Habwaki Enobi Ikara n’Ejanjaara?

Habwaki enobi ikara n’eyeyongera omu nsi? Kumanya ensonga habwaki, tusemeriire kwetegereza enobi nikyo kiki, habwaki abantu batandika kunoba abandi, kandi n’omulingo ejanjaaramu.

Enobi Nikyo Kiki?

Enobi eri nyehurra ey’amaani ey’okutagonza rundi kunobera kimu omuntu rundi abantu abandi. Enyehurra enu tegarukira ha kukwatirwa omuntu ekiniga habw’akacu kake.

KIKI EKIREETERA ABANTU KUTANDIKA KUNOBA ABANDI

Haroho ensonga nyingi ezireetera abantu kutandika kunoba abandi. Abantu nibasobora kunoba abandi hatali ngu baine ekibakozere baitu habwa kiki eki bali. Abo abanobwa nibasobora kutwarwa nk’abantu ababi, abaine ebigendererwa ebibi, rundi nk’abatasobora kuhinduka. Nibasobora kurorwa nk’abahansi muno, nk’abanyanzigwa rundi nk’endugirro y’ebizibu. Abo abainiire abandi enobi nibasobora kuba baabonabonesiibwe, baahikirweho obutalibwinganiza rundi haroho ekintu ekibi ekyabahikireho kyabaletera kuba n’enobi.

OMULINGO ENOBI EJANJAARAMU

Omuntu n’asobora kutandika kunoba abandi n’obwarukuba atabamanyire. Ekyokurorraho, omuntu n’asobora kunoba abandi habwokuba abantu abaarukutamu ekitiinisa, abanyabuzaale rundi abanywani be tibabagonza. Nahabweki, kakuba abantu abamu batunga enobi nibasobora kugituliza abandi kandi n’egumizaamu kujanjaara.

Obutwetegereza omulingo enobi ejanjaaramu, kitukonyera kurora habwaki ijwire omu bantu. Baitu haroho ensonga endi habwaki enobi ijwire omu nsi. Kusobora kumanya ensonga egi, tusemeriire kubanza kumanya endugirro yayo. Baibuli eyoleka endugirro y’enobi.

BAIBULI EYOLEKA ENDUGIRRO Y’ENOBI

Ekisisani ekirukwoleka obucumu bubiri oburukwetoroora kwoleka ebintu ebiretera enobi kujanjaara. 1. Kutamanya ebihikire, ekirukutwarramu kusindikirizibwa, emikura ey’okubalizaaho, hamu n’amakuru. 2. Obutamanya oburukusigikirra ha kiikaro, erangi, rundi ediini. 3. Kutiina empindahinduka, kufeerwa ebintu rundi kutiina ekisobora kubaho. 4. Enobi, ekirukutwarramu kusoroora, kwebaganizaamu, n’obutabanguko.

ENOBI ETALETWE ABANTU. Ekatandikira omu iguru, malaika omu ayahikire yamanywa nka Sitaani Diabolo obuyajemiire Ruhanga. Sitaani obuyatandikire obujeemu bwe “akaba ali muisi.” Habwokuba “mubi [kandi] ise ebisuba,” agumiizeemu kukurakuraniza enobi n’ekiniga. (Yohana 8:44; 1 Yohana 3:11, 12) Baibuli ebazaaho Sitaani nk’anyakwine enobi n’ekiniga.—Yobu 2:7; Okusuku’rwa 12:9, 12, 17.

ABANTU ABATAHIKIRIIRE BAIJUKURA ENOBI. Omuntu ow’okubanza Adamu, akahondera obujeemu bwa Sitaani nauwe yasiisa. Ekyarugiremu, abantu boona bakagwetwa ekibi n’okutahikirra. (Abarumi 5:12) Kaini, mutabani wa Adamu ow’okubanza, akanoba mugenzi we Aberi kandi yamwita. (1 Yohana 3:12) Ky’amananu ngu abantu baingi booleka okugonza n’embabazi. Baitu habw’ekibi ekitwaijukwire, abarukukira obwingi begondeza bonka, baine ihali n’emyehembo, kandi emiringo nk’enu niyo eretera enobi kweyongera.—2 Timoseo 3:1-5.

OMUNTU OBWATAGONZA ABANTU ABATARUKUSISANA NAUWE. Ensi eiturumu eretera enobi kweyongera kuraba omu kukurakuraniza entekereza n’ebikorwa ebitali by’embabazi. Kusoroorangana, kujuma abandi, kubaza ebigambo ebirukwendereza, n’okusiisa ebintu byeyongiire habwokuba “ensi yona ikaire omu mubi,” Sitaani Diabolo.—1 Yohana 5:19.

Baibuli tegarukira ha kwoleka endugirro y’enobi. Etugambira n’ekisobora kugimaraho.