“Nnuruyɛfo Susuw Mogya A Wɔde Ma Ho Bio”

“Nhyehyɛe a Woayɛ Reboa Yehowa Adansefo no yɛ ma Obiara”

Wɔ saa nsɛmti yi ase wɔ Rocky Mountain News mu no, nnuruyɛ ho nsɛnkyerɛwfo Kris Newcomer bɔ amanneɛ sɛ: “Denver nnuruyɛfo bɛboro 100 aka abom apene Yehowa Adansefo asɔre a ebu mogya sɛ ɛyɛ ade kronkron a ɛnsɛ sɛ woyi ma anaasɛ wɔde ma obi bere a wɔreyɛ oprehyɛn ne aduruyɛ mu nneɛma afoforo no so.” Oduruyɛfo Greg Van Stiegmann a ɔwɔ Bloodless Medicine and Surgery Program a ɛwɔ University Hospital a ɛwɔ Denver, Colorado wɔ United States, kae sɛ: “Nea asi ne sɛ yɛaboaboa nnipa a wɔwɔ nimdeɛ a wɔwɔ ɔpɛ sɛ wɔbɛyɛ nsakrae wɔ sɛnea wɔyɛ wɔn ade no ho.”

Van Stiegmann kae sɛ bere a nhyehyɛe no bedi Yehowa Adansefo ho dwuma no, ɛnyɛ wɔn nkutoo na wɔrepow mogya gye. Nnipa a wɔredɔɔso wɔ hɔ a sɛ wɔannye mogya a anka ebeye ama wɔn. Van Stiegmann kae sɛ, “Yɛbɔ mmɔden biara a yebetumi sɛ yɛremma obiara mogya . . . Amanneɛbɔ a ɛreda adi afi nhwehwɛmu ahorow pii mu kyerɛ sɛ, sɛ wɔmmaa wo mogya ansa na wɔreyɛ wo akisikuru ho oprehyɛn ne wɔ ɛno akyi a, akwanhwɛ a ɛwɔ hɔ sɛ wubenya ahoɔden wɔ oprehyɛn a edi kan mu no ye paa.

Asɛm no kɔɔ so kae sɛ: “Nsakrae a aba wɔ nnɛ yi nnuruyɛ mu no yɛ asɛm pa ma Yehowa Adansefo bɛyɛ 10,000 a wɔwɔ Colorado no. Asɛm bi wɔ Apam Dedaw nhoma Genesis mu a ese: ‘nam a ɛwɔ ne kra, ɛne sɛ ne mogya mu nko na munnni no’, na Adansefo fam no, ɛkyerɛ sɛ ɛnsɛ sɛ wɔde mogya kɔ wɔn nipadua mu ɔkwan biara so a mogya a wɔtwe kɔ wɔn mu ka ho.”