra, iriti aˈera ia ˈna i nia mai roto mai i taua apoo ra: parahi noa ihora Ieremia i roto i te aumoa i taua tapearaa ra.

14 Ua tono aˈera te arii ra o Zedekia i te vea, e ua aratai maira i te peropheta ra ia Ieremia ia ˈna ihora, i roto i te toru o te tomoraa, i roto i te fare o Iehova. Ua parau maira te arii ia Ieremia ra, Teie au a ui ia oe i ta ˈu nei uiraa; eiaha oe e huna ia ˈu. 15 Ua parau atura Ieremia ia Zedekia, Ia faaite atu vau ia oe ra, e ore anei oe e taparahi mai ia ˈu? e ia aˈo atu vau ia oe ra, e ore oe e faaroo mai ia ˈu. 16 Ua tǎpǔ huna noa ihora te arii ra o Zedekia ia Ieremia, na ô atura, Te ora ra Iehova tei hamani ia tâua nei, e ore au e taparahi ia oe, e ore hoi au e tuu atu ia oe i te rima o teie nei mau taata, tei titau mai ia oe ia pohe. 17 Ua parau atura Ieremia ia Zedekia, Te na ô maira te Atua sabaota ra, o Iehova, te Atua o Iseraela, Ia tia ia oe i te haere atu i te mau arii i ǒ te arii o Babulonia, e ora oe i reira, e ore hoi teie nei oire e ama i te auahi i reira; e ora hoi oe, e to fetii atoa ra; 18 ia ore râ ia tia ia oe ia haere atu i te mau arii i ǒ te arii o Babulonia, e tuuhia teie nei oire i reira i te rima o te Kaladaio, e na ratou e tutui i te auahi; e ore atoa hoi oe iho e ora i to ratou rima. 19 Ua parau maira te arii ra o Zedekia ia Ieremia, te mǎtaˈu nei au i te mau ati Iuda i amaha e ua reva ˈtura i ǒ te Kaladaio, o te tuuhia vau e ratou i to ratou ra rima, e o te vahavahahia vau e ratou. 20 Ua parau atura Ieremia, E ore ratou e tuu ia oe. E faaroo mai na oe i te reo o Iehova ta ˈu e parau atu ia oe nei, ia maitai hoi oe ra, e ia ora to varua. 21 Ia ore râ ia tia ia oe ia haere, teie ta Iehova parau i faaite mai ia ˈu nei: 22 A hiˈo na i te mau vahine i toe i roto i te fare o te arii o Iuda, e aratai-atoa-hia mai ïa i te mau arii i ǒ te arii o Babulonia, e na ô mai hoi taua mau vahine ra, Na to mau hoa here ra oe i patiatia, e ua tupu ta ratou parau ia oe, ua tuu ratou i to avae i raro i te vari ra e ua mau, e ua pahee tia aˈenei ratou i muri. 23 E aratai mai hoi ratou i to mau vahine, e to mau tamarii i te Kaladaio; e ore atoa oe iho e ora i to ratou rima, e noaa râ oe i te rima o te arii o Babulonia, e no oe e ama ˈi teie nei oire i te auahi.

24 Ua parau maira Zedekia ia Ieremia ra, Eiaha roa teie nei parau e faaitehia i te taata atoa nei, e e ore hoi oe e pohe. 25 Ia ite râ te mau arii nei, e i paraparau noa na vau ia oe, e ia haere mai ratou ia oe ra, e ia parau mai e, E faaite mai ia matou i ta oe parau i te arii ra, eiaha e hunahia, e ore hoi oe e pohe ia matou nei; e ta te arii hoi i parau mai ia oe ra: ei reira oe e parau atu ai ia ratou, 26 I tuu auraro noa ˈtura vau i ta ˈu hinaaro i te aro o te arii ra, e eiaha oia e faahoˈi ia ˈu i te fare o Ionatana, e ia pohe noa ˈtu vau i reira. 27 Ua haere anaˈe maira te mau arii ia Ieremia ra, e ua ui maira ia ˈna; e ua parau atura oia, i ta te arii i parau mai ia ˈna ra. Aita aˈera ratou i parau faahou mai, aore hoi ta raua pararauraa i itea. 28 Parahi noa ˈtura Ieremia i roto i te aumoa i taua tapearaa ra, e tae noa ˈtura i te mahana i pau ai Ierusalema, e i reira hoi oia i taua pauraa o Ierusalema ra.