‘Nnipa Afoforo 274 Patuw Wu Da Biara’

The Journal a ɛyɛ nsɛmma nhoma a wotintim wɔ Toronto no bɔɔ amanneɛ nnansa yi sɛ Britania Aduruyɛ Kuw no rebɔ dawuru de atia ɔkwan a tawa adwuma no nam so bɔ ne nneɛma ho dawuru wɔ saa asɛmti no ase. Asɛm no faa Oduruyɛfo John Havard a ɔyɛ kuw no kyerɛwfo asɛm kae sɛ: “Tawa adwuma no sɛe sika ɔpepem pii de fa dawurubɔ, adwuma no ho adwenempa a wɔma ɔmanfo nya, ne nkɔso a ebenya ho abenfo na ama wɔaboa ma ade a yenim​—a ɛsɛ sɛ wohu​—sɛ ɛde nyarewa ne owu baa tee no anya nkɔso.

“Dawurubɔ, agumadi ne mfoniniyɛ akyi a wogyina, akansi, ntade a sigaret ahorow din wowom, ne nnapɔnnadi ahorow nyinaa yɛ mmɔden a adwuma no bɔ sɛ ɛbɛdaadaa wɔn adetɔfo ma wɔagye adi sɛ tawanom yɛ anigye, ɛma ahoɔden na eye.

“Wɔn a wɔtɔ nneɛma yi ye nnipa a yɛhwɛ wɔn yare, na yenim nokware no​—sɛ tawanom de nyarewa ba na ɛma nnipa pii wuwu ma enti nnipa a wɔn dodow yɛ 100,000 a wɔpatuw wu afe biara no yɛ nea ɛkame ayɛ sɛ yentumi nte ase.

“Tawa nnwuma ahorow na ɛma adwuma a ebu ani gu aduruyɛ mu nokwasɛm ahorow so kɛse no yɛ asiane a ɛwom a wɔma so kata no ho ɔsatu kɛse no.”