Mmebusɛm

30 Yake ba Agur nsɛm a emu yɛ duru.+ Ɔbarima no anom nsɛm a ɔde kɔmaa Itiel, Itiel ne Ukal.

2 Me na minni adwene koraa wɔ nnipa mu,+ na ntease a adesamma wɔ no, minni bi;+ 3 minsuaa nyansa;+ na minni Ɔsorosoroni no nimdeɛ no bi.+

4 Hena na waforo akɔ soro na wasian?+ Hena na ɔde ne nsa abien akyere mframa?+ Hena na ɔbɔ nsu boaa, ntama mu?+ Hena na ɔmaa asase ano nyinaa bae?+ Sɛ wunim a, ne din de dɛn,+ na ne ba din ne dɛn?+

5 Onyankopɔn nsɛm nyinaa ho tew.+ Ɔyɛ kyɛm ma wɔn a woguan kɔtoa no.+ 6 Mfa biribiara nka ne nsɛm ho+ na wanka w’anim, na woanyɛ ɔtorofo.+

7 Nneɛma abien na mesrɛ fi wo hɔ.+ Mfa nkame me ansa na mawu.+ 8 Yi nkontompo ne atosɛm fi me ho kɔ akyirikyiri.+ Mma me ohia anaa ahonyade.+ Ma me aduan a ɛbɛso me na minni,+ 9 sɛnea ɛbɛyɛ a meremmee na mempa wo+ nka sɛ: “Hena ne Yehowa?”+ anaa ɛrenhia me, na memmɔ korɔn mmɔ me Nyankopɔn din ahohora.+

10 Nsɛe akoa din nkyerɛ ne wura,+ na wannome wo, na woanni fɔ.+

11 Nnipa bi wɔ hɔ a wɔdome wɔn papa, na wonhyira wɔn maame nso.+

12 Nnipa bi wɔ hɔ a wɔn ho tew wɔn ankasa ani so,+ nanso wɔnhohoroo wɔn ho fĩ.+

13 Nnipa bi wɔ hɔ a wɔn ani tra wɔn ntɔn, na wɔn ani nsɔ ade.+

14 Nnipa bi wɔ hɔ a wɔn sẽ yɛ nkrante, wɔn abogye yɛ sekan,+ na wɔde we mmɔborɔfo fi asase so ne ahiafo fi adesamma mu.+

15 Amemem wɔ mmabea baanu a wɔteɛm sɛ: “Fa bra! Fa bra!” Nneɛma abiɛsa na ɛmmee da, na nneɛma anan na ɛnka sɛ: “Ayɛ yiye!” 16 Adamoa*+ ne obonin yafunu,+ asase a nsu mmee no da,+ ne ogya+ a ɛnka sɛ: “Ayɛ yiye!”+

17 Aniwa a edi ne papa ho fɛw na ebu ne maame asɛm tie animtiaa+ no​—asu ho kwaakwaadabi betutu na ɔkɔre mma adi.

18 Nneɛma abiɛsa na ɛyɛ me nwonwa dodo, na anan na mente ase: 19 ɔkɔre kwan wɔ wim, ɔwɔ kwan wɔ abotan so, ɛhyɛn kwan wɔ ɛpo so,+ ne ɔbarima kwan wɔ ababaa ho.+

20 Ɔbea ɔwaresɛefo kwan ni: wadidi, wapopa n’ano, na ɔka sɛ: “Menyɛɛ bɔne biara.”+

21 Nneɛma abiɛsa na ɛwosow asase, na anan yi na ɛmma entumi nnyina: 22 sɛ́ akoa bedi hene+ na nea onni adwene bedidi amee;+ 23 sɛ́ ɔbea a obiara mpɛ n’asɛm benya kunu,+ na afenaa bɛpam n’awuraa.+

24 Nneɛma anan yi na esusua wɔ asase so, nanso enim nyansa fi awo mu:+ 25 ntɛtea yɛ ɔman a wonni ahoɔden+ nanso wosiesie wɔn aduan ahohuru bere mu;+ 26 nkukuban+ nyɛ ɔman kɛse, nanso wosi wɔn dan wɔ ɔbotan so;+ 27 mmoadabi+ nni ɔhene nanso wɔn nyinaa fi adi akuwakuw;+ 28 ɔdannena+ nsa na ɔde suso nneɛma mu, nanso ɔkɔ ɔhene ahemfie kɛse mu.

29 Nneɛma abiɛsa na woyi akyẽa wɔn anammɔntutu mu, na anan yi na wɔn nantew yɛ fɛ: 30 gyata, mmoadoma mu ɔhoɔdenfo a ɔnnan ne ho obiara anim;+ 31 ɔkraman a wɔde no kɔ ahayɔ anaa ɔpapo, ne ɔhene a n’asraafodɔm ka ne ho.+

32 Sɛ woadi nkwaseasɛm ama wo ho so,+ na sɛ wode w’adwene asi so a, fa wo nsa to w’ano.+ 33 Sɛ wokyĩ nufusu mu a, bɔta na ɛba; womia hwene a, mogya na ɛba, na womia abufuw a, ɔham na ɛba.+