APULI 13-19, 2026
EKIZINA 52 Kwehayo Hali Yahwe
Kwetegereza Amakuru g’Okubatizibwa
“Mufoole abantu abeegeswa . . . , nimubabatiza.”—MAT. 28:19.
EBI TURAAYEGA
Nitwija kubazaaho ensonga habwaki tusemeriire kubatizibwa, eki kurukukiikirra, n’omulingo kukorwamu.
1. Kiki ekirukwoleka ngu okubatizibwa eri nyegesa ya Baibuli enkuru muno?
MALI ka kitusemeza muno kurora abantu abahyaka nibabatizibwa! Obaire okimanyire ngu okusemererwa okwa mulingo gunu kukabanza kubaho omu rusorrokano orw’okubanza orw’ekitebe Ekikristaayo? Ha rusorrokano oru hakabaho okubatizibwa kandi omukwenda Petero akaha orubazo orukaba nirusoborra nkooku kiri kikuru muno kubatizibwa. (Ebik. 2:38, 40, 41) Omukwenda Paulo akahandiika naagamba ngu ‘enyegesa ez’okubandizaaho ezirukukwata hali Kristo’ nizitwarramu “okwegesa ebirukukwata ha kubatiza.” (Baheb. 6:1, 2) Noobu kiraaba ngu enyegesa erukukwata ha kubatizibwa neesobora kuzooka nk’emu ha nyegesa ez’okubandizaaho, tusemeriire kugyetegereza kurungi. Habwaki?
2. Habwaki tusemeriire kwetegereza kurungi okubatizibwa?
2 Nkooku omusingi ogugumire gusobora kukoonyera enju kwikara egumire, kwetegereza kurungi amakuru ag’okubatizibwa nikisobora kutukoonyera kuba n’okwikiriza okugumire. Tusemeriire kwetegereza kurungi okubatizibwa katube tumazire emyaka nyingi tubatiziibwe rundi tuliyo nitugonza kubatizibwa. Nahabweki, omu kicweka kinu nitwija kugarukamu ebikaguzo binu: Okubatizibwa nikimanyisa ki? Okubatiza okw’Ekikristaayo nikutwarramu ki? Kandi habwaki tubatizibwa omu ibara rya Isiitwe, n’ery’Omwana, n’ery’omwoyo ogurukwera?
AMAKURU G’OKUBATIZIBWA KWAWE
3. Kiki okubatizibwa kwawe eki kwoleka abandi?
3 Obw’obatizibwa oyoleka omu rwijwire ngu oikirize amananu agarukukwata hali Yahwe Ruhanga na Yesu Kristo, oyegarukiremu ebibi byawe, okozere empindahinduka omu bwomeezi bwawe nukwo oheereze Yahwe, oyetegeriize ngu Yesu nuwe Ruhanga ataireho kutujuna, kandi ogambiire Ruhanga omu kusaba nkooku orukugondeza kimu kukora ebi agonza obu nookorra hamu n’ekitebe kye. Obu omara kukora okweraga oku rundi okwehayo kandi okabatizibwa, oba otandikire omuhanda oguraakuhikya omu bwomeezi obutahwaho.
4. Kwibikirwa kimu omu maizi kyoleka ki? (Rora n’ekisisani.)
4 Obu oba noobatizibwa, bakwibikira kimu omu maizi kandi hanyuma bakwihayo,a osisana nkw’ow’aziikirwe kandi hanyuma wahumbuuka. (Lengesaniza na Abakolosai 2:12.) Okubatizibwa kwoleka empindahinduka ez’amaani ezi oba okozere omu bwomeezi bwawe. Omu mulingo ki? Obu bakwibika omu maizi, kyoleka ngu olekiire kimu obwomeezi bwawe obwa kara. Kandi obu oruga omu maizi, kyoleka ngu otandikire obwomeezi obuhyaka kandi ngu kukora Ruhanga ebi agonza nikyo kirukwija kuba ekintu ekikuru omu bwomeezi bwawe.
Obu obatizibwa oyoleka ngu ohindwire omulingo watwazaamuga obwomeezi bwawe kandi watandika obwomeezi obuhyaka obw’okukora Ruhanga ebi agonza (Rora akacweka 4)
5. Ebintu ebi okora kweteekaniriza okubatizibwa nibirengesanizibwa bita n’omulimo Nuha ogu yakozere kwombeka eryato? (1 Petero 3:18-21)
5 Soma 1 Petero 3:18-21. Nitusobora kulengesaniza ebintu ebi okora obu oba nooyeteekaniza kubatizibwa n’omulimo Nuha ogu yakozere obu akaba naayombeka eryato. Obu oraaba nubwo waakatandika kwega hali Yahwe, ebintu ebi osemeriire kuhikiiriza nibisobora kukuhinguranaho, obundi bikasisana nk’omulimo ogw’amaani ogw’okwombeka eryato lya Nuha. Baitu mali osemeriire kuteekamu amaani ago goona? Ego, habwaki nitugamba tuti? Teekerezaaho Nuha, Ruhanga weenyini nuwe yakozere pulaani ey’eryato, kandi Nuha akaba asemeriire kugihondera nukwo asobole kujuna obwomeezi omu kasumi ak’Okusandaara kw’Amaizi. Habw’okwikiriza, Nuha akoorobera Ruhanga yayombeka eryato, kandi na Ruhanga akamukoonyera. Kusisanaho na Nuha, na iwe noosobora kukorra kimu ‘byona Ruhanga ebi akuragiire kukora.’—Kub. 6:22.
6. Petero akaba naamanyisa ki obu yagambire ngu okubatizibwa ‘nikutujuna’?
6 Omu rukarra rwa 21, omukwenda Petero akahandiika naagamba ngu okubatizibwa ‘nikutujuna.’ Ky’amananu ngu, ekikorwa eky’okwibika omuntu omu maizi tikireetaho okujunwa; noobu kwakuba okukwogyaho ebibi. Esagama ya Yesu yonka niyo esobora kukwogyaho ekibi. (1 Yoh. 1:7) Baitu nabwo, okubatizibwa kukuru muno habwokuba Ruhanga aturagiire kubatizibwa, kandi obu tubatizibwa tuba nitumusaba atukoonyere kuba “n’omuntu ow’omunda omurungi.” Nikiija kusemeza Yahwe kutuganyira ebibi byaitu naasigikirra ha kihongwa kya Yesu. Egi niyo ensonga habwaki Petero yagambire ngu okubatizibwa nikutujuna, ekirukumanyisa ngu okubatizibwa kutusobozesa kwomeera ebiro n’ebiro.
OKUBATIZIBWA OKW’EKIKRISTAAYO NIKUTWARRAMU KI?
7. Bintu ki ebisemeriire kukorwa ha kubatizibwa?
7 Baibuli etugambira ngu kusobora kubatizibwa, omuntu asemeriire kwibikirwa kimu omu maizi, baitu tetugambira bingi ebirukukwata ha mulingo okubatizibwa kusemeriire kukorwamu. Baitu nabwo, Ebyahandiikirwe bitukoonyera kumanya omulingo okubatizibwa kusemeriire kukorwamu. Ekyokurorraho, emisingi ya Baibuli ekoonyera abo abarukugenda kubatizibwa kumanya omulingo basemeriire kujwaramu, n’omulingo abo abarukurora basemeriire kwetwazaamu. (1 Kol. 14:40; 1 Tim. 2:9) Abagurusi nubo bakira kubatiza kandi tusemeriire kwetantara kubarora nk’abantu ab’embaganiza. (1 Kol. 1:14, 15) Okubatizibwa kuba nikwikirizibwa noobu harukuba haroho abantu baingi rundi bake.—Ebik. 8:36.
8. Bikaguzo ki ebikaguzibwa abo abarukugenda kubatizibwa, kandi habwaki? (Ebikorwa by’Abakwenda 2:38-42) (Rora n’ekisisani.)
8 Baibuli eyoleka ngu tusemeriire ‘kwatura omu rwijwire kutunga okujunwa,’ kandi oku nukwo kwoleka okwikiriza kwaitu. (Bar. 10:9, 10; rora study note on “publicly declare.”) Mali ka kihikire kukikora obu turukuba nitubatizibwa, habwokuba okubatizibwa kiri kikorwa ekikuru muno ekituleetera okujunwa! Egi niyo ensonga habwaki abarukugenda kubatizibwa bakaguzibwa ebikaguzo bibiri. Eky’okubanza, “Oyegarukiremu ebibi byawe, wahayo obwomeezi bwawe hali Yahwe, kandi waikiriza enteekaniza ey’okutujuna ei atuteeriireho kuraba omu Yesu Kristo?” Ekikaguzo kinu kiteeka omutima ha bintu omuntu ebi amazire ira kukora kurora ngu yabatizibwa. Petero akabaza ekintu nikyo kimu ha kiro kya Pentekooti obu yagambiire abantu kwegarukamu kandi babatizibwe. Ekikaguzo ekya kabiri kigamba ngu, “Okimanyire ngu okubatizibwa kwawe nikwoleka ngu oli omu h’Abakaiso ba Yahwe kandi oyetegekere kukorra hamu n’ekitebe kye?” Ekikaguzo kinu kitwijukya ngu kusobora kuhikiiriza okwehayo kwaitu, tusemeriire kworobera oburagirizi obu tuheebwa kuraba omu kitebe kya Yahwe n’okuheereza Ruhanga tuli hamu n’Abakristaayo bagenzi baitu nkooku abeegeswa ab’omu kyasa eky’okubanza baakozere. (Soma Ebikorwa by’Abakwenda 2:38-42.) Abo abagarukamu ebikaguzo binu kuruga ha mutima ngu ego, baba nibaikirizibwa kubatizibwa.
Okubatizibwa kwawe nikutwarramu “[kwatura] omu rwijwire kutunga okujunwa” (Rora akacweka 8)d
9. Bintu ki buli omu ebi asemeriire kukora kusobora kusiimwa Ruhanga?
9 Noobu okaba otakeegere amananu, noosobora kuba okaba oine obwomeezi oburungi kandi otakakoraga ebibi eby’amaani. Rundi noosobora kuba waakuziibwe abazaire abali omu mananu abaakukoonyiire kugonza Yahwe. Na iwe nooba nooyetaaga kwegarukamu kandi okabatizibwa kusobora kusiimwa Ruhanga? Ego. Ka tube tukuliire omu nyikara za mulingo ki, itwena tusemeriire kukimanya ngu tukaijukura ekibi ekyatwahukaniize hali Ruhanga. (Zab. 51:5) Baitu obu twega hali Yahwe, tugonza kuba n’enkoragana enungi na uwe, nahabweki tucwamu kwebembeza ebi agonza omu kiikaro ky’okwebembeza ebyaitu. Eki obu tumara kukikora, tusemeriire kwegarukamu ebibi byaitu ebi twakozere kara tukahinduka tukatandika kuhondera omuhanda ogw’obwomeezi ogurukusemeza Isiitwe ow’omu iguru. Kandi hanyuma tuba tusemeriire kubatizibwa.—Ebik. 3:19.
10. Kiki eki osemeriire kukora kakuba oba wabatiziibwe omu diini endi?
10 Noobu oraaba nubwo waakaruga kubatizibwa nk’omuhondezi ow’ediini endi, nabwo nooba nooyetaaga kubatizibwa nk’omu h’Abakaiso ba Yahwe. Habwaki? Habwokuba omu kasumi ako, okaba otarukwetegereza kurungi amananu agarukukwata hali Yahwe Ruhanga na Yesu. Kandi noobu oraaba waayehaireyo hali Ruhanga omu kusaba, okweraga kwawe otakukole noosigikirra ha kumanya kurungi Ruhanga ebi agonza. Omukwenda Paulo obu yatangaine abantu ab’omu Efeeso abakaba babatiziibwe enyumaho baitu batamanyire kurungi enyegesa ez’Ekikristaayo, akakora enteekaniza nukwo bongere babatizibwe.b (Ebik. 19:1-5) Nikyo kimu na kasumi kanu, okubatizibwa kw’omuntu kuba nikwikirizibwa obu aba akukozere naasigikirra ha kumanya okuhikire okw’ebintu Ruhanga ebi agonza.
“OMU IBARA LYA ISIITWE, N’ERY’OMWANA, N’ERY’OMWOYO OGURUKWERA”
11. Nikimanyisa ki kubatizibwa “omu ibara lya Isiitwe, n’ery’Omwana, n’ery’omwoyo ogurukwera”? (Matayo 28:18-20)
11 Yesu akaragira ngu abeegeswa abahyaka basemeriire kubatizibwa “omu ibara lya Isiitwe, n’ery’Omwana, n’ery’omwoyo ogurukwera.” (Soma Matayo 28:18-20.) Akaba naamanyisa ki? Omu Baibuli, ekigambo “ibara” kikira kukozesebwa kumanyisa omulingo omuntu arorwamu. Nikisobora nookumanyisa omulimo omuntu ogu aine rundi obusobozi obu aine. Nahabweki, obu tukora ekintu omu “ibara” ly’omuntu rundi ry’ekintu, tuba nitumanyirra obusobozi obuli enyuma y’ibara eri. (Lengesaniza na Matayo 10:41; see study note on “because he is a prophet.”) Weetegereze omulingo osobora kumanyirra ekiikaro n’obusobozi bwa Isiitwe, n’obw’Omwana hamu n’omulimo gw’omwoyo gwa Ruhanga ogurukwera.
12. Nikimanyisa ki kubatizibwa omu ibara lya Isiitwe? (Okusuukururwa 4:11) (Rora n’ebisisani.)
12 Kubatizibwa omu ibara lya Isiitwe. Kinu nikimanyisa ngu tumanyirra Yahwe nka Isiitwe ow’omu iguru, ow’atuhaire obwomeezi. Ali Ruhanga Ow’obusobozi bwona, kandi Omuhangi w’ebintu byona. (Soma Okusuukururwa 4:11.) Tumumanyirra nka Ruhanga Anyakuhurra okusaba, kandi tukozesa ibara lye omu omulingo ogw’ekitiinisa, tutarukutiina obu turukuba nitumusaba, noobu turukuba nitumubazaaho hali abantu abandi. (Zab. 65:2) Baitu nabwo, kubatizibwa omu ibara lya Isiitwe nikitwarramu n’ekintu ekindi. Abantu abakaba nibahuliiriza Petero ha kiro kya Pentekooti bakaba bamanyire ebirukukwata hali Yahwe, baitu bakaba basemeriire kukyetegereza ngu Yahwe aha abantu obwomeezi obutahwaho kuraba omuli Yesu Kristo wenka.—Bar. 5:8.
Hanyuma y’okubatizibwa, gumizaamu noomanyirra ekiikaro hamu n’obusobozi bwa Isiitwe n’Omwana hamu n’omulimo gw’omwoyo ogurukwera (Rora akacweka 12)
13. Nikimanyisa ki kubatizibwa omu ibara ly’Omwana? (Rora n’ekisisani.)
13 Kubatizibwa omu ibara ly’Omwana. Kinu nikimanyisa ngu tumanyirra Yesu nk’Omwana wa Ruhanga omu wenka. Yesu nuwe “omuhanda,” ekirukumanyisa ngu kuraba omuli uwe nitusobora kutunga enkoragana enungi na Yahwe. (Yoh. 14:6) Ekindi, nuwe Omucunguzi waitu, ayatufeeriire nukwo tusobole kutunga obwomeezi. Egi niyo ensonga habwaki tusemeriire kuhondera ekyokurorraho kye buli kiro hatali ha kiro eky’okubatizibwa honka. (1 Yoh. 2:6) Nahabweki, tutebeza n’obwekambi nkooku Yesu yakozere, kandi tutarukwikiriza ekintu kyona kutulemesa. (Luk. 4:43) Ekindi, twehayo kugumira okuhiiganizibwa habwokuba nitugonza kuhondera ekyokurorraho kya Yesu kandi nituheereza Ruhanga n’obwesigwa. (2 Tim. 3:12) Tutamu Yesu ekitiinisa ‘nk’omutwe gw’ekitebe,’ nahabweki n’okusemererwa tworobera abo ab’ahaire obujunaanizibwa bw’okutwebembera n’okuturolerra.—Bef. 4:8, 11, 12; 5:23.
Hanyuma y’okubatizibwa gumizaamu noomanyirra ekiikaro n’obusobozi bw’Omwana (Rora akacweka 13)
14. (a) Nikimanyisa ki kubatizibwa omu ibara ly’omwoyo ogurukwera? (Rora n’ekisisani.) (b) Abaseeserweho amagita babatizibwa omu miringo ki endi? (Rora n’akasanduuko “Emiringo Endi Abaseeserweho Amagita Ei Babatizibwamu.”)
14 Kubatizibwa omu ibara ly’omwoyo ogurukwera. Kinu nikimanyisa ngu twikiriza amananu agarukukwata ha mwoyo ogurukwera. Omwoyo ogurukwera tali muntu, rundi kicweka ky’obusatu baitu maani ga Ruhanga. Tukimanyire ngu omwoyo ogurukwera nugwo gwakoonyiire banabbi hamu n’abo abaahandiikire Baibuli, nahabweki tugisoma buli kiro kandi tuhondera enyegesa zaayo. (2 Pet. 1:20, 21) Kandi twetantara kukora ebibi eby’amaani, habwokuba ebikorwa nk’ebi nibisobora kutulemesa kutunga omwoyo gwa Ruhanga ogurukwera otwaliiremu n’ekitebe.—Bef. 4:30.
Hanyuma y’okubatizibwa gumizaamu noomanyirra omulimo gw’omwoyo ogurukwera (Rora akacweka 14)
15. Kiki eki tusemeriire kucweramu kimu kukora?
15 Obu oraaba oli Mukristaayo ow’abatiziibwe, ikara nooyeijukya ensonga habwaki okubatizibwac kukuru muno kandi gumizaamu nookorra ha kweraga oku wakozere hali Yahwe obu wayehaireyo kandi wabatizibwa. Baitu kakuba oba otakabatiziibwe? Haroho ekintu kyona ekirukukulemesa? Ekicweka ekirukuhonderaho nikiija kubazaaho omulingo osobora kugumizaamu nookukurakurana kusobora kubatizibwa.
EKIZINA 161 Kinsemeza Kukora Ebi Ogonza
a Ekigambo eky’Oruyonaani ba’pti-sma, ekihindurwa kumanyisa “okubatizibwa,” nikimanyisa “kwibikwa.” Nahabweki okubatizibwa nikimanyisa kwibikirwa kimu omu maizi, hatali kumiisirwa amaizi nk’amadiini agamu oku geegesa.
b Abasaija ab’omu Efeeso bakaba batiziibwe omu “kubatiza okwa Yohaana.” (Ebik. 19:3) Yohaana Omubatizi akatererra Abayudaaya kwegarukamu ebibi ebi bakaba bakozere obu nibacwa Ebiragiro bya Musa, kandi Yohaana akabatiza abo abakaba beegarukiremu. (Mar. 1:4, 5) Baitu okubatiza kwa Yohaana kukaba kutakyaikirizibwa hanyuma y’Ebiragiro bya Musa kuhwaho. Kuruga kasumi ako, Ruhanga aikiriza “okubatizibwa kumu” okurukuhikya omu kujunwa.—Bef. 4:5.
c Rora ekicweka ekiine omutwe “Okubatizibwa Nikyo Kiki?” ekiri ha jw.org n’omu JW Library® hansi y’omutwe “Eby’Okugarukamu eby’Ebikaguzo Ebirukukwata ha Baibuli.”
d KUSOBORRA EKISISANI: Abarukugenda kubatizibwa beemeriire kwatura okwikiriza kwabo omu rwijwire ha rusorrokano orukooto orw’ekiro kimu.