Samueri Wokutanga
21 Nokuhamba ke nguwa, Dhavhidhi wakaenda ku Nobhi, kuno mupristi Aimereki. Paakaonana na Dhavhidhi, Aimereki wakatetemera nge kuthya, uye wakamubvunzisa kuti: “Ngei iwewe uri wega? Ngei apana munhu wauya na iwewe?” 2 Dhavhidhi wakati kuno mupristi Aimereki: “Mambo andibvunza kuti ndiende kooita ciro, asi wati: ‘Usaite kuti munhu upi hake aziye ngezve basa randiri kukutuma uye ngezve nhungamiriro dzandakupasa.’ Ndiyo ndaa, ndapangana no anarume angu kuti tionane ku mbuto imweni. 3 Zvino, kana imwimwi muno pau shanu kana ciro cipi haco, ndipasei.” 4 Asi mupristi wakati kuna Dhavhidhi: “Andina pau dzimweni, asi ndino pau cena basi; mungadzirhya, kana anarume ako asikazi kuwata no anakadzi.”* 5 Dhavhidhi wakati: “Garai henyu no cokwadi cekuti anakadzi ainga ari kure nesu hinga mazuwa amweni atinosoenda koorhwa. Kana anarume ecidikana kurumbwa akacena paanosoita mabasa anoziikanwa no amweni, zvakadini nyamasi!” 6 Ngokudaro, mupristi wakamupasa pau cena, ngokuti painga pano pau idzona basi dze mipiro, dzainga dzabviswa pamberi pa Djehovha uye pokandwa pau dzipsva pa zuwa re kubvisa pau.
7 Pa zuwa irona, umwe we aseenzi a Sauri wainga ari ipona, ngokuti wainga abvunzwa kuti agare pamberi pa Djehovha. Iyena waizwi Dhoegi Muedhomi, mutungamiriri we aushi a Sauri.
8 Hino Dhavhidhi wakabvunzisa Aimereki kuti: “Imwimwi amuna mupasha kana supada pano? Inini andizi kuunzisa supada yangu kana zviro zvangu zvokurhwa nazvo, ngokuti basa ra mambo raidikana kuizwa nokukasika maningi.” 9 Hino mupristi wakadaira kuti: “Ndino supada ya Goriyati Mufiristiya, wawakauraya uya mu Bani ra Erai. Iri pano yakapomberhwa no djira, sure ke Efodhi. Kana wecida itore, ngokuti ndiyo yoga iri pano.” Dhavhidhi wakati: “Ndipasei supada iyona, ngokuti apana imweni yakaezana nayo.”
10 Pa zuwa irona, Dhavhidhi wakaenda uye wakarumbwa ecitiza Sauri, uye pakupedzesera wakaguma ku nharaunda ya Akishi Mambo we Gati. 11 Aseenzi a Akishi akati kaari: “Uu andiepi Dhavhidhi, mambo we nyika ye Israeri? Andiepi waakaemba nge zvake anhu ecitamba, eciti:
‘Sauri wakauraya zviuru,
Uye Dhavhidhi makumi e zviuru’?”
12 Dhavhidhi wakarangarira ngezve masoko awo, uye wakatanga kuthya maningi Akishi Mambo we Gati. 13 Ngokudaro, iyena wakanyepedzera kuita benzi pamberi pawo.* Iyena waitara-tara pa misuwo mikuru uye waisiya kuti masiriri aerere dakara pa ndebvu. 14 Pakupedzesera Akishi wakati ku aseenzi ake: “Amuripi kuona kuti mwanarume uu i benzi? Ngei mamuunzisa kandiri? 15 Mapenzi andinawo aakwani here? Muri kuda kundiunzisirazve benzi rimweni? Mwanarume uu waidikana kupinda mumba mangu here?”