Samueri Wokutanga
16 Pakupedzesera, Djehovha akati kuna Samueri: “Ucarumbwa wakatsukwara nge ndaa ya Sauri dakara riini, nepoo inini ndamuramba hinga mambo we Israeri? Dzadza nyanga no mafuta uye enda. Inini ndicakutuma kuna Djesee we ku Bheterehema, ngokuti ndasanangura umwe we ana ake kuti agare mambo.” 2 Asi Samueri wakati: “Ndingaenda kudini? Kana Sauri akazviziya, iyena ucandiuraya.” Djehovha akadaira kuti: “Tora cin’ombe cekadzi uye bhuya kuti: ‘Ndauya koopasa cibairo kuna Djehovha.’ 3 Dainza Djesee kuti uende koopira naye cibairo; uye inini ndicakubvunza zvaunodikana kuita. Iwewe unodikana kundidzodzera uya wandicakupangidza.”
4 Samueri wakaita zvaakabvunzwa na Djehovha. Paakaguma ku Bheterehema, akuru e mu thaundi akaenda koonana naye ecitetemera nge kuthya, uye akati: “Vhakaciro yenyu ngeye runyararo here?” 5 Iyena wakadaira kuti: “Ngeye runyararo. Ndauya koopasa cibairo kuna Djehovha. Dzicenesei, uye ngatiende tese koopira cibairo.” Hino iyena wakacenesa Djesee no ana ake, uye pedzepo wakaabvunza kuti auye ku cibairo. 6 Awona paakapinda uye Samueri oona Eriabhi, iyena wakati: “Zvezvirokwazvo, uu ndiye mudzodziwa wa Djehovha.” 7 Asi Djehovha akati kuna Samueri: “Usaone zvaakaita nge cekunza kana kureba kake, ngokuti inini ndamuramba. Ngokuti Mwari aaoni hinga zvinooniwa nge munhu; munhu unoona zvinooniwa nge madziso, asi Djehovha anoona mwoyo.” 8 Hino Djesee wakadainza Abhinadhabhi uye wakaita kuti apinde ngo pamberi pa Samueri, asi iyena wakati: “Djehovha aazi kumusanangurawo.” 9 Pedzepo, Djesee wakapangidza Samaa, asi iyena wakati: “Uu andiepiwo wasanangurhwa na Djehovha.” 10 Ngokudaro, Djesee wakaita kuti ana ake anomwe apinde nge pamberi pa Samueri, asi Samueri wakati kuna Djesee: “Djehovha aazi kusanangura kunyazi umwe wawo.”
11 Pakupedzesera, Samueri wakabvunzisa Djesee kuti: “Aya ndiwo ana ese aunawo here?” Iyena wakadaira kuti: “Uripo umweni mudoko wawo; iyena uri kuusha mabira.” Hino Samueri wakati kuna Djesee: “Ita kuti auye, ngokuti atizogari kuti tirhye iyena asati aguma.” 12 Ngokudaro, wakaita kuti auye. Iyena wainga akapsvuka, madziso ake ainga akarungama, uye wainga ano ciimo cakanaka. Djehovha akati: “Purumuka umudzodze, ngokuti ndiye munhu wakhona!” 13 Hino Samueri wakabata nyanga yainga ino mafuta uye wakamudzodza pamberi pe hama dzake. Uye kubvira zuwa irona, mwiya wa Djehovha wakapasa simba Dhavhidhi. Nokuhamba ke nguwa, Samueri wakahwirira ku Rama.
14 Mwiya wa Djehovha wainga wabuda pana Sauri, uye mwiya wakashata waibva kuna Djehovha wakatanga kumutambudza. 15 Aseenzi a Sauri akati kaari: “Mwiya wakashata unobva kuna Mwari uri kumutambudzai. 16 Tapota, bvunzai aseenzi enyu ari pano kuti aende koopsvaka munhu unonyasa kuziya kuridza mutoriro. Kana mwiya wakashata unobva kuna Mwari ukauya kamuri, iyena ucauridza,* uye imwimwi mucazwa zviri nani.” 17 Ngokudaro, Sauri wakabvunza aseenzi ake kuti: “Ndapota, psvakai munhu unonyasa kuridza zvakanaka mutoriro, uye muunzisei kandiri.”
18 Umwe we abetseri ake wakati: “Ndinoziya kuti umwe we ana a Djesee we ku Bheterehema unoridza mutoriro zvakanaka, uye ndi murhwi uno ushingi uye uno simba. Iyena unoreketa zvakanaka, uno ciimo cakanaka, uye Djehovha anaye.” 19 Hino Sauri wakatuma atumwa ake kuna Djesee kuti amubvunze kuti: “Nditumire mwana wako Dhavhidhi, uri kuusha mabira.” 20 Ngokudaro, Djesee wakatora pau, cigubu ce vhinyu, mbudzi imwe ozvikanda pa dhongi, wozvitumira no mwana wake Dhavhidhi kuna Sauri. 21 Hino Dhavhidhi wakaenda kuna Sauri, uye wakatanga kumuseenzera. Sauri wakatanga kumupfarira maningi, uye iyena wakagara muthwari we zviro zvake zve kurhwa nazvo. 22 Sauri wakatumira masoko kuna Djesee ekuti: “Ndapota, siya kuti Dhavhidhi andiseenzere, ngokuti inini ndamupfarira maningi.” 23 Mwiya wakashata waibva kuna Mwari pawaiuya kuna Sauri, Dhavhidhi waitora mutoriro uye waiuridza; hino Sauri waizwa kurerukirhwa uye zviri nani, uye mwiya wakashata waibuda paari.