Ieremia

28 I taua noa matahiti ra, i te omuaraa o te faatereraa a Zedekia+ te arii o Iuda, i te maha o te matahiti, i te pae o te avaˈe, parau maira te peropheta Hanania te tamaiti a Azura no Gibeona+ ia ˈu i roto i te fare o Iehova i mua i te mau tahuˈa e te mau taata atoa: 2 “Teie ta Iehova o te mau nuu,* te Atua o Iseraela, e parau ra: ‘E ofati au i te zugo a te arii o Babulonia.+ 3 I roto e piti matahiti, e faahoˈi mai au i teie vahi pauroa te taihaa o te fare o Iehova ta Nebukanesa te arii o Babulonia i rave i teie vahi a hopoi atu ai i Babulonia.’”+ 4 “‘E e faahoˈi mai au i teie vahi ia Iekonia+ te tamaiti a Iehoiakima,+ te arii o Iuda, e pauroa to Iuda tei hopoi-ê-hia i Babulonia,’+ te parau ra Iehova, ‘e ofati hoi au i te zugo a te arii o Babulonia.’”

5 Paraparau atura Ieremia te peropheta ia Hanania te peropheta i mua i te mau tahuˈa e te mau taata atoa e tia ra i roto i te fare o Iehova. 6 Parau ihora Ieremia te peropheta: “Amene!* Ia na reira Iehova! Ia faatupu Iehova i ta oe mau parau i tohu, a faahoˈi mai ai mai Babulonia mai i teie vahi i te mau taihaa o te fare o Iehova e te feia atoa tei hopoi-ê-hia! 7 A faaroo na râ i teie poroi ta ˈu e faaite ia oe e i te nunaa taatoa. 8 Mea maoro aˈenei, i tohu na te mau peropheta na mua ˈˈe ia ˈu e na mua ˈˈe ia oe no nia e rave rahi fenua e faatereraa arii puai, e tupu te tamaˈi, te ati e te maˈi pee.* 9 Ia tohu te tahi peropheta i te hau e ia tupu te parau a taua peropheta ra, i reira e itehia ˈi e mea tonohia mau â taua peropheta ra e Iehova.”

10 Rave ihora Hanania te peropheta i te raau zugo mai nia mai i te aˈî o te peropheta Ieremia e ofati ihora.+ 11 E parau atura Hanania i mua i te taata atoa: “Teie ta Iehova e parau ra: ‘Mai teie au ia ofati i te zugo ta Nebukanesa te arii o Babulonia i tuu i nia i te aˈî o te mau nunaa atoa i roto e piti matahiti.’”+ E reva ˈtura Ieremia te peropheta.

12 I muri iho i to Hanania te peropheta ofatiraa i te raau zugo mai nia mai i te aˈî o Ieremia te peropheta, tae maira teie poroi a Iehova ia Ieremia: 13 “A haere a parau ia Hanania: ‘Teie ta Iehova e parau ra: “E zugo raau ta oe i ofati,+ ei mono râ, e zugo auri ta oe e hamani.” 14 Teie hoi ta Iehova o te mau nuu, te Atua o Iseraela, e parau ra: “E zugo auri ta ˈu e tuu i nia i te aˈî o teie mau nunaa atoa ia tavini ratou ia Nebukanesa te arii o Babulonia, e ia tavini iho â ratou ia ˈna.+ Tae noa ˈtu te mau animara oviri o te fenua ta ˈu e horoa ˈtu ia ˈna.”’”+

15 Parau atura Ieremia te peropheta ia Hanania+ te peropheta: “A faaroo na e Hanania! Aita Iehova i tono ia oe, ua turai râ oe i teie nunaa ia tiaturi i te haavare.+ 16 Teie ïa ta Iehova e parau ra: ‘Inaha, e faaore au ia oe mai nia i te fenua. E pohe oe i teie matahiti, ua turai hoi oe i te taata ia orure hau ia Iehova.’”+

17 Pohe atura Hanania te peropheta i taua matahiti ra, i te hitu o te avaˈe.