OBWOMEEZI BWAITU NK’ABAKRISTAAYO

Kukwataniza Kutebeza omu Biikaro Ebirumu Abantu Abarukubaza Endimi Ezirukwahukana

Ow’oruganda na mukazi we bataangana omusaija na mutabani we omu buheereza abarukubaza orulimi orukwahukana n’orwabo

Abantu bakira kuhuliiriza obubahurra amakuru ag’Obukama omu rulimi rwabo. Obundi enu niyo nsonga habwaki ha kiro kya Pentekote ey’omwaka 33 C.E., Yahwe yasobozese Abayudaaya “kuruga omu mahanga goona aganyakuli hansi yiguru” kuhurra amakuru amarungi “omu ngamba” zabo n’obubaraaba bali bamanyire endimi nk’Oruheburaniya rundi Oruyonaani. (Eng 2:5, 8) Ebitebe ebiri omu biikaro ebirumu abantu abarukubaza endimi ezirukwahukana, nibisobora kuba biine ekiikaro kimu eky’okutebezaamu. Abatebezi abali omu bitebe nka binu nibasobora bata kukwataniza kutebeza omu biikaro nk’ebi, nukwo bakeriinda kubiihiza abantu habw’okubatebeza buli kaire?

Mwehanuzehogangana (Nfu 15:22): Abaroleerezi b’obuhereeza basemeriire kwehanuzaahongana nukwo bakatunga omulingo ogurukukira oburungi ogw’ebitebe by’abo bisobora kutebezaamu amakuru amarungi. Ekiikaro ekimurukutebezamu obukiraaba kitaito ebitebe ebirukutebeza omu ndimi ezindi nibisobora kugonza ekitebe kyanyu kitatebeza omu maka agarukubaza orulimi rwabyo. Baitu, obubiraaba bitarukusobora kubungira amaka ago goona habwokuba genaganagire muno, nibisobora kugonza mutebeze omu maka ago baitu mubagambire obuharaaba haliyo omuntu ayolekere okugonza. (od-E 93 ¶37) Rundi nibisobora kusaba ekitebe kyanyu kubaha endagirro nambere abantu abarukubaza orulimi rwabo bali nukwo batebezeyo. (km-E 7/12 5, akasanduuko) Baitu mwikale mukimanyire ngu, eka emu n’esobora kubamu abantu abarukubaza endimi ezirukwahukana. Entekaniza zoona ez’okutebeza omu biikaro binu tizisemeriire kucwa ebiragiro.
Kwataniza n’abandi (Bef 4:16): Hondera kurungi oburagirizi kuruga hali omuroleerezi w’obuheereza. Oine omuntu ow’orukwegesa Baibuli baitu nayetegereza muno orulimi orukozesebwa omu kitebe ekindi? Omwegi ogu n’asobora kwanguha kukurakurana kakuba omuha omuntu kuruga omu kitebe rundi guruupu nambere babaza orulimi orw’akwetegereza.
Wetekanize kara (Nfu 15:28; 16:1): Kakuba otangaana omuntu arukubaza orulimi orundi, lengaho nk’oku orukusobora kumutebeza. Tekerazaaho kara endimi ez’osobora kusanga abantu nibabaza nukwo kikukonyere kwetekaniza. Nosobora kuhanura kara empindura za Baibuli hamu na vidiyo. Kandi nosobora n’okukozesa puroguraamu eya JW Language kwega kuramukya omu ndimi ezi.