‘Mobɛte Ɔko Ho Nsɛmʼ

Nsɛnkyerɛwni bi de too gua sɛ, “Mehyɛɛ mʼadwuma yi ase no, bɛboro mfe 60 ni. Akokoakoko a asisi wɔ aman ahorow so a mede ɛho nsɛm ato gua no, ɛboro 40. Ɔko a ɛkɔɔ so wɔ United States ne Soviet Union ntam no sei, na m’ani tua. Ehuruwii ara na prɛko pɛ, ɛdwoe. Nanso akokoakoko a mahu no nyinaa, ebiara nni hɔ a ɛhaw adwene te sɛ nea esisii afe 2025 mu no. Nea enti a ɛte saa ne sɛ, ɔko akɛse bebree na ɛrekɔ so. Afei nso akokoakoko no mu baako mpo de, ebetumi akɔfa ɔhaw kɛse abrɛ wiase aman bebree.”—John Simpson; aman ahorow so nsɛm a BBC de to gua no, ɔno ne samufo; baabi a yɛayɛ no tuntum paa no, yɛn ara na yɛayɛ no saa.

Akokoakoko a ɛrekɔ so wɔ wiase no, ɛhaw nkurɔfo bebree. Enti asɛm a obiara rebisa ne sɛ, ‘Enti ɛbɛyɛ yiye ni?’ Dɛn na Yesu kae?

Nea Yesu kae

Nneɛma a ɛresisi nnɛ no, Yesu kaa ho asɛm too hɔ. Ɔka kyerɛɛ n’akyidifo no sɛ: “Mobɛte ɔko, ne ɔko ho nsɛm.”—Mateo 24:6.

Akokoakoko a ɛrekɔ so nnɛ no, ɛhaw adwene paa, nanso yebetumi aka sɛ akyea, nso emmui. Adɛn ntia? Efisɛ Yesu kaa sɛ, akokoakoko a ɛrekɔ so nnɛ, amane a nnipa rehu, subammɔne a nkurɔfo reda no adi, ne nneɛma a ɛtete saa no, ne nyinaa yɛ “sɛnkyerɛnne” a ɛkyerɛ sɛ “wiase yi awiei bere” adu. (Mateo 24:3; Luka 21:7) Wei kyerɛ sɛ, da bi bɛba a Yesu bɛma akokoakoko nyinaa agyae. Ɔbɛyɛ no sɛn?

Nea Yesu bɛyɛ

Yesu Kristo ne Onyankopɔn Ahenni no so Hene. Ɛrenkyɛ koraa, ɔbɛma ‘akodi agyae wɔ asaase nyinaa so.’—Dwom 46:9.

Asomdwoe a ɛbɛba wiase daakye no, kwan bɛn na ɛbɛfa so aba? Sɛ ɛba nso a, asetena bɛyɛ sɛn? Sɛ wopɛ sɛ wusua wei ho ade pii a, kenkan asɛm a yɛato din “Nea Ɛbɛma Akokoakoko Agyae.”