APULI 6-12 2026
EKIZINA 82 Leka Ekyererezi Kyanyu Kyake
Omulingo Tusobora Kukoonyera Abanyabuzaale Baitu Abatali omu Mananu
“Tutajwaha omu kukora ebirungi.”—BAG. 6:9.
EBI TURAAYEGA
Nitwija kurora nkooku tusobora kwikara twine enkoragana enungi n’abanyabuzaale baitu abatali omu mananu n’okubakoonyera omu by’omwoyo kakuba kiba nikisoboka.
1-2. Kiki ekisobora kuba kyakwasireho enkoragana yaitu n’abanyabuzaale baitu obu tukaba tukyatandikire kwega amananu?
YESU akagambira omusaija ow’akaba naagonza kufooka muhondezi we ati: “Genda owaanyu omu banyabuzaale baawe, obagambire byona Yahwe ebi akukoliire.” (Mar. 5:19) Yesu akabaza ebigambo ebi habwokuba akaba akimanyire ngu abantu abarukukira obwingi bagonza kugambiraho abanyabuzaale baabo ebintu ebirungi.
2 Noijuka omulingo wayehuliiremu ha murundi gwawe ogw’okubanza kwega amakuru amarungi? Okaba otasobora kugeesigaliza! Baitu abanyabuzaale baawe nibasobora kuba bataraagagondeze. Obundi nibasobora kuba baabiihiirwe habw’omulingo wagabagambiiremu. Kinu obu kiraaba kyakuhikireho, ekicweka kinu nikiija kukukoonyera kumanya eki osemeriire kukora kusobora kwikara oli mwesigwa hali Yahwe kandi ha murundi nugwo gumu oine enkoragana enungi n’abanyabuzaale baawe?
3. Biki ebi turukwija kubazaaho omu kicweka kinu?
3 Omu kicweka kinu nitwija kurora; (1) omulingo embabazi zisobora kutwekambisa kugonza abanyabuzaale baitu abatali omu mananu,a noobu baraaba batarukugagonza; (2) omulingo tusobora kwetwazaamu abanyabuzaale baitu obu babaza rundi bakakora ebintu ebirukutusaaliza; (3) omulingo okugumiisiriza kwaitu hamu n’okunihira bisobora kukoonyera abanyabuzaale baitu kumanya amananu; hamu (4) n’omulingo tusobora kubooleka ngu nitubagonza.
LEKA EMBABAZI ZIKWEKAMBISE KUBAKOONYERA
4. Yesu akakora ki abantu obu bakaba batarukugonza kufooka beegeswa be?
4 Yesu ataleke kulengaho kukoonyera abantu abakaba batarukugonza obutumwa bwe. Akeerengesaniza n’omukozi w’omusiri gw’emizabbibbu ayakozere kyona ekirukusoboka kurora ngu omuti gw’emizabbibbu ogukaba gwangire kwana, gwayana. (Luk. 13:6-9) Nambere Yesu yaheeriire ekyokurorraho eki, akaba atandikire ira kulengaho kukoonyera Abayudaaya kumwikiririzaamu n’okufooka abeegeswa be. Habwaki yaikaire naalengaho kubakoonyera? Yesu akaba ainiire abantu embabazi kandi eki kikamukoonyera kubagumiisiriza.
5. Kiki ekyayekambisize Yesu kwoleka Abayudaaya bataahi be embabazi?
5 Yesu akaba naasaalirirwa Abayudaaya bataahi be habwokuba abeebembezi b’amadiini bakaba balemerwe kubakoonyera kwikiririza omuli Ruhanga. Akarora ngu abantu bakaba bali “nk’entaama ezitaine omuliisa.” (Mar. 6:34) Yesu obu akaba atakafiire, akahika na ha rulengo rw’okurra habwa Yerusaalemu, habwokuba akaba akimanyire ngu abantu abarukukira obwingi abakaba nibagiikaramu bakaba nibaija kufa habw’okutaba n’okwikiriza. (Luk. 19:41-44) Kusisanaho na Yesu, obu tuteekerezaaho ensonga habwaki abanyabuzaale baitu basemeriire kumanya amakuru amarungi, kitwekambisa kubakoonyera.
6. Habwaki tusemeriire kugumiisiriza abanyabuzaale baitu abatali omu mananu? (Abagaratiya 6:9)
6 Soma Abagaratiya 6:9. Noobu kiraaba ngu abanyabuzaale baitu tibakagondeze enyikiriza zaitu, tusemeriire kubagumiisiriza kandi tutaleka “kukora ebirungi.” Tukimanyire ngu kitwara obwire omuntu kulekaho enyikiriza ezi aikaire naikiririzaamu kumara akasumi kandi akatandika kwikiririza omuli Yahwe. Haroho akasumi na iwe obu okaba oli nk’abo ‘abataine okunihira kandi abataine Ruhanga omu nsi’? (Bef. 2:12) Hataroho kugurukyagurukya, haroho omuntu ayakukoonyiire. Mali eki na iwe tikikuleetera kugonza kuhikiiriza ebyetaago eby’omwoyo eby’ab’omuka yaawe obu kirukuba nikisoboka?
WEETEGEREZE ENSONGA HABWAKI ABANYABUZAALE BAAWE NIBABAZA RUNDI NIBAKORA EBINTU EBIRUKUSAALIZA
7. Kiki ekisobora kuba kyalemeseze bagenzi ba Yesu kumwikiririzaamu?
7 Bagenzi ba Yesu nibasobora kuba baahuliireho eby’amahano Yesu ebi akaba akozere omu Galiraaya. (Luk. 4:14, 22-24) Baitu ha kubanza batamwikiririzeemu. (Yoh. 7:5) Habwaki? Baibuli tetugambira ensonga. Baitu etugambira hakiri ebintu bibiri ebyaleetiire Abayudaaya abamu kulemwa kufooka bahondezi ba Yesu. Abamu bakaba nibatiina ngu abantu bakaba nibaija kubatwaza kubi kakuba baikiririza omuli Yesu. (Yoh. 9:18-22) Abandi bakaba bamanyire Yesu kuruga omu buto bwe, nahabweki bakaba batasobora kukiikiriza ngu akaba atumirwe Ruhanga. (Mar. 6:1-4) Enteekereza enu neesobora kuba yakwasireho na bagenzi ba Yesu. Nikisoboka kuba ngu n’abanyabuzaale baawe baine enteekereza niyo emu?
8. Kiki ekisobora kuleetera abanyabuzaale baitu kubaza n’okwetwaza omu mulingo ogutali gw’embabazi?
8 Teekerezaaho ensonga habwaki nibabaza kandi nibeetwaza omu mulingo ogutali gw’embabazi. Bagenzi ba Yesu nibasobora kuba bakaba bali bamu h’abanyabuzaale ba Yesu abaagambire ngu akaba “atabukire omutwe.” (Mar. 3:21) Habwaki nibasobora kuba baateekeriize omu mulingo ogu? Ebigambo ebyetooroire orukarra oru nibyoleka ngu Yesu akaba aine bingi eby’okukora omu kutebeza n’okukiza abantu yahika na ha rulengo rw’okuburwa obwire obw’okulya. (Mar. 3:20) Abanyabuzaale be nibasobora kuba bakaba nibateekereza ngu akaba naakihinguraniza. N’abanyabuzaale baitu nibasobora kuba nibateekereza ngu nitukihinguraniza muno obukirukuhika ha diini yaitu. Obu baraaba nibeehurra omu mulingo ogu, tusemeriire kubooleka ngu tuli bantu abarukwetegereza kuraba omu bigambo byaitu n’omu bikorwa byaitu.
9. Kiki ekisobora kukoonyera abanyabuzaale baitu kuhinduramu omulingo baroramu Abakaiso ba Yahwe? (1 Petero 3:1, 2) (Rora n’ebisisani.)
9 Gumizaamu noobooleka embabazi n’okwetegereza. Ebigambo byaitu, n’ebikorwa eby’embabazi nibisobora kuleetera abanyabuzaale baitu kuhinduramu omulingo baroramu Abakaiso ba Yahwe. (Soma 1 Petero 3:1, 2.) Nyineeka ow’atali omu omu mananu naasobora kwehurra alekerweho rundi kubiihirwa mukazi we ow’ali omu mananu obu agenda omu nsorrokano rundi omu buheereza. Habwokuba nyinabwenge tarukugonza iba ayehurre omu mulingo ogu, naasobora kuhinduramu enteekaniza ye ey’ebintu eby’omwoyo nukwo asobole kumara obwire na musaija we. Ekyokurorraho, naasobora kucwamu kugenda omu buheereza iba obu arukuba aine bingi eby’okukora rundi obu arukuba atali omu ka. Munyaanya itwe obu arukuba ali muntu ow’arukuhindahinduramu kandi ow’arukwoleka okwetegereza, nikisobora kukoonyera iba kuhinduramu omulingo aroramu Abakaiso ba Yahwe.
Ebigambo n’ebikorwa byaitu eby’embabazi nibisobora kuhindura omulingo ou tuli na uwe omu buswere ow’atali omu mananu aroramu Abakaiso ba Yahwe (Rora akacweka 9)g
10. Abantu obu batubazaaho kubi, nitusobora tuta kwegera hali Yesu?
10 Tikirukukwetaagisa kugira eki wabaza buli murundi baraakubazaaho kubi. Yesu obu baamujunaine ngu akaba naalya muno kandi naanywa muno ateerwaneho, oihireho akeekambisa abantu kwerorra ebi barukumubazaaho obu garaaba gali mananu. (Mat. 11:19) Kandi kuraba omu kyokurorraho kye akooleka abantu ngu yaikaraga asemeriirwe kandi ngu yayegondezaaga omu bwomeezi bwe. (Lengesaniza na Yohaana 2:2, 6-10.) Omu mulingo nugwo gumu, na iwe tosemeriire kwehurra ngu oine kugira eki wabaza buli murundi baraakubazaaho kubi. Oihireho, yoleka abanyabuzaale baawe ngu oli muntu ow’asemeriirwe kandi ow’arukwegondeza omu bwomeezi kuraba omu bikorwa byawe kandi hanyuma nibaija kwerorra amananu. Nikisobora kubaleetera kwanga kwikiririza omu bintu ebitahikire ebi bahurra abantu abandi nibatubazaaho.
IKARA NOOGUMIISIRIZA KANDI OINE OKUNIHIRA
11. Yesu akatwaza ata bagenzi be abakaba batarukumwikiririzaamu?
11 Ebitabu by’Enjiri nibyoleka ngu Yesu akaikara naagumiisiriza bagenzi be. Ekyokurorraho, na bo bakaba bali omu Kana nambere Yesu yakoliire ekyamahano kye eky’okubanza. (Yoh. 2:11, 12) Baitu nabwo bagenzi be batamwikiririzeemu na hanyuma y’okurora eky’amahano eki akaba akozere. Baitu Yesu ataleke kukoragana na bo. Hanyuma y’okurabaho emyaka nk’esatu Yesu amazire kukora ekyamahano kye eky’okubanza omu Kana, Baibuli eyoleka ngu akaba naabaza na bagenzi be omu mulingo ogw’embabazi.—Yoh. 7:5-8.
12. Kiki ekisobora kutukoonyera kwikara nitunihira ngu bamu h’abanyabuzaale baitu nibasobora kwega amananu?
12 Kwetegereza kurungi embabazi za Yahwe nikisobora kutukoonyera kwikara twine okunihira. Hanyuma y’omuhito omwingi kutandika, abantu nibasobora kuba bakyaine omugisa ogw’okutweteranizaaho omu kuheereza Yahwe. Abanyabuzaale baitu obu balirora amadiini ag’ebisuba nigahwerekerezebwa, nibasobora kwijuka ngu ekintu kinu tukaba tukibagambiireho, kandi nikisobora kubaleetera kucwamu kuheereza Yahwe.b (Kus. 17:16) Kandi kakuba kasumi kanu abanyabuzaale baitu bahikwaho ebizibu, tusemeriire kukora kyona ekirukusoboka kubakoonyera. Obundi nikisobora kubaleetera kugonza kwega amananu kakuba bakirora ngu okugonza kwaitu hamu n’ebikorwa byaitu eby’embabazi nibiruga ha mutima.
BOOLEKE NGU NOOBAGONZA
13. Noobu kiraaba ngu twine bingi eby’okukora omu buheereza bwaitu hali Yahwe, kiki eki tusemeriire kwegendereza?
13 Noobu kiraaba ngu twine bingi eby’okukora omu buheereza bwaitu hali Yahwe, titurukugonza abanyabuzaale baitu bateekereze ngu titubainiire obwire rundi ngu titukyabagonza. (Mat. 7:12) Nitusobora tuta kwoleka ngu nitubafaaho? Weetegereze emu ha miringo ei tusobora kukikoramu.
14-15. Mulingo ki ogumu ogu twolekamu ngu nitugonza abanyabuzaale baitu abatali omu mananu? Bazaaho ekyokurorraho.
14 Yoleka ngu noobagonza kuraba omu kwikara noobaza na bo. Twoleka ngu nitugonza abanyabuzaale baitu kuraba omu kwikara nitubaza na bo. Ekyokurorraho, nitusobora kubasindikira obutumwa obwa ha simu otwaliiremu n’ebisisani ebi turukuba twetiize obu turukuba tugenzere omu biikaro ebindi kuhuumuraho, rundi tuli hamu n’abanywani baitu. Kubasindikira ekisembo ekitaito rundi ebbaruha nikisobora kutukoonyera kuba n’enkoragana enungi hamu na bo. Obu tubakorra ebintu ebi eby’embabazi tuba nitusisana nk’abarukubagambira ngu nitubagonza.
15 Teekerezaaho ekyokurorraho kya munyaanya itwe arukwetwa Anna, ow’arukwikara omu Armenia. Ab’omu ka ye bamara hamu obwire bwingi kukira muno ha biro by’okujaguza amazaarwa na ha biro ebindi ebikuru. Anna obu yafookere omu h’Abakaiso ba Yahwe, abanyabuzaale be bakatandika kweralikirra ha mulingo ediini ye ekaba niija kukwataho enkoragana yabo. Ekindi, bakaba beraaliikiriire ngu kakuba afooka omu h’Abakaiso ba Yahwe kikaba nikiija kugumanganiza obwomeezi bwe omu kasumi ak’omumaiso. Kiki Anna eki akora kurora yaikara aine enkorangana enungi n’abanyabuzaale be? Naagamba ati: “Obu mbungira abanyabuzaale bange, mbagambira ebirukunkwataho, hamu n’ensonga habwaki mbaire ntakababungiire. Ekindi, mbaraaliza omu ka yange kandi mbanjurra banywani bange. Ekirugiremu, abanyabuzaale bange abarukukira obwingi nibamanya kurungi banywani bange kandi beehurra bateekaine obu baba bali na bo.” Ayongera agamba ati: “Abanyabuzaale bange abarukukira obwingi nibakirora nkooku nyine okusemererwa kandi tibakyanyeraliikirra.”
16. Yesu akooleka ata ngu mugenzi we Yakobbo akaba ali w’omugaso hali uwe? (Rora n’obugambo obuli hansi.)
16 Booleke ngu b’omugaso hali iwe. Hanyuma ya Yesu kuhumbuuka, akooleka ngu mugenzi we Yakobbo w’omugaso hali uwe kuraba omu kumubonekera ali wenka. (1 Kol. 15:7) Teekerezaaho okusemererwa Yakobbo oku yatungire obu yakyetegeriize ngu Yesu akaba naakyamugonza! Kanu nikasobora kuba nuko akasumi Yakobbo obu yakigumiize kimu ngu Yesu nuwe akaba ali Masiya. Hanyuma ya Yakobbo kubungirwa Yesu, Yakobbo naasobora kuba yakoonyiire abanyabuzaale be abandi kukyetegereza ngu Yesu akaba Masiya.c—Ebik. 1:14.
17. Nitusobora tuta kuta omu nkora omusingi ogurukusangwa omu Abarooma 12:15? (Rora n’ekisisani.)
17 Soma Abarooma 12:15. Kakuba twoleka abanyabuzaale baitu ngu nitubafaaho kukira muno omu kasumi nambere barukutwetaagira, nikisobora kuhindura omulingo baturoramu.d Ekyokurorraho, nitusobora kusemererwa na bo obu barukuba bazaire omwana, kandi nitubaha ebisembo kwoleka ngu nitusemererwa hamu na bo. Kakuba omunyabuzaale waitu afeerwa omuntu we, nitusobora kumugumya, tukamukoonyera omu miringo erukwahukana, rundi tukamusindikira kaadi ey’erukumuhuumuza. Kandi kikuru kwikara nitubabungira rundi nitubasindikira obutumwa kukira muno obu barukuba bali omu nyikara ezigumangaine.
Kakuba oyoleka ngu noofaaho abanyabuzaale baawe omu kasumi nambere barukira kuba nibeetaaga obukoonyezi, nikisobora kuhindura omulingo bakuroramu, n’omulingo baroramu ediini yaawe (Rora akacweka 17)h
18. Nitusobora tuta kwegera ha mwegeswa wa Yesu, Andereya?
18 Banjule hali ab’oruganda na banyaanya itwe. Andereya obu yakyetegeriize ngu Yesu akaba ali Masiya, akatunga ekihika eky’amaani muno kandi yayanjura mugenzi we Petero hali Yesu. (Yoh. 1:40-42) Na itwe nitusobora kukora ekintu nikyo kimu. Ekyokurorraho, obwire obumu nitusobora kuraaliza omunyabuzaale waitu kwija omu rusorrokano, rundi kuba hamu na itwe kulya ekiihuro obu turukuba tuli hamu n’ab’oruganda na banyaanya itwe. Obu turaamwanjurra Abakristaayo bagenzi baitu, naija kukyetegereza ngu Abakaiso ba Yahwe bali bantu aba buli kiro abaine engeso enungi hamu n’embabazi.
19. Nitusobora kutwaza tuta abanyabuzaale baitu noobu kiraaba ngu tibarukwetegereza kurungi zimu ha nyikiriza zaitu? (1 Petero 3:15)
19 Soma 1 Petero 3:15. Abanyabuzaale baitu nibasobora kuteetegereza ensonga habwaki twanga kukora ebintu ebimu, baitu nibaija kwikara nibaijuka ebikorwa byaitu eby’embabazi hamu n’ekitiinisa eki tubatamu. Noobu kiraaba ngu titukyayejumbira omu bijaguzo rundi omu migenzo ey’etarukusigikirra omu byahandiikirwe, nikisobora kubasemeza kakuba tutamu amaani kumara na bo obwire ha biro ebindi. Ekyokurorraho, nitusobora kubabungira, kulya na bo ebiihuro, rundi kubaha ebisembo.
IKARA NOONIHIRA NGU ABANYABUZAALE BAAWE BALIHIKA BAHEEREZE YAHWE
20. Ekyokurorraho kya Yakobbo nikitugarramu kita amaani?
20 Yakobbo akafeerwa omugisa ogw’okugenda na Yesu omu buheereza bwe, baitu akahika yafooka omwegeswa. (Bag. 1:18, 19; 2:9) Noobu kiraaba ngu atafooke mwegeswa wa Yesu ha kubanza, nitukigumya ngu yataga omutima ha nyegesa za Yesu. Ekyokurorraho, obu naaterekerezebwa omwoyo ogurukwera, akahandiika ebbaruha ey’ekaba erumu amasomo agakaba nigasisana n’ago agali omu Kwegesa kwa Yesu Okwa ha Rusozi.e
21. Habwaki tusemeriire kugumizaamu nitukoonyera abanyabuzaale baitu kandi nitubatwaza omu mulingo ogw’embabazi?
21 Noobu twakukora kyona ekirukusoboka kwoleka abanyabuzaale baitu ebikorwa eby’embabazi nookubooleka ngu nitubafaaho, nibasobora kugumizaamu nibatukora ebikorwa ebitali by’embabazi rundi kutwoleka ngu tibarukugonza kwega hali Yahwe. Eki kakuba kibaho, habwaki tutasemeriire kuhwamu amaani? Habwokuba nitwija kuba nitwegera hali Isiitwe ow’embabazi Yahwe Ruhanga hamu n’Omwana we Yesu buli murundi turaakorra abanyabuzaale baitu ebikorwa eby’embabazi. (Luk. 6:33, 36) Kakuba tugumizaamu nitubooleka okugonza, akasumi nikasobora kuhika nibahindura omulingo baturoramu. Nibasobora n’okwijuka ebintu ebiturukwikiririzaamu ebi twabagambiireho kara. Kakuba tugumizaamu nitulengaho kukoonyera abanyabuzaale baitu n’okubooleka embabazi nibasobora kucwamu kuheereza Yahwe kandi eki nikiija kutuleetera okusemererwa kwingi!
EKIZINA 60 Kutebeza Kujuna Obwomeezi Bwabo
a AMAKURU G’EBIGAMBO: Nkooku kirukukozesebwa omu Baibuli, ebigambo “atali omu mananu” rundi “atali mwikiriza” tibirukumanyisa omuntu ow’ataine diini rundi ow’atarukwikiririza omuli Ruhanga kyonka. (1 Kol. 7:12; rora study note on “an unbelieving wife.”) Baitu omu kicweka kinu, ebigambo binu bikozesiibwe kumanyisa omuntu ow’atarukuramya Yahwe Ruhanga nkooku Abakaiso ba Yahwe bakora.
b Rora ekicweka “Biki Ebitumanyire ha Mulingo Yahwe Arukwija Kucwa Omusango omu Kasumi ak’Omu Maiso?” ekiri omu Omunaara gw’Omulinzi ogwa Maayi 2024, rup. 11, kac. 11-13.
c Hakire bagenzi ba Yesu babiri Yakobbo na Yuda bakafooka Bakristaayo hanyuma ya Yesu kuhumbuuka.
d Rora akasanduuko “Osemeriire Kuba ha Mukoro ogw’Okugaitwa Rundi ogw’Okuziika ogw’Omunyabuzaale ow’Atali omu h’Abakaiso ba Yahwe?”
e Lengesaniza na Yakobbo 1:2 hamu na Matayo 5:11, 12; Yakobbo 1:19 hamu na Matayo 5:22; Yakobbo 1:22; 2:24 hamu na Matayo 7:21; Yakobbo 2:13 hamu na Matayo 5:7; 6:14, 15.
f Kumanya ebirukukiraho ebirukukwata ha mulingo osobora kukwatamu ensonga nk’ezi, rora ekicweka “Ebikaguzo Kuruga omu Basomi Baitu” ekiri omu Watchtower eya Maayi 15, 2002, na Novemba 15, 2007.
g KUSOBORRA EBISISANI Orupapura 4: Munyaanya itwe atakagenzere omu buheereza, n’okusemererwa abanza kuteekaniriza iba ekiihuro.
h KUSOBORRA EKISISANI: Munyaanya itwe nuwe omu atunga obwire abungira nyinazaara ow’atali omu h’Abakaiso ba Yahwe.