Akasumi Enobi Obweriba Etakyaroho!
N’obukiraaba ngu nitusobora kweyihamu enobi omu mitima yaitu, titusobora kulema ebikorwa n’entekereza z’abandi. Hati, nooha asobora kumarraho kimu enobi?
Yahwe wenka nuwe asobora kumarraho kimu enobi enyakuroho kasumi kanu. Baibuli n’eyoleka ngu eki nikyo araganiize kukora.—Enfumo 20:22.
RUHANGA ALIMARAHO ENDUGIRRO Y’ENOBI
1. SITAANI DIABOLO. Sitaani nuwe ndugirro y’enobi ey’eroho kasumi kanu. Ruhanga alihwerekereza Sitaani hamu naabo abanoba abandi nka uwe.—Zabuli 37:38; Abarumi 16:20.
2. ENSI YA SITAANI ENYAKWIJWIRE ENOBI. Ruhanga naija kumaraho ebintu byona ebiretaho enobi, otwaliremu abalemi ababi hamu n’abebembezi b’amadiini abakurakuraniza enobi. Ekindi, Ruhanga naija kumaraho entekaniza ey’eby’obusuubuzi enyakwijwire omururu, enguzi hamu n’obusuma.—2 Petero 3:13.
3. OBUTAHIKIRRA BW’ABANTU. Baibuli eyoleka ngu abantu boona bakagwetwa obutahikirra, ekibaletera kuba n’entekereza hamu n’enyehurra embi n’okukora ebitahikire. (Abarumi 5:12) Kinu nikyo kibaletera kunoba abandi n’okugonza kubakora kubi. Ruhanga naija kukonyera abantu kweyihiramu kimu enyehurra n’entekereza eziretwa obutahikirra kandi byona ebireta enobi birihweraho kimu ebiro n’ebiro.—Isaya 54:13.
BAIBULI N’ERAGANIZA AKASUMI ENOBI OBWERIBA ETAKYAROHO
1. OBUTALIBWINGANIZA BULIHWAHO. Obukama bwa Ruhanga bulirema ensi nibusigikirra omu iguru, kandi buliretaho obwinganiza omu nsi ebiro n’ebiro. (Danieri 2:44) Okusoroorangana kulihweraho kimu. Ruhanga alikonyera abantu kutunga obwinganiza.—Luka 18:7.
2. BULI OMU ALITUNGA OBUSINGE. Busaho muntu ow’alibonabona habw’obutabanguko rundi obulemu. (Zabuli 46:9) Ensi eriijura obusinge habwokuba buli muntu aliba n’abugonza.—Zabuli 72:7.
3. ABANTU BALYOMEERA BALI OMU NYIKARA ENUNGI. Abantu boona omu nsi balyolekangana okugonza okw’amananu. (Matayo 22:39) Busaho n’omu alituntura habw’ebitekerezo ebibi rundi habw’okwijuka ebintu ebibi ebyamubaireho. (Isaya 65:17) Kasumi ako, enobi obweriba emazire kuhwaho, abantu “balikyanganuka obwobusinge obwingi.”—Zabuli 37:11.
Oine ekihika eky’okurora ensi nk’engi? Na kasumi kanu, abantu baingi nibeega kuleka enobi kurabira omu kuteeka omu nkora emisingi ya Baibuli. (Zabuli 37:8) Eki nikyo obukaikuru n’obukaikuru bw’Abakaiso ba Yahwe kwetoroora ensi yoona baliyo nibakora. N’obukiraaba ngu nibaruga omu biikaro n’enyikara ezirukwahukana, bali omu bumu kandi bagonzangana nk’eka.—Isaya 2:2-4.
Abakaiso ba Yahwe nibaija kusemererwa kukugambiraho ebibeegere, byabakonyera kugumira obutalibwinganiza n’okusoroora omu bantu. Ebyorayega nibisobora kukukonyera kuleka enobi, otandike kwoleka okugonza. Noija kwega nk’oku osobora kutwaza abantu boona omu mulingo gw’embabazi otwaliiremu naabo abatarukusiima rundi abarukukunoba. Ekirarugamu, noija kweyongera kusemererwa hati, kandi n’enkoragana yaawe n’abandi niija kweyongera kusemera. Ekirukukirayo obukuru, noija kwega eky’osobora kukora kwikara hansi y’Obukama bwa Ruhanga nambere enobi eriba etakyaroho, habw’ebiro n’ebiro.—Zabuli 37:29.