Samueri Wokutanga

17 Uye Afiristiya akaunganidza masurudado* awo kuti aende ku hondo. Awona akaungana ku Sokoo ye ku Djudha, uye akawaka musasa pakati pe Sokoo no Azeka, ku Efesi-dhamimu. 2 Sauri no anarume e Israeri akaungana uye akawaka musasa ku Bani re Erai, uye akagadzirira kuti arhwisane no Afiristiya. 3 Afiristiya ainga ari ku dii rimweni re dunhu, uye Aisraeri ainga ari ku dii rimweni re dunhu, uye bani rainga riri pakati pawo.

4 Hino pa musasa we Afiristiya pakabuda murhwi wainga ari shasha pa kurhwa waizwi Goriyati, we ku Gati, uye iyena wainga akareba makubhiti matanhatu no mupimo umwe we nyara yakafununguka.* 5 Iyena waipfeka kapaseti ye kobre uye cidziiriro ce pa diti cainga cino mapande e kobre. Cidziiriro ce paditi caaipfeka cairema mashekeri anokwana 5000.* 6 Iyena wainga akapfeka zve kudziirira nazvo zve kobre murenje dzake, uye wainga akathwara pfumo ye kobre ku musana kake. 7 Mubato we muti we mupasha wake wainga wakaita hingana mutanda unoseenzeswa pa kugadzira macira, uye dii rinoceka re pfumo yake ye simbi rairema mashekeri 600;* uye muthwari we zviro zvake zve kurhwa nazvo waienda mberi kake. 8 Goriyati wakaima uye wakakhuwira anyahondo e Israeri eciti: “Ngei imwimwi muri kugadzirira kurhwa? Inini andiripi Mufiristiya, uye imwimwi andimwipi aseenzi a Sauri here? Sanangurai mwanarume umwe kuti auye koorhwisana na inini. 9 Kana iyena akakwanisa kurhwisana na inini ondiuraya, isusu ticagara aranda enyu. Asi kana inini ndikamukunda uye ndomuuraya, imwimwi mucagara aranda edu uye mucatiseenzera.” 10 Mufiristiyewo wakatunhudzira eciti: “Nyamasi ndiri kushora* anyahondo e Israeri. Tumai mwanarume umwe kuti auye koorhwisana na inini!”

11 Sauri no anyahondo ese e Israeri paakazwa masoko ese e Mufiristiya uu, akathya maningi uye akanetseka.

12 Dhavhidhi wainga ari mwana we Muefrata, we ku Bheterehema re Djudha waizwi Djesee, uwo wainga ano ana asere uye mu mazuwa a Sauri, mwanarumewo wainga acembera. 13 Ana akuru atatu a Djesee ainga aenda ku hondo na Sauri. Mazina e ana atatu ainga aenda ku hondo ndi aya: Eriabhi mwana we dangwe, Abhinadhabhi mwana wecipiri, uye Samaa mwana wecitatu. 14 Dhavhidhi ndiye wainga ari mudoko, atatu akuru ainga aenda na Sauri.

15 Dhavhidhi waienda kuna Sauri uye waihwirira koousha mabira a baba ake ku Bheterehema. 16 Uye ke mazuwa 40, cemacibesi ese uye cemadekoni Mufiristiyewo waiuya uye waiima.

17 Zuwa rimweni, Djesee wakabvunza Dhavhidhi mwana wake kuti: “Ndapota, tora efa* ii ye tsangu dze kukangwa no pau idzi gumi, uye enda nazvo nokukasika kuno hama dzako ku musasa. 18 Uye tora keju* idzi gumi woenda koopasa mutungamiriri we masurudado 1000; onawo kuti hama dzako dzakadini uye unzisa cipangidzo cekuti dzinotamba.” 19 Awona ainga ana Sauri uye no anarume amweni ese e Israeri mu Bani re Erai, ecirhwisana no Afiristiya.

20 Dhavhidhi wakapurumuka comacibesi-besi uye wakasiira munhu mabira kuti aacengete. Iyena wakagadzirira uye wakaenda, hingana zvaainga abvunzwa na Djesee baba ake. Paakaguma ku musasa, anyahondo ainga ecibva ku mbuto ye kurhwira, ecikhuwa zvinothyisa. 21 Hino Aisraeri no Afiristiya akaima akaringirana kuti arhwisane. 22 Dhavhidhi wakasiya nokukasika mutoro no murindi waionerera mutoro uye wakagogoma dakara ku mbuto ye kurhwira. Paakaguma, wakabvunzisa hama dzake kuti dzinotamba here.

23 Paainga ecireketa no hama dzake, Goriyati Mufiristiya we ku Gati wainga ari shasha pa kurhwa, wakabuda pa mbuto ye kurhwira ye Afiristiya uye wakaphinda masoko amwe-amwewo aainga amboreketa, uye Dhavhidhi wakamuzwa. 24 Paakaona mwanarumewo, Aisraeri ese akathya uye akatiza. 25 Anarume e Israeri aiti: “Muri kuona mwanarume uri kuuyewo here? Iyena uri kuuya kooshora* Aisraeri. Mambo ucapasa upfumi wakawanda ku mwanarume ucamuuraya uye ucamupasawo mwana wake we mwanakadzi, uyewo ucaita kuti nyumba ya baba ake isaripe musoho upi hawo.”

26 Dhavhidhi wakabvunzisa anarume ainga ari padhuze naye kuti: “Cinyi cicapaswa mwanarume ucauraya Mufiristiya uu uye obvisa kupsveruswa kese ke Israeri? Kodi Mufiristiya iyena usikazi kuizwa ucekeri ndiani kuti ashore* anyahondo a Mwari mupenyu?” 27 Hino awona akamubvunza zviro zvimwe-zvimwezvo zvaainga ambobhuya eciti: “Izvi ndizvo zvicapaswa mwanarume ucamuuraya.” 28 Eriabhi mukoma a Dhavhidhi, paakamuzwa ecicedza no anarumewo, akanyangadzwira maningi Dhavhidhi uye akamubvunzisa kuti: “Ngei iwewe wauya kuno? Uye wasiira ani zvimabira zviya ku renje? Ndinonyasa kuziya kudzikudza kako uye marangariro akashata e mwoyo wako; iwewe wauya koona hondo basi.” 29 Dhavhidhi wakadaira kuti: “Ndaiteizve inini? Ndandoita mubvunzo basi!” 30 Hino wakaenda kuno anhu amweni woita mubvunzo umwewo, uye wakapaswa mhinduro imwe-imweyo.

31 Anhu anganani akazwa masoko a Dhavhidhi uye akaapanganidzira kuna Sauri. Nge ndaa yazvo, Sauri wakadainzisa Dhavhidhi. 32 Dhavhidhi wakabvunza Sauri kuti: “Apana anodikana kuora mwoyo* nge ndaa ye Mufiristiya uu. Inini museenzi wenyu ndicaenda uye ndicarhwisana naye.” 33 Asi Sauri wakabvunza Dhavhidhi kuti: “Iwewe aungarhwisani no Mufiristiya uu, ngokuti iwewe uciri kamurumbwana, asi iyena ndi musurudado* kubvira paainga aciri mudjaha.” 34 Dhavhidhi wakabvunza Sauri kuti: “Tenzi wangu, ndiri muushi we mabira a baba angu. Payakauya mhondoro yotora bira, uye zuwa rimweni pouya ursu yoitawo zvimwezvo, 35 ndakazviteera ndozvirhwisa uye ndakabvisa bira pa muromo pazvo. Pazvakaedza kuuya kandiri, inini ndakazvibata nge mu mutsipa,* ndakazvikuwadza uye ndozviuraya. 36 Museenzi wenyu wakambouraya mhondoro no ursu, uye ndicaita zvimwezvo no Mufiristiya asikazi kuizwa ucekeri, ngokuti iyena washora* anyahondo a Mwari mupenyu.” 37 Dhavhidhi wakatunhudzira eciti: “Djehovha akandinunura mu nyara dze mhondoro no ursu, uye acandinunurawo mu nyara dze Mufiristiya uu.” Hino Sauri wakati kuna Dhavhidhi: “Enda, uye Djehovha ngaagare na iwewe.”

38 Sauri wakasimidza Dhavhidhi macira ake e kurhwa nawo. Wakamupfekedza kapaseti mu musoro, uye wakamusimidza cidziiriro ce pa diti. 39 Dhavhidhi wakasungira supada pa macira ake uye wakaedza kuhamba asi aazi kukwanisa, ngokuti wainga asikazi kuzvidjaira. Dhavhidhi wakabvunza Sauri kuti: “Andikwanisi kuhamba no zviro izvi, ngokuti andizi kuzvidjaira.” Hino Dhavhidhi wakazvikhumura. 40 Hino iyena wakatora ndonga yake, wakasanangura mapuwe mashanu akazverera mu cimurambo uye wakaakanda mu borosa re pasta yake ye muushi. Pedzepo wakatora cekukhandira naco mapuwe,* uye wakatanga kukhwederera Mufiristiya.

41 Mufiristiya wakatanga kukhwedera dhuze na Dhavhidhi, uye muthwari we zviro zvake zve kurhwa nazvo wainga ari mberi kake. 42 Mufiristiyewo paakaona kuti Dhavhidhi wainga ari mudjaha wakapsvukirira uye uno ciimo cakanaka, wakatanga kumuseka ecimushora. 43 Mufiristiyewo wakabvunza Dhavhidhi kuti: “Kodi inini ndiri imbwa kuti uuye kandiri no cimuti?” Hino Mufiristiyewo wakatanga kutuka Dhavhidhi ecidainzira anamwari ake. 44 Iyena wakabvunza Dhavhidhi kuti: “Uya kuno, uye inini ndicapasa nyama yako ku zvinyama zvinomburuka zve kudenga uye ku zvinyama zve mushango.”

45 Dhavhidhi wakadaira Mufiristiyewo kuti: “Iwewe unouya kandiri no supada, mupasha uye pfumo, asi inini ndinouya kauri mu zina ra Djehovha we anyahondo, Mwari we anyahondo e Israeri, uya wawashora.* 46 Nyamasi kamare Djehovha acakukanda mu nyara dzangu uye inini ndicakuuraya ndogura musoro wako. Nyamasi ndicapasa mitumbi ye anyahondo e Afiristiya ku zvinyama zvinomburuka zve kudenga uye ku zvinyama zve mushango zve pa nyika. Hino anhu ese acaziya kuti muna Mwari mu Israeri. 47 Uye ese akaungana pano, acaziya* kuti Djehovha aaponesi eciseenzesa supada kana mupasha, ngokuti hondo ii nge ya Djehovha, uye iyena acakanda mwese imwimwi mu nyara dzedu.”

48 Hino Mufiristiyewo wakarumbwa ecikhwederera kuti arhwise Dhavhidhi, asi Dhavhidhi wakagogoma oenda pa mbuto ye kurhwira kuti arhwise Mufiristiyewo. 49 Dhavhidhi wakakanda nyara yake mu pasta, wakabvisa buwe uye wakarikhandira no ciro cokukhandira naco mapuwe. Buwero rakafura Mufiristiyewo, ropinda pa huma yake, uye iyena akambwera akaringira pasi. 50 Ngokudaro, Dhavhidhi wakakunda Mufiristiyewo no ciro ce kukhandira naco mapuwe uye no buwe rimwe. Dhavhidhi wakakunda Mufiristiyewo uye wakamuuraya, kunyazi wainga asina supada mu nyara. 51 Dhavhidhi wakagogoma uye wakaima pa muceto pe Mufiristiyewo. Wakavhorora supada ye Mufiristiya pa cihunu cake uye wakamuuraya, ogura musoro wake kuti agare no cokwadi cokuti wafa. Paakaona kuti musurudado wawo uno simba wainga wafa, Afiristiya akatiza.

52 Ngokudaro, anarume e Israeri uye e Djudha akatanga kukhuwa eciteera Afiristiya kubvira mu bani dakara ku musuwo mukuru we Ekroni, uye mitumbi ye Afiristiya yainga yakabararika mu gwanza re Saraimu dakara ku Gati uye ku Ekroni. 53 Mumasure me kuteera Afiristiya ke nguwa yakareba, Aisraeri akahwirira uye akatora zviro mu misasa yawo.

54 Hino Dhavhidhi wakatora musoro we Mufiristiyewo uye wakaenda nawo mu Djerusarema, asi wakakanda zve kurhwa zve Mufiristiyewo mu tenda rake.

55 Asi pa nguwa yekuti Sauri waiona Dhavhidhi ecienda kuno Mufiristiyewo, iyena wakabvunzisa Abhineri mukuru we masurudado, kuti: “Abhineri, ndiani baba e mudjaha uu?” Abhineri wakadaira kuti: “Ndinopika no upenyu wenyu* mambo wangu, kuti inini andiazii!” 56 Mambo wakati: “Psvaka kuziya kuti ndiani baba e mudjaha uu.” 57 Hino Dhavhidhi paakahwirira mumasure me kuuraya Mufiristiyewo, Abneri wakamutora oenda naye kuna Sauri uye Dhavhidhi wainga ano musoro we Mufiristiyewo mu nyara. 58 Sauri wakabvunzisa kuti: “Mudjaha wangu, iwewe uri mwana wani?” Dhavhidhi wakadaira kuti: “Ndiri mwana we museenzi wenyu Djesee, we ku Bheterehema.”