Wobɛkɔ Bi?
1 Ɔdansefo bi a ɔde bere tenten asom kae bere bi sɛ: “Sɛ woma nhyiam no da a edi kan pa wo ti so a, na woahwere ade ankasa!” Adɛn nti na ɔte nka saa? Efisɛ da a edi kan no ne honhom fam aduan a ɛyɛ dɛ a Yehowa ahyehyɛde no asiesie ama yɛn no mfiase. (Yes. 25:6) Ɛhɔ a yɛkɔ mfiase pɛɛ no kyerɛ sɛ yɛne odwontofo no yɛ adwene sɛ: “M’ani gyei sɛ wosee me sɛ: Ma yɛnkɔ [Yehowa, NW] fi.”—Dw. 122:1.
2 Nanso, wɔ “Onyankopɔn Nkɔmhyɛ Asɛm” Mantam Nhyiam a yɛyɛɛ no afe a etwaam no bi ase no, nnipa dodow a wɔkɔɔ Fida no sua koraa sen dodow a wɔkɔɔ Memeneda ne Kwasida no. Eyi kyerɛ sɛ yɛn nuanom dodow no ara ante nkɔmhyɛ asɛm a edi mu a wɔkaa ho asɛm saa da no wɔ nhyiam no ase no bi. Wɔhweree fekubɔ a ɛyɛ anigye a anka wobetumi ne wɔn mfɛfo gyidifo anya nso.
3 Mma Honam Fam Adwuma Nnsiw Wo Kwan: Suro a na ebinom suro sɛ wɔn adwuma befi wɔn nsa no nti na amma wɔankɔ Fida no. Nanso, Adansefo pii ahu sɛ sɛ wɔka eyi ho asɛm kyerɛ wɔn adwumawuranom ntɛm na wɔsrɛ kwan a, wotie wɔn. Adwumawura bi ani gyee ɔpɛ a na onuawa kwampaefo bi wɔ sɛ ɔbɛkɔ asafo nhyiam ne nhyiam akɛse biara no ho araa ma bere bi ɔne onuawa no kotiee nhyiam no bi da mu nyinaa!
4 Ɛnsɛ sɛ wususuw sɛ w’adwumawura remma wo kwan, anaasɛ da koro pɛ a wobɛto nhyiam mu no nyɛ hwee. Nya akokoduru na siesie wo ho sɛ wonam anifere kwan so de Kyerɛwnsɛm no bɛkyerɛkyerɛ w’adwumawura no nea enti a nhyiam a wobɛkɔ no yɛ wo som no fã titiriw no mu. (Heb. 10:24, 25) Afei nya Yehowa bɔhyɛ ahorow no mu ahotoso a edi mu, na hu sɛ sɛ wode honhom fam nneɛma di kan wɔ w’asetram a, ɔbɛma wo nsa aka honam fam nneɛma a wuhia no.—Mat. 6:33; Heb. 13:5, 6.
5 Nea ehia kɛse ne sɛ yɛbɛkyerɛ anisɔ ama “nneɛma a eye koraa no.” (Fil. 1:10, 11; Dw. 27:4) Eyi ka yɛn ma yɛyɛ nhyehyɛe sɛnea ɛbɛyɛ a yebenya nsiesiei a efi Yehowa hɔ yi mu mfaso pii. Fi ase yɛ wo nhyehyɛe nnɛ, na si wo bo sɛ wobɛkɔ nnansa no nyinaa!