Samueri Wokutanga

27 Hino Dhavhidhi wakati mu mwoyo make: “Zuwa rimweni Sauri ucandiuraya. Zviri nani kuti nditizire ku nyika yo Afirisitiya; hino Sauri ucaima kundipsvaka mu nharaunda yese ye Israeri, uye inini ndicapukunyuka mu nyara dzake.” 2 Ngokudaro, Dhavhidhi no anarume ake 600 aainga anawo akaenda kuna Akishi mwana wa Maoki, mambo we Gati. 3 Dhavhidhi no anarume ake, pamwepo no mhuri dzawo, akagara na Akishi ku Gati. Dhavhidhi wakatora akadzi ake airi, Ainoamu we ku Jezreeri na Abhigairi we ku Karmero, mufirhwakadzi wa Nabhari. 4 Sauri paakaziiswa kuti Dhavhidhi wainga atiza kuenda ku Gati, wakaima kumupsvaka.

5 Hino Dhavhidhi wakati kuna Akishi: “Kana imwimwi mandizwira nyasha, ndipasei mbuto ye kugara ku mutanha umweni. Ngei museenzi wenyu unodikana kugara pamwepo na imwimwi mu thaundi ra mambo?” 6 Ngokudaro, zuwa irona Akishi wakamupasa Zikragi. Ndiyo ndaa Zikragi nge ye madzimambo e Ajudha dakara nyamasi.

7 Nguwa* yakagara Dhavhidhi ku mutanha umweni we Afiristiya yakakwana kuita gore rimwe no mwedzi mirongomuna. 8 Dhavhidhi no anarume ake airhwisa Ajesuri, Ajirizi, uye Aamareki, ngokuti aigara ku mutanha waibva ku Teramu dakara ku Suri, weciteredza dakara ku nyika yo Edjipitu. 9 Paairhwisa mutanha uwona, Dhavhidhi wainga asikasii mwanarume kunyazi mwanakadzi. Waitora mabira, n’ombe, mbudzi, makamero, uye macira; pedzepo waihwirira kuna Akishi. 10 Uye Akishi paaibvunzisa kuti: “Warhwisa kupi nyamasi?” Dhavhidhi waidaira kuti: “Katemaidumba* ke Djudha” kana kuti “Katemaidumba ke mutanha we Adjerameeri” kana kuti “Katemaidumba ke mutanha we Akeneti.” 11 Dhavhidhi wainga asikazwiri usisi anarume kana anakadzi kuti asatorhwe kuendeswa ku Gati, ngokuti iyena waiti: “Awona angazondidudzira, ecibhuya zvese zvandaita.’” (Ndizvona zvaaiita pa nguwa yese yaakararama ku mutanha umweni we Afiristiya.) 12 Ngokudaro, Akishi waitendera zvaaibvunzwa na Dhavhidhi uye wairangarira kuti: ‘Zvezvirokwazvo, iyena uri kuzondwa no* anhu ake Aisraeri; parizvino iyena ucagara museenzi wangu nguwa dzese.’