Samueri Wokutanga

11 Hino Naasi Muamoni, wakauya uye owaka musasa kuti arhwisane na Jabhesi ku Giriyadhi. Anarume ese e ku Jabhesi akabvunza Naasi kuti: “Ita citenderano na isusu uye isusu ticakuseenzera.” 2 Naasi Muamoni, wakaabvunza kuti: “Ndicaita citenderano na imwimwi, asi kana mukaita izvi: Umwe na umwe wenyu ngaaborhwe dziso rake re moko kwawo. Ndicaita izvi kuti ndipsveruse Israeri yese.” 3 Akuru e ku Jabhesi akaabvunza kuti: “Tipasei mazuwa manomwe kuti titume anhu ku nharaunda yese ye Israeri. Kana pakatama munhu acatiponesa, isusu ticadzikanda pasi penyu.” 4 Hino, atumwa akaguma ku Jibheya ya Sauri uye akabvunza anhu masoko aya, uye anhu ese akatanga kucema no izwi guru.

5 Sauri waibva ku munda ari sure ke zvipfuyo, uye Sauri wakabvunzisa kuti: “Cinyi caitika? Ngei anhu ari kucema?” Hino akamupanganidzira zvakabhuiwa no anarume e ku Jabhesi. 6 Mwiya wa Mwari wakapasa Sauri simba paakazwa ngezve masoko aya; uye iyena wakanyangadzwa maningi. 7 Hino iyena wakabata n’ombe mbiri dze kono wodzigura-gura, uye otumira ku nharaunda yo Israeri eciseenzesa atumwa kuti abhuye kuti: “Izvi ndizvona zvicaitika no n’ombe dzo uya asikazwiri Sauri uye na Samueri!” Uye kuthya Djehovha kakauira anhu ese, zvekuti ese akabuda no cinangwa cimweco.* 8 Uye Sauri wakaaerenga ku Bhezeki: Painga pano 300 000 Aisraeri uye 30 000 anarume e ku Djudha. 9 Hino akabvunza atumwa ainga auya kuti: “Bvunzai izvi ku anarume e Jabhesi ku Giriyadhi: ‘Mangwana, kana zuwa roopisa, imwimwi mucaponeswa.’” Ngokudaro, atumwa akaenda uye akabvunza izvi anarume e ku Jabhesi, uye awona akapfara maningi. 10 Hino, anarume e ku Jabhesi akabvunza Aamoni kuti: “Mangwana ticadzikanda pasi penyu, uye imwimwi mungakwanisa kuita na isusu zvese zvamunoona kuti ndizvo zvakanaka.”

11 Pa zuwa rakazoteera, Sauri wakapatsanura anarume ke matii matatu; awona akaenda dakara pakati pe musasa, pakati pe usiku* uye akarumbwa eciuraya Aamoni dakara zuwa raakupisa. Aya akasara, akabararika zvekuti apana akasara ari airi-airi. 12 Hino anhu akabvunza Samueri kuti: “Ndiani wakabhuya uya kuti: ‘Ndi Sauri ucatitongadi kamare?’ Unzisai anarume awona kuti tiauraye.” 13 Asi Sauri wakati: “Apana munhu unodikana kuuraiwa nyamasi, ngokuti nyamasi Djehovha aponesa Israeri.”

14 Pedzepo Samueri wakabvunza anhu kuti: “Ngatiende ku Jirigari kuti tinyase koopangidza kuti Sauri ndi mambo.” 15 Ngokudaro, anhu ese akaenda ku Jirigari, uye ikona akaita kuti Sauri agare mambo pamberi pa Djehovha. Akapasa zvibairo zvokuita kuti pagare no runyararo pamberi pa Djehovha, uye Sauri no anarume ese e Israeri akapemberera no mupfaro mukuru.