Hell Wɔ Hɔ Ampa? Asɛmfua Hell a Ɛwɔ Bible Ahorow Bi Mu No Kyerɛ Sɛn?

Nea Bible ka

Bible ahorow a wɔkyerɛɛ ase kɔɔ Borɔfo kasa mu a akyɛ paa te sɛ King James Version no, wɔde asɛmfua “hell” hyehyɛɛ mmeae bi. (Dwom 16:10; Asomafo Nnwuma 2:27) Sɛnea mfoni no kyerɛ no, nsɔrensɔre bebree kyerɛkyerɛ sɛ hell yɛ gya a ennum da a wɔde hyew abɔnefo. Nanso saa na Bible kyerɛkyerɛ anaa?

Nea yɛrebɛka ho asɛm

Hell yɛ baabi a nkurɔfo hu amane daa anaa?

Daabi. Nsɛmfua a wɔkyerɛɛ ase “hell” wɔ Bible nkyerɛase a akyɛ paa no bi mu no, nea hell (Hebri, “Sheol”; Greek, “Hades”) kyerɛ ara ne “Ɔdamoa,” kyerɛ sɛ, adasamma damoa. Bible kyerɛ sɛ nnipa a ɛwɔ “Ɔdamoa” mu no, wɔnni nkwa mu.

Awufo nnim biribiara enti wɔnte yaw. “Adwuma, ne adwene, ne nyansa, ne nimdeɛ, nni hell.” (Ɔsɛnkafo 9:10, Douay-Rheims Nkyerɛase) Dede biara nni hell a ɛkyerɛ sɛ Dw. 31:17 wɔn a ɛwɔ hɔ no rehu amane. Mmom nea Bible ka ne sɛ: “Ma nnebɔneyɛfo ani nwu; ma wɔnka wɔn ano ntom wɔ Ɔdamoa mu [hell, Douay-Rheims].”—Dwom 31:17; (30:18, Douay-Rheims); Dwom 115:17.
Onyankopɔn kaa sɛ bɔne akatua ne owu; wanka sɛ abɔnefo bɛkɔ Ɔbonsam gya mu. Onyankopɔn ka kyerɛɛ yɛn nana Adam sɛ, sɛ obu ne mmara so a, owu na obewu. (Genesis 2:17) Wanka hell anaa Ɔbonsam gya biara ho asɛm. Akyiri yi a Adam yɛɛ bɔne no, Onyankopɔn ma ohuu asotwe a ɛda hɔ retwɛn no. Ɔka kyerɛɛ no sɛ: “Woyɛ dɔte na dɔte mu na wobɛsan akɔ.” (Genesis 3:19) Enti wei kyerɛ sɛ, na Adam befi wiase koraa; yɛrenhu no baabiara bio. Sɛ anka Onyankopɔn de Adam bɛto Ɔbonsam gya mu a, ɔkwan biara so anka ɔbɛka. Asotwe a Onyankopɔn de ma wɔn a wɔto ne mmara no, ɔnsesaa no. Adam yɛɛ bɔne no, mfe bebree akyi, Onyankopɔn maa Bible kyerɛwfo bi kaa sɛ: “Bɔne akatua ne owu.” (Romafo 6:23) Akatua foforo biara ho nhia, efisɛ “nea wawu no, wɔde ne bɔne akyɛ no.”—Romafo 6:7.
Asɛm a nkurɔfo ka sɛ Onyankopɔn bɛyɛ nnipa ayayade wɔ ogya mu afebɔɔ no, Onyankopɔn kyi koraa. (Yeremia 32:35) Saa asɛm no ne asɛm a ɛwɔ Bible mu a ɛse “Onyankopɔn ne dɔ” no nhyia. (1 Yohane 4:8) Onyankopɔn pɛ sɛ ohu sɛ ɔdɔ a yɛdɔ no nti na yɛresom no, na ɛnyɛ suro a yesuro sɛ ɔde yɛn bɛkɔ Ɔbonsam gya mu ntia.—Mateo 22:36-38.
Apapafo kɔɔ hell. Bible ahorow a wɔde asɛmfua hell yɛ adwuma no, sɛ ɛka sɛ obi kɔ hell a, nea ɛkyerɛ ara ne sɛ onipa no kɔ ɔdamoa mu.a Wohwɛ saa Bible ahorow no mu a, wubehu sɛ na atreneefo bi te sɛ Yakob ne Hiob hwɛ kwan sɛ wɔbɛkɔ hell. (Genesis 37:35; Hiob 14:13) Wubehu mpo sɛ, bere a Yesu Kristo wui no, ɔkɔɔ hell.—Asomafo Nnwuma 2:31, 32.

Yesu mfatoho a ɛfa osikani no ne Lasaro ho no kyerɛ sɛn?

Osikani no ne Lasaro asɛm a Yesu kae no wɔ Luka 16:19-31. Saa asɛm no, ɛnyɛ biribi a esii ankasa. Ná ɛyɛ mfatoho. Mfatoho a ɛtete saa pii wɔ Bible mu. Ɛboa ma yenya afotusɛm a yɛde bɛbɔ yɛn bra, na ɛsan ma yehu Onyankopɔn adwene wɔ nneɛma ho. (Mateo 13:34) Sɛ wopɛ sɛ wote saa mfatoho yi ase yiye a, kenkan asɛm a yɛato din, “Sikani No Ne Lasaro—Na Wɔyɛ Henanom?”

Obi akɔ hell asan aba pɛn?

Aane. Bible ka nnipa nkron bi ho asɛm. Wɔwui, (Bible ahorow bi ka sɛ wɔkɔɔ hell) na akyiri yi wɔsan nyan wɔn baa nkwa mu bio.b Bere a wɔwui no, sɛ wɔkɔɔ baabi a, wɔsan bae no anka wɔbɛka. Nanso wɔn mu biara nni hɔ a ɔkae sɛ ɔkɔdaa gya mu anaa ɔkɔɔ baabi foforo biara. Adɛn ntia? Efisɛ sɛnea Bible ka no, onipa wu a na wawu. Ɔnkɔ baabiara; ɛte sɛ nea ‘wada’ hatee.—Yohane 11:11-14; 1 Korintofo 15:3-6.

a Hwɛ adaka a yɛato din “Hebri ne Greek Nsɛmfua Bi a Ɛwɔ Bible Mu.”

b Kenkan 1 Ahene 17:17-24; 2 Ahene 4:32-37; 13:20, 21; Mateo 28:5, 6; Luka 7:11-17; 8:40-56; Yohane 11:38-44; Asomafo Nnwuma 9:36-42; 20:7-12.

Bible mu nsɛm a ɛfa hell anaa ɔdamoa ho

Hiob 14:13: “O, minyae a anka wode me asie Ɔdamoa mu, [anaa “hell,” Douay-Rheims Version] . . . Minyae a, anka woahyɛ me da a wode bɛkae me!”

Nea Ɛkyerɛ: Ná ɔnokwafo Hiob nim sɛ, sɛ owu kɔ hell anaa ɔdamoa mu a, ɛyaw a ɔrefa mu no nyinaa to betwa. Ná onim nso sɛ Onyankopɔn betumi anyan no afi ɔdamoa mu aba nkwa mu bio.

Dwom 145:20: “Yehowa wɛn wɔn a wɔdɔ no nyinaa, na nnebɔneyɛfo de, ɔbɛsɛe wɔn nyinaa.”

Nea Ɛkyerɛ: Onyankopɔn bɛsɛe abɔnefo, kyerɛ sɛ obeyi wɔn afi hɔ koraa. Ɔremfa wɔn nkogu ogya biara mu nyɛ wɔn ayayade.

Ɔsɛnkafo 9:10: “Adwuma ne nhyehyɛe ne nimdeɛ ne nyansa biara nni Ɔdamoa mu [anaa “hell,” Douay-Rheims Version] a worekɔ no.”

Nea Ɛkyerɛ: Wɔn a wɔwɔ hell anaa ɔdamoa mu no, wɔnnim biribiara, enti wɔnte yaw. Ɛno da nkyɛn a, asɛm a Bible kyerɛwfo yi kae no, akyinnye biara nni ho sɛ ɛkɔ ma obiara; apapafo ne abɔnefo nyinaa.

Asomafo Nnwuma 2:31: “Odii kan huu Kristo wusɔre no, na ɔkaa ho asɛm sɛ wɔannyaw no Ɔdamoa mu [anaa “hell,” King James Version].”

Nea Ɛkyerɛ: Bere a Yesu Kristo wui no, ɔkɔɔ hell anaa ɔdamoa mu.

Romafo 6:23: “Bɔne akatua ne owu.”

Nea Ɛkyerɛ: Sɛ obi wu a, watua ne bɔne nyinaa ho ka. Ɛnyɛ hyew a wɔbɛhyew obi wɔ ogya mu na ɔde betua ne bɔne ho ka.

Adiyisɛm 20:13: “Owu ne ɔdamoa [anaa “hell,” King James Version] yii awufo a ɛwom mae.”

Nea Ɛkyerɛ: Wɔn a wɔwɔ hell anaa ɔdamoa mu no awuwu. Onyankopɔn benyan wɔn afi hell anaa ɔdamoa mu aba nkwa mu bio.

Adiyisɛm 20:14: “Wɔtow owu ne ɔdamoa [anaa “hell,” King James Version] guu ogya tare no mu.”

Nea Ɛkyerɛ: Sɛ Onyankopɔn nyan awufo a, hell anaa ɔdamoa bɛda mpan. Onyankopɔn bɛsɛe no. Ɔbɛhyew ase te sɛ nea ɔde gya ahyew biribi. Ɛno akyi no, owu a Adam bɔne kɔfa bae no befi hɔ.—Romafo 5:12.

Hebri ne Greek nsɛmfua bi a ɛwɔ Bible mu

Wɔn a wɔkyerɛ Bible ase no, Hebri ne Greek nsɛmfua bi wɔ hɔ a wɔakyerɛ ne nyinaa ase “hell,” nanso ebiara kyerɛ biribi foforo. Nea enti a wɔyɛ saa ne sɛ, wɔpɛ sɛ wɔma nnipa gye di sɛ Onyankopɔn rensɛe abɔnefo mfi hɔ koraa, na mmom ɔbɛma wɔn ho ahyehye wɔn afebɔɔ. Ama wɔn a wɔkenkan saa nsɛm no binom adwene atu afra. Hebri ne Greek nsɛmfua a wɔakyerɛ ne nyinaa ase hell no, ebi na edidi so yi:

Sheol (Hebri שְׁאוֹל), Hades (Greek ᾅδης)

Nea Ɛkyerɛ: Adasamma damoa.—Dwom 16:10; Asomafo Nnwuma 2:31

Sɛnea Ebinom Akyerɛ Ase: Grave, hell, pit (King James Version); realm of the dead (New International Version)
Gehenna (Greek γέεννα)

Nea Ɛkyerɛ: Daa ɔsɛe.—Mateo 5:30

Sɛnea Ebinom Akyerɛ Ase: Gehenna; hell (King James Version, New International Version)
Tartarus (Greek ταρταρόω)

Nea Ɛkyerɛ: Abɔfo a wɔabrɛ wɔn ase anaa wɔagye wɔn tumi afi wɔn nsam. Wɔyɛ ahonhommɔne a wɔn tirim yɛ den.—2 Petro 2:4

Sɛnea Ebinom Akyerɛ Ase: Tartarus; hell (King James Version, New International Version); lower hell (Douay-Rheims Version)
Apoleia (Greek ἀπώλεια)

Nea Ɛkyerɛ: Ɔsɛe.—Mateo 7:13

Sɛnea Ebinom Akyerɛ Ase: Destruction; hell (Good News Bible)
Pyr (Greek πῦρ)

Nea Ɛkyerɛ: Ogya; etumi kyerɛ ogya paa, na etumi nso yɛ ogya a wɔde agyina hɔ ama biribi foforo.—Luka 17:29; Yuda 23.

Sɛnea Ebinom Akyerɛ Ase: Ogya; hellgya (God’s Word Translation)

Nea ɛyɛe a Bonsam gya ho asɛm bae

Efi abosonsom mu: Egyptfo a ɛtenaa ase tete no, na wɔgye di sɛ Bonsam gya bi wɔ hɔ. Wɔn a wɔkyerɛw abakɔsɛm kyerɛ sɛ, awufo ne ayiyɛ ho nhoma bi a wɔfrɛ no Book Ȧm-Ṭuat (Amduat) no, Egyptfo kyerɛw no bɛyɛ mfe 1,600 ansa na Yesu reba. Nsɛm a ɛwom no kyerɛ sɛ, “wɔde nnipa bi begu amena a ogya redɛw wɔ mu mu; na . . . wɔrentumi nguan mfi gya no mu.”—The Egyptian Heaven and Hell.

Tete Kristofo no ankyerɛkyerɛ saa: “Biribiara nni Apam Foforo no mu a ɛkyerɛ sɛ na Bonsam gyam nkyerɛkyerɛ no ka tete Kristofo nkyerɛkyerɛ ho.”—A Dictionary of Christian Theoljogy.

Greek anyansafo nkyerɛkyerɛ bewuraa mu: “Bɛyɛ mfe 1,900 ni na Kristofo bi a wɔsuaa Greek anyansafo nkyerɛkyerɛ fii ase de saa nkyerɛkyerɛ no frafraa wɔn gyidi . . . Nea wɔn ani gyee ho paa ne Plato nkyerɛkyerɛ no [Platonism].” (Encyclopædia Britannica) Saa nkyerɛkyerɛ no baako ne sɛ, obi wu a, wɔhyew no wɔ gyam. “Tete Greek nyansapɛfo no nyinaa, nea ɔyɛ maa ne manfo gyee Hell nkyerɛkyerɛ dii paa ne Plato.”—Histoire des enfers (The History of Hell).

Nkurɔfo faa Bonsam gyam nkyerɛkyerɛ no ho dii bɔne: Bere a na Spainfo Asɔre Asɛnnibea no yɛ adwuma no, obi biara a ɔbɛkasa atia asɔre no nkyerɛkyerɛ no, na wɔhyew no. Nkyerɛkyerɛmu a wɔde mae ne sɛ, ɛbɛma “wɔn a wɔrehyew wɔn no ahu sɛnea Bonsam gyam te” na ama wɔasakra ansa na wɔawu. (The Spanish Inquisition; Jean Plaidy na ɔkyerɛwee.) Ɔhemmaa Mary I a ofi England nso, saa ara na ɔyɛe. Ɔde Protestantfo bɛyɛ 300 bɔɔ dua mu hyew wɔn. Sɛnea ebinom kyerɛ no, gyidi a ɔde yɛɛ saa ne sɛ, “wɔn a wɔkasa tia asɔre nkyerɛkyerɛ no, nea ɛbɛyɛ biara Onyankopɔn bɛhyew wɔn akra daa wɔ Bonsam gyam, enti nea ɛfata sɛ ɔyɛ ara ne sɛ obedi kan ahyew wɔn wɔ asaase so de asuasua sɛnea Onyankopɔn bɛtwe wɔn aso no.”—Universal History; Alexander Tytler na ɔkyerɛwee.

Nsakrae a aba nnansa yi: Sɛnea na nsɔrensɔre bi agye Bonsam gyam nkyerɛkyerɛ no agyinam denneennen no, nnansa yi ɛnte saa bio. Wɔagow mu efisɛ wɔpɛ sɛ wɔma asɔremma no ani gye, na ɛnyɛ sɛ wɔagye atom sɛ ɛyɛ atoro nkyerɛkyerɛ ntia. (2 Timoteo 4:3) Ɔbenfo Jackson W. Carroll ka sɛ: “Ɛnnɛ nnipa pii mpɛ sɛ wɔbɛte bɔne ne afobu ho asɛm . . . Nea nkurɔfo pɛ ne Onyankopɔn a ne yam ye na ɔkorɔkorɔ nnipa.”