Samueri Wokutanga
12 Pakupedzesera, Samueri wakabvunza Aisraeri ese kuti: “Ndaita* zvese zvamakandikumbira, uye ndagadza mambo kuti amutongei. 2 Zvino, uu ndiye mambo ucamutungamirirai!* Kandiri inini, ndacembera uye tsitsi* rangu racena, uye ana angu ana imwimwi. Ndakamutungamirirai kubvira ndiciri mwana mudoko dakara nyamasi. 3 Ndiri pano. Ndipupurirei kana ndakaita zviro zvakashata pamberi pa Djehovha uye pamberi pe mudzodziwa wake: Ndiani wandakatorera n’ombe yake yo kono kana dhongi rake? Ndiani wandakatsotsa kana kumudzvinyirira? Ndakatenda kudyekerhwa ndiani kuti ndipase ndaa munhu asina ndaa? Kana ndakaita izvi, inini ndicamuhwirinzirai zviro zvese.” 4 Awona akati: “Imwimwi amuzi kutitsotsa kana kutidzvinyirira uye amuzi kutenda ciro cecibva mu nyara ye munhu upi hake.” 5 Ngokudaro, iyena wakaabvunza kuti: “Nyamasi Djehovha ndiye mupupuri, uye mudzodziwa wake ndiye mupupuri wekuti amungandipumhi pa ciro cipi haco.”* Hino awona akati: “Honde, iyena ndi mupupuri.”
6 Uye Samueri wakabvunza anhu kuti: “Djehovha, uya akaseenzesa Mozesi na Aroni uye akabvisa madzitsekuru enyu ku nyika ye Edjipitu, ndiye mupupuri. 7 Uye zvino imai pamuripopo, uye inini ndicamutongai pamberi pa Djehovha maererano no zviito zvakaizwa na Djehovha kamuri uye ku madzitsekuru enyu.
8 “Mumasure mekuti Djakobo apinda mu Edjipitu uye madzitsekuru enyu adainzira kuna Djehovha kuti aabetsere, Djehovha akatuma Mozesi na Aroni kuti abvise madzitsekuru enyu ku Edjipitu uye oaita kuti agare mu mbuto ino. 9 Asi awona akakanganwa Djehovha Mwari wawo, uye iyena akaakanda* mu nyara dza Sizera, mutungamiriri we anyahondo e Azori, mu nyara dze Afiristiya, uye mu nyara dza mambo we Moabhi, awo aakarhwisana nawo. 10 Uye akadainzira kuna Djehovha ecikumbira rubetso eciti: ‘Takashaisha, ngokuti takasiya Djehovha totanga kunamata Anabhaari uye mifanikiso ya Astoreti; zvino, tinunurei mu nyara dzo azondi edu, kuitira kuti timuseenzerei.’ 11 Hino Djehovha akatuma Jerubhaari, Bhedhani, Djefitee na Samueri uye akamununurai mu nyara dze azondi enyu ainga akamutenderedzai, kuitira kuti imwimwi murarame makanyasa kucengeteka. 12 Pamakaona kuti Naasi mambo we Aamoni wainga auya kuzomurhwisai, makarumbwa mecinditi: ‘Azvina basa! Isusu tiri kuda mambo kuti atitonge!’ kunyazi Djehovha Mwari wenyu, ari Mambo wenyu. 13 Zvino, uu ndiye mambo wamakasanangura, uya wamakandikumbira. Onai! Djehovha agadza mambo kuti amutongei. 14 Kana imwimwi mukathya Djehovha uye momuseenzera, kana mukazwira izwi rake uye motama kupandukira mitemo dza Djehovha, imwimwi kutobatanidza na mambo ucamutongai mukateera Djehovha Mwari wenyu, zvinonga zvakanaka. 15 Asi kana imwimwi mukatama kuzwira izwi ra Djehovha uye mopandukira mitemo ya Djehovha, nyara ya Djehovha icarhwisa imwimwi no madzibaba enyu. 16 Zvino, imai pamuripopo uye onai zviro zvinoshamisa zvicaizwa na Djehovha pamberi penyu. 17 Atiripi mu nguwa ye kukororhwa ke trigu here? Ndicadainzira kuna Djehovha kuti atume mheni uye no mvura; hino imwimwi mucaziya uye mucazwisisa kuti makaita cisananguro cakashata pamberi pa Djehovha nge kumukumbira mambo.”
18 Hino Samueri wakadainzira kuna Djehovha, uye Djehovha akatuma mheni no mvura pa zuwa irona, zvekuti anhu ese akathya maningi Djehovha na Samueri. 19 Uye anhu ese akabvunza Samueri kuti: “Namatirai aseenzi enyu kuna Djehovha Mwari wenyu, ngokuti atidi kufa; ngokuti tatunhudzira pa zvitema zvedu cishaishi ce kukumbira mambo.”
20 Ngokudaro, Samueri wakabvunza anhu kuti: “Musathye. Zvezvirokwazvo imwimwi maita cishaishi cakakura. Asi zvino musasiye kuteera Djehovha. Seenzerai Djehovha no mwoyo wenyu wese. 21 Musapauke meciteera zviro zvisina basa,* zvisikabetseri, uye zvisikaponesi, ngokuti azvina basa.* 22 Djehovha aazomusii nge ndaa ye zina rake guru, ngokuti Djehovha akamusanangurai kuti mugare anhu ake. 23 Kandiri inini, andizomboshaishiri Djehovha nge kutama kumuitirai munamato uye inini ndicarumbwa ndecimufundisai mu gwanza rakanaka uye re unatsi. 24 Ndinomukumbirai basi kuti muthye Djehovha, uye mumuseenzere makagondeka* no mwoyo wenyu wese; edzurirai zviro zvikuru zvaakamuitirai. 25 Asi kana mukaita zvakashata mecizviziya, imwimwi pamwepo na mambo wenyuwo, mucatsakatiswa.”