Ieremia

27 I te omuaraa o te faatereraa a Iehoiakima te tamaiti a Iosia, te arii o Iuda, tae maira teie parau a Iehova ia Ieremia: 2 “Teie ta Iehova i parau ia ˈu: ‘A hamani i te taura e te raau zugo, e a tuu i te reira i nia i to aˈî. 3 I muri iho, a hopoi i te reira i te arii o Edoma,+ te arii o Moabi,+ te arii o te ati Amona,+ te arii o Turia+ e te arii o Sidona+ na roto i te mau vea tei haere mai i Ierusalema ia Zedekia ra te arii o Iuda. 4 A parau ia ratou ia horoa i teie faaueraa i to ratou mau arii:

“‘“Teie ta Iehova o te mau nuu,* te Atua o Iseraela, e parau ra, teie ta outou e parau i to outou mau arii: 5 ‘Na ˈu i hamani i te fenua, te huitaata e te mau animara e vai ra i nia i te fenua i to ˈu puai rahi e to ˈu rima faatorohia, e ua horoa vau i te reira i te taata atoa ta ˈu i hinaaro.*+ 6 E i teie nei, ua tuu vau i tera mau fenua atoa i te rima o ta ˈu tavini o Nebukanesa+ te arii o Babulonia. Tae noa ˈtu te mau animara oviri o te fenua ta ˈu i horoa ˈtu no te tavini ia ˈna. 7 Pauroa te nunaa te tavini ia ˈna, ta ˈna tamaiti e ta ˈna mootua tae roa i te taime e hiˈa ˈi to ˈna iho nunaa,+ i te taime e faariro ai e rave rahi nunaa e arii rahi ia ˈna ei tîtî no ratou.’+

8 “‘“‘Ia ore te tahi nunaa aore ra faatereraa arii e hinaaro e tavini ia Nebukanesa te arii o Babulonia e e tuu i to ratou aˈî i raro aˈe i te zugo a te arii o Babulonia, e faautua vau i taua nunaa ra i te ˈoˈe,+ te oˈe e te maˈi pee,’* te parau ra Iehova, ‘haapao mou roa ratou ia ˈu i te rima o Nebukanesa.’

9 “‘“‘No reira, eiaha e faaroo i ta outou mau peropheta, taata peu hiˈohiˈo, taata moemoeâ, taata peu manamana e tahutahu, o te parau nei ia outou: “Eita outou e tavini i te arii o Babulonia.” 10 E haavare hoi ta ratou e tohu nei ia outou, ia hopoi-ê-roa-hia outou i to outou fenua, ia haapurara vau ia outou e ia mou outou.

11 “‘“‘Te nunaa râ o te tuu i to ratou aˈî i raro aˈe i te zugo a te arii o Babulonia a tavini atu ai ia ˈna, e vaiiho ïa vau ia ratou ia faaea noa* i to ratou fenua,’ te parau ra Iehova, ‘no te faaapu i te reira e no te parahi i reira.’”’”

12 Tera atoa ta ˈu i parau ia Zedekia+ te arii o Iuda, a na ô ai: “A tuu i to outou aˈî i raro aˈe i te zugo a te arii o Babulonia e a tavini ia ˈna e to ˈna nunaa, e ora noa ïa outou.+ 13 Eaha hoi oe e to oe nunaa e pohe ai i te ˈoˈe,+ te oˈe+ e te maˈi pee,+ mai ta Iehova i parau no te nunaa o te ore e tavini i te arii o Babulonia? 14 Eiaha e faaroo i te mau parau a te mau peropheta o te parau nei ia outou: ‘Eita outou e tavini i te arii o Babulonia,’+ no te mea e haavare ta ratou e tohu nei ia outou.+

15 “‘Aita hoi au i tono ia ratou,’ te parau ra Iehova, ‘e haavare râ ta ratou e tohu nei i to ˈu iˈoa, ia haapurara hoi au ia outou, a mou atu ai outou, outou e te mau peropheta e tohu nei ia outou.’”+

16 E ua parau vau i te mau tahuˈa e i teie nunaa taatoa: “Teie ta Iehova e parau ra: ‘Eiaha e faaroo i te mau parau a ta outou mau peropheta o te tohu nei ia outou: “Inaha, fatata roa te mau taihaa o te fare o Iehova i te faahoˈihia mai Babulonia mai!”+ E haavare hoi ta ratou e tohu nei ia outou.+ 17 Eiaha e faaroo ia ratou. A tavini i te arii o Babulonia, e ora noa ïa outou.+ Eaha hoi teie oire e riro ai ei vahi ano? 18 Mai te peu râ e peropheta iho â ratou e mai te peu tei ia ratou ra te parau a Iehova, ia taparu na ïa ratou ia Iehova o te mau nuu ia ore te mau taihaa e toe ra i roto i te fare o Iehova, i roto i te aorai* o te arii o Iuda e i Ierusalema ia hopoihia i Babulonia.’

19 “Teie hoi ta Iehova o te mau nuu e parau ra no nia i te mau pou,+ te Miti,*+ te mau pereoo*+ e te mau taihaa e toe ra tei vaiihohia i roto i teie oire, 20 ta Nebukanesa te arii o Babulonia i ore i rave i to ˈna hopoi-ê-raa ia Iekonia te tamaiti a Iehoiakima, te arii o Iuda, mai Ierusalema i Babulonia, oia atoa pauroa te huimana o Iuda e o Ierusalema,+ 21 oia mau, teie ta Iehova o te mau nuu, te Atua o Iseraela, e parau ra no nia i te mau taihaa tei vaiihohia i roto i te fare o Iehova, i roto i te aorai* o te arii o Iuda e i Ierusalema: 22 ‘“I Babulonia te reira e hopoihia ˈi,+ a vai atu ai i reira tae roa i te mahana e haapao atu ai au,” te parau ra Iehova. “I reira vau e rave mai ai e e faahoˈi mai ai i te reira i teie vahi.”’”+