Samueri Wokutanga

25 Mumasure me kacinguwa, Samueri wakafa; uye Aisraeri ese akaungana kuti amuceme uye akamukotsa dhuze no ku nyumba kake ku Ramaa. Hino Dhavhidhi wakaenda ku renje re Parani.

2 Ku Maoni kainga kuno mwanarume umweni waiseenza ku Karmero. Iyena wainga akapfuma maningi; wainga ano mabira 3000 no mbudzi dzinokwana 1000, uye iyena wainga ecipungura ukuse we mabira ake ku Karmero.* 3 Mwanarumewo waizwi Nabhari, uye mukadzi wake waizwi Abhigairi. Mukadzi wake wainga akangwara uye akarungama, asi mwamunewo mwana wa Karebhe, wainga ano hasha, uye wainga akashata mwoyo. 4 Paainga ari ku renje, Dhavhidhi wakazwa kuti Nabhari wainga ecipungura ukuse we mabira ake. 5 Hino Dhavhidhi wakatuma anarume ake gumi kuna Nabhari, uye wakaabvunza kuti: “Kwidzai dakara ku Karmero, kana mukagumira Nabhari, mubvunzisei mu zina rangu kuti anotamba here. 6 Hino mubvunzei kuti: ‘Tenzi, raramai ke nguwa yakareba uye zvese ngazvimuhambirei zvakanaka* ku nyumba yenyu uye ku zvese zvamunazvo. 7 Ndazwa kuti imwimwi muri kupungura ukuse we mabira enyu. Aushi enyu paainga ana isusu, atizi kuaita zvakashata, uye awona aazi kushoterhwa no ciro pa nguwa yaainga ari ku Karmero. 8 Bvunzisai aseenzi enyu, uye awona acamubvunzai. Aseenzi angu ngaazwirhwe nyasha na imwimwi, ngokuti tauya mu nguwa ye mupfaro.* Ndapota, pasai aseenzi enyu uye mwana wenyu Dhavhidhi ciro cipi haco camunaco.’”

9 Ngokudaro, anarume a Dhavhidhi akaenda uye akabvunza masoko ese a Dhavhidhi kuna Nabhari. Paakapedza, 10 Nabhari wakabvunza aseenzi a Dhavhidhi kuti: “Dhavhidhi ndiani, uye mwana wa Djesee ndiani? Mazuwa ano kuno aseenzi akawanda ari kutiza madzitenzi awo. 11 Ngei inini ndecidikana kutora pau yangu, mvura yangu uye nyama yandauraira anarume ari kupungura ukuse we mabira angu, kuti ndipase anarume andisikazii kaari kubva?”

12 Ngokudaro, anarume a Dhavhidhi akahwirira uye akamupanganidzira zvese zvaainga abvunzwa na Nabhari. 13 Dhavhidhi wakabvunza anarume ake nokukasika kuti: “Kandai masupada enyu mu zvihunu!” Hino ese akakanda masupada awo mu zvihunu zvawo, uye Dhavhidhi wakakandawo supada yake mu cihunu cake. Anarume angakwana kuita 400 akaenda na Dhavhidhi, asi 200 akasara ecionerera mitoro.

14 Pa nguwa iyona ii, umwe we aseenzi wakabvunza Abhigairi mukadzi wa Nabhari kuti: “Dhavhidhi watuma anhu kubva ku renje kuti akomborere tenzi wedu, asi iyena waatuka. 15 Anarume aya akatibata zvakanaka maningi. Awona aazi kumbotiitira zvakashata, uye pa nguwa yatainga tinawo ku munda, apana catakashoterhwa naco. 16 Usiku no masikati awona ainga akaita hinga muru waitidziirira, pa nguwa yese yatainga tinawo teciusha mabira. 17 Zvino sanangurai zvamucaita, ngokuti zvezvirokwazvo izvi zvicaunzisira dambudziko kuna tenzi wedu uye ku nyumba yawo yese. Iyena i mwanarumwe usikabetseri, zvekutoti apana anokwanisa kureketa naye.”

18 Ngokudaro, Abhigairi nokukasika wakabata pau 200, majaro mairi makuru e vhinyu, mabira mashanu akagadzirirhwa, maseya* mashanu e tsangu dze kukangwa, mabhoro 100 e uvha dzakaoma, no mabhoro 200 e maonde akaoma uye wakazvikanda pa madhongi. 19 Hino iyena wakabvunza aseenzi ake kuti: “Tungamirai mberi kangu; uye inini ndiri kumuteerai.” Asi iyena aazi kubvunza ciro Nabhari mwamuna wake.

20 Pa nguwa yaaiteredza ari pa dhongi nge gwanza rimweni rakaigika ku dunhu, wakasongana na Dhavhidhi uye no anarume ake eciuya kaari. 21 Dhavhidhi waiti mu mwoyo make: “Azvizi kubetsera ciro kucengeta zviro zvese zve mwanarume uu ku renje. Apana ciro cake cakapsveteka, asi kunyazi zvakadaro iyena uri kuda kutsiya zvakanaka no zvakashata. 22 Mwari ngaaitire azondi a Dhavhidhi* zvimwezvo uye ngaazvitunhudzire, kana dakara mangwana macibesi ndikasiya mwanarume* umwe ari mupenyu we pa nyumba ya Nabhari.”

23 Abhigairi paakaona Dhavhidhi, wakacita nokukasika pa dhongi uye wakagodama pamberi pa Dhavhidhi ecihwarara. 24 Akahwarara pa tsoka dza Dhavhidhi, iyena wakati: “Ndaa ngaiuye kandiri tenzi wangu. Siyai kuti museenzikadzi wenyu arekete uye purutanai museenzikadzi wenyu. 25 Ndapota tenzi wangu, musapurutane zvinobhuiwa na Nabhari, mwanarume uya asikabetseri, ngokuti iyena unoita zvinoenderana no zina rake. Zina rake ndi Nabhari,* uye iyena i munhu usina nzero. Asi inini museenzikadzi wenyu, andizi kuona anarume amatuma. 26 Uye zvino tenzi wangu, na Djehovha mupenyu uye no upenyu* wenyu kamare, ndi Djehovha aita kuti imwimwi musagare no ndaa ye ngazi uye kuita unatsi* no nyara dzenyu kamare. Azondi enyu ese uye ese anopsvaka kumukuwadzai ngaaite hinga Nabhari. 27 Parizvino, pasai anarume enyu amunawo cipo ici* camagadzirirhwa no museenzikadzi wenyu. 28 Ndapota, rekererai cishaishi ce museenzikadzi wenyu, ngokuti Djehovha zvezvirokwazvo acagadzirira tenzi wangu nyumba inogara nokusikaperi, ngokuti tenzi wangu muri kurhwa hondo dza Djehovha, uye apana cakashata cakaoneka kamuri ke upenyu wenyu wese. 29 Kana munhu akamuteerai kuti aedze kubvisa upenyu* wenyu, upenyu* wenyu ucange wakacengethwa na Djehovha Mwari wenyu, asi upenyu* we azondi enyu ucakhandirhwa kure hingana buwe rinokhandirhwa no ciro ce kukhandira naco mapuwe. 30 Uye kana Djehovha akaitira tenzi wangu zviro zvese zvakanaka zvaakamugondesai uye omugadzai hingana mutungamiriri we Israeri, 31 imwimwi munonga muno hana yakacena uye munonga musina ciro ce kucinyuka mu mwoyo menyu nge ndaa ye kudurura ngazi isina ndaa, uye nge kuita unatsi* no nyara dzenyu kamare. Kana Djehovha akamuitirai zvakanaka, edzurirai museenzikadzi wenyu.”

32 Hino Dhavhidhi wakati kuna Abhigairi: “Djehovha Mwari we Israeri ngaakudzwe, uya akutuma kuti uuye koosongana na inini pa zuwa ra nyamasi! 33 Mwari ngaakukomborere nge kungwara kako! Ngaakukomborere nge kuita kuti inini ndisagare no ndaa yo ngazi pa zuwa ra nyamasi uye ndisaitewo unatsi* no nyara dzangu kamare. 34 Kudai usikazi kudaro, na Djehovha Mwari we Israeri mupenyu, uwo aita kuti ndisakuitire zvakashata, kudai iwewe usikazi kuuya nokukasika koosongana na inini, mangwana macibesi apana kunyazi mwanarume* umwe waida kusara ari mupenyu pa nyumba ya Nabhari.” 35 Ngokudaro, Dhavhidhi wakatambira zvainga zvaunziswa na Abhigairi uye wakati: “Enda kumba kako mu runyararo. Inini ndazwa zvawabhuya, uye ndicaita cikumbiro cako.”

36 Mumasure mazvo, Abhigairi wakahwirira kuna Nabhari, uye iyena wainga eciita mabiko hinga mambo pa nyumba pake. Nabhari* wainga ecipfara uye akararadza maningi. Abhigairi aazi kumubvunza ciro dakara pa zuwa rakazoteera. 37 Comacibesi, Nabhari paainga apembenuka mu doro, mukadzi wake wakamupanganidzira zvese. Hino mwoyo wa Nabhari wakaita hingana munhu wakafa uye iyena wakaomerhwa hingana buwe. 38 Mumasure me mazuwa gumi, Djehovha akauraya Nabhari.

39 Dhavhidhi paakaziya kuti Nabhari wainga afa, iyena wakati: “Djehovha ngaakudzwe, uya andidziirira pa nyaya yangu, ondinunura pa kupsverusa kaunziswa na Nabhari kandiri uye oita kuti museenzi wake asaite zviro zvakashata. Djehovha aita kuti maitiro akashata a Nabhari awhirire kaari!” Hino Dhavhidhi wakatuma atumwa kuti aende koobvunza Abhigairi kuti agare mukadzi wake. 40 Aseenzi a Dhavhidhi paakaguma kuna Abhigairi ku Karmero, akamubvunza kuti: “Dhavhidhi atituma kuti tiuye kookutora kuti ugare mukadzi wake.” 41 Ciriporipoco iyena wakahwarara uye wakati: “Murandakadzi wenyu wakagadzirira kugara museenzikadzi kuti asuke mirenje dze aseenzi a tenzi wangu.” 42 Hino Abhigairi wakagadzirira nokukasika, wakapakira pa dhongi uye eciperekedzwa no aseenzikadzi ashanu, iyena wakaenda no atumwa a Dhavhidhi uye wakagara mukadzi wake.

43 Dhavhidhi wainga akawakawo Ainoamu we ku Jezreeri, uye anakadziwo ari airi akagara akadzi ake.

44 Asi Sauri wainga apasa mwana wake Mikari, mukadzi wa Dhavhidhi, kuna Pariti mwana wa Raishi, wainga ari we ku Garimu.