Samueri Wokutanga
23 Nokuhamba ke nguwa, Dhavhidhi wakabvunzwa kuti: “Afiristiya ari kurhwisa Keira, uye ari kuba zviro ku mbuto dze kupurira.” 2 Hino Dhavhidhi wakabvunzisa Djehovha kuti: “Ndinodikana kuenda uye ndorhwisa Afiristiya aya here?” Djehovha akati kuna Dhavhidhi: “Enda, rhwisa Afiristiya uye ponesa Keira.” 3 Asi anarume a Dhavhidhi akati kaari: “Zvatiri kutothya kuno ku Djudha, kuzoti kei kana tikaenda ku Keira kuti tirhwise anyahondo e Afiristiya!” 4 Ngokudaro, Dhavhidhi wakabvunzisazve Djehovha. Uye Djehovha akamudaira kuti: “Enda; teredza wecienda ku Keira, ngokuti ndicakanda Afiristiya mu nyara dzako.” 5 Hino Dhavhidhi wakaenda no anarume ake ku Keira uye wakarhwisa Afiristiya; iyena wakarhwisa Afiristiya akawanda, wakatora mabira awo, uye wakaponesa agari e ku Keira.
6 Abhiatari mwana wa Aimereki, paakatiza kuti aende koobatana na Dhavhidhi ku Keira, wakatorawo efodhi. 7 Sauri wakaziiswa kuti: “Dhavhidhi uri ku Keira.” Hino Sauri wakati: “Mwari amukanda mu nyara dzangu,* ngokuti mu thaundi maapinda muno misuwo mikuru ino mashavhi uye aana mushobo we kutiza.” 8 Ngokudaro, Sauri wakadainzisa anyahondo* ake ese kuti aende ku hondo, kuitira kuti ateredze ku Keira uye kuti afungire Dhavhidhi no anarume ake imona. 9 Dhavhidhi paakaziya kuti Sauri waimurongera zvakashata, wakabvunza mupristi Abhiatari kuti: “Unzisa efodhi kuno.” 10 Uye Dhavhidhi wakati: “Djehovha Mwari we Israeri, museenzi wenyu wazwa kuti Sauri uri kuda kuuya kuno ku Keira kuti atsakatise thaundi nge ndaa yangu. 11 Kodi agari* e ku Keira acandikanda mu nyara dzake here? Sauri ucauyadi kamare hingana zvandazwa here? Djehovha Mwari we Israeri, ndapota dairai museenzi wenyu.” Djehovha akati: “Iyena ucauyadi.” 12 Dhavhidhi wakabvunzisa kuti: “Agari e ku Keira acakanda inini no anarume angu mu nyara dza Sauri here?” Djehovha akadaira kuti: “Acamukandai.”
13 Nokukasika, Dhavhidhi no anarume ake angakwana 600, akabuda ku Keira uye akarumbwa ecicinja mbuto ye kugara. Sauri paakaziiswa kuti Dhavhidhi wainga atiza ku Keira, aazozi kumuteera. 14 Dhavhidhi wakarumbwa ari mu mbuto dzinoshupha kuguma, ku mutanha we matunhu, ku renje ro Zifi. Sauri wairumbwa ecipsvaka Dhavhidhi, asi Djehovha aazi kumukanda mu nyara dzake. 15 Paainga ari ku renje ro Zifi ku Horesi, Dhavhidhi wakaziya kuti* Sauri wainga abuda ecipsvaka kumuuraya.
16 Hino Djonatani mwana wa Sauri, wakaenda koonana na Dhavhidhi ku Horesi, uye wakamubetsera kuti aone simba muna Djehovha. 17 Iyena wakamubvunza kuti: “Usathye, ngokuti Sauri baba angu, aakuoni. Iwewe ucagara mambo we Israeri, uye inini ndicagara wecipiri mumasure mako; Sauri baba angu, anotozviziyawo.” 18 Hino ari airi akaita citenderano pamberi pa Djehovha. Pedzepo, Djonatani wakaenda kumba uye Dhavhidhi wakarumbwa ari ku Horesi.
19 Nokuhamba ke nguwa, anarume e ku Zifi akaenda ku Jibheya uye akabvunza Sauri kuti: “Dhavhidhi wakafindara padhuze na isusu mu mbuto dzinoshupha kuguma ku Horesi, ku mutunhu we Hakira, uri katemaidumba* ke Jesimoni. 20 Kana imwimwi* mecida kuteredza meciendeyo, teredzai mambo, uye isusu ticamukanda mu nyara dzenyu.” 21 Hino Sauri wakati: “Djehovha ngaamukomborerei, ngokuti imwimwi mandizwira usisi. 22 Ndapota, endai uye edzai kuona kuti iyena wakafindara papi kamare uye kuti ndiani wamuona ikona, ngokuti ndazwa kuti iyena wakangwara maningi. 23 Psvakai kuziya mbuto dzake dzese dze kufindarira uye ndiunzisirei zvipangidzo. Hino inini ndicaenda nemwi, kana iyena ari mu nyika iyona, ndicamupsvaka pakati pe zviuru zve anhu e Djudha dakara ndamuona.”
24 Ngokudaro, awona akatungamira mberi kuenda ku Zifi osiya Sauri sure, pa nguwa yekuti Dhavhidhi uye anarume ake ainga ari ku renje re Maoni ku Arabha, katemaidumba ke Jesimoni. 25 Hino Sauri wakaenda no anarume ake kuti amupsvake. Dhavhidhi paakaziiswa, iyena wakateredza nokukasika dakara pa buwe uye wakarumbwa ari ku renje re Maoni. Sauri paakazvizwa, wakateera Dhavhidhi dakara ku renje re Maoni. 26 Sauri paakaguma ku dii rimweni ro dunhu, Dhavhidhi no anarume ake ainga ari ku dii rimweni. Dhavhidhi waitiza Sauri nokukasika, asi Sauri no anarume ake aiteera Dhavhidhi no anarume ake kuti aabate. 27 Asi mutumwa we masoko wakauya uye wakati kuna Sauri: “Uyai nokukasika, ngokuti Afiristiya ari kurhwisa nyika yedu!” 28 Ngokudaro, Sauri wakasiya kuteera Dhavhidhi uye wakaenda koorhwisa Afiristiya. Ndiyo ndaa, akadainza mbuto iyona kuti Buwe re Kuparadzanisa.
29 Hino Dhavhidhi wakabuda ipona uye wakarumbwa ari mu mbuto dzinoshupha kuguma ku Eni-gedhi.