6 REBBEKA
Akaba Ayeteekaniize Kulekaho Eka y’Owabu
REBBEKA akagenda ha iziba ahimbire ensoha enkooto. Bukaba buli bwire bwa rwebagyo, kandi kakaba kali kaire ak’okuleeta amaizi ag’okukozesa omuka. Omulimo ogu, yagukoraga buli kiro. Obu akaba naagenda ha iziba, akarora guruupu y’abantu abaakaba atamanyire bali n’engamiya zaabo haihi n’iziba! Baitu nabwo, akagumizaamu yagenda ha iziba, yataha amaizi.
Obu akaba ali haihi kwetweka ensoha ye kugaruka omuka, omusaija ow’akuzire omu myaka kuruga omu basaija abo akaija nambere ali kandi yamugambira ati: ‘Ninkusaba ompeho otwizi omu nsoha yaawe nyweho.’ Rebbeka atange kwoleka amakune abantu banu abaakaba atamanyire. Yatuura ensoha ye, yamugambira ati: “Nywa, mukama wange,” kandi yamuha amaizi yanywa kuhikya iroho obu lyamuhoireho.
Hanyuma, akakora n’ekintu ekirukukiraho. Akeehayo kutahira engamiya ikumi amaizi ez’abasaija abo. Omusaija onu akahunirra muno, kurora omwisiki omuto kandi omurungi naasomba amaizi kuhikya engamiya obu zaanywire zaahaaguka. Omusaija onu akamukaguza ngu akaba ali muhara w’oha, kandi yamukaguza ab’owabu obu baraaba nibasobora kubaraaza habw’ekiro kimu. Rebbeka atange kubakunira. Akabateekaniriza ah’okuraara kandi yaha n’ebisoro byabo ebyokulya.
Rebbeka akaba atakimanyire ngu, Yahwe nuwe akaba akozere enteekaniza ey’okutangatangana abasaija abo. Omusaija ow’akaba akuzire omu myaka ow’asobora kuba akaba ali Eryeza, akaba ali muheereza wa Ibburahimu omwesigwa. Enyumaho, mukama we Ibburahimu, akaba amusabire kugenda omu nsi ya hara kuserurra mutabani we kandi ow’akaba naija kufooka omugwetwa, omukazi. Ibburahimu akamuteererra ngu amuserurre omukazi ow’akaba naaruga omu ka ey’erukuramya Yahwe. Eryeza akaba asabire Yahwe kumuha omugisa. Akasaba Ruhanga kumwoleka akokurorraho ngu omwisiki ou araakoma kuba mukazi wa Isaka, amwoleke amakune, kandi mali Rebbeka akagamwoleka!
Rebbeka atange kukoonyera abasaija banu abaakaba atakarorahoga. Ky’amananu ngu omu kasumi ako, kyali kitali ky’akabi kwoleka abantu abootamanyire amakune. Baitu kasumi kanu, abantu ‘baine ekiniga ekihinguraine, kandi tibagonza oburungi.’ (2 Tim. 3:1, 3) Baitu n’omu busumi obu, Rebbeka akataho ekyokurorraho ekirungi muno. Atagarukire ha kwoleka amakune kyonka, baitu akooleka n’obumanzi obw’amaani.
Obu baahikire omu ka, Rebbeka nubwo yayetegeriize ensonga ey’ekaba ereesere abasaija banu. Ise Rebbeka arukwetwa Bbesweri, hamu na mugenzi we Labbaani, bakaraaliza Eryeza kwikarra baliire hamu ekiihuro. Baitu Eryeza akabasaba kubanza kubagambira ensonga ey’ekaba emuleesere. Akabasoborra omulingo Yahwe akaba amukoonyiire kutunga Rebbeka. Abasaija banu babiri bakakirorra kimu ngu Yahwe akaba amukoonyiire kandi baagamba bati: “Mali otumirwe Yahwe.”
Kiki Rebbeka eki yakozere obu yakyetegeriize ngu Ruhanga akaba naagonza agende hara kandi aswerwe omusaija ou akaba atakaroraga?
Kiki Rebbeka eki yaakukozere? Ibburahimu akaba agambire ngu omwisiki ogu akaba naasobora kwanga kugenda Kanaani na Eryeza. Nahabweki, akaba aine obugabe bw’okucwamu kugenda rundi kutagenda. Ekiro ekyayongireho, Eryeza akasaba obu araaba naasobora kugenda na Rebbeka. Ab’eka ya Rebbeka bakamukaguza encwamu ye ha nsonga egi. Rebbeka akabagarukamu omu mulingo ogwanguhire ati: ‘Ningonza kugenda.’ Akaba ayehaireyo kulekaho ab’omu ka y’owabuowabu kandi obundi ataine n’okunihira okw’okwongera kubarora. Habwaki yayolekere obumanzi bwa mulingo ogu? Nikizooka ngu na uwe wenka akakirora ngu Yahwe nikyo akaba naagonza.
Hanyuma y’okumara wiiki nyingi nibagenda orugendo oruraihire ha ngamiya, bakamara baahika omu nkambi ya Ibburahimu omu Kanaani. Omu kairirizi, Rebbeka akarora omusaija ow’akaba ali wenka naarubata omu musiri kandi naayecumiitiriza. Obu yakyetegeriize ngu ni Isaka, akeesweka ha mutwe, ekyayolekere ngu akaba amwikiriize kuba musaija we. Isaka ow’akaba aine emyaka 40 omu kasumi ako, akaba naaganya habw’okufa kwa Saara nyina ow’akaba amazire emyaka esatu afiire. Rebbeka yaakutungire obumanzi obw’okuhikiiriza obujunaanizibwa Ruhanga obu akaba amuhaire? Yakubaire omukazi arukugonza, arukusagika, kandi akakoonyera iba Isaka kuheereza Yahwe nk’omutwe gw’eka? Baibuli neeyoleka ngu eki nikyo yakozere. Kandi eyoleka omulingo Isaka yayehuliire hali Rebbeka eti: “Yamugonza: Isaka yahumuzibwa habwokufa kwa nyina.”
Soma Ebyahandiikirwe ebirukumubazaaho:
Okubanza 24:1-67; 25:20
Kuleeta hamu ebiteekerezo:
Miringo ki Rebbeka ei yayolekeremu obumanzi?
Yega Ebirukukiraho
1. Eryeza akeehurra ata hanyuma ya Ibburahimu kutunga abaana, baitu kiki ekirukwoleka ngu atakwatwe ihali? (Kub. 15:2-4; 24:12; w97 1/1 30 ¶2-wcgr)
2. Habwaki Ibburahimu akaba naagonza mukazi wa Isaka agende Kanaani omu kiikaro kya Isaka kugenda omu rubuga nambere Rebbeka akaba naaruga? (w97 1/1 30 ¶3-wcgr)
3. Ebisembo ebyahairwe Rebbeka n’ab’omu ka ye bikaba nibikiikirra ki? (it “Rebbeka” ¶4-wcgr)
4. Bazaaho orugendo Rebbeka oru yagenzere kuruga Harani kugenda omu ka ya Isaka omu Negebbu. (wp16.3 15 ¶1-wcgr) A
www.LifeintheHolyLand.com
Ekisisani A: Negebbu kikaba kiri kiikaro ekirukwikarwamu abantu baingi kandi nuho Ibburahimu yaliisizaaga amagana ge
Ebikaguzo eby’Okwecumiitirizaaho
Kiki eki turukwegera hali Ibburahimu, Rebbeka na Isaka obukirukuhika ha kukomamu ou oraataaha na uwe obuswere? (Kub. 24:2, 3; 27:46–28:1)
Rebbeka akaba ali mukazi omwekambi, omugabi kandi arukutamu abandi ekitiinisa. Banyaanya itwe nibasobora kumwegeraho bata kasumi kanu? B
Ekisisani B
Noosobora ota kwegera ha bumanzi bwa Rebbeka?
Eki Birukunyegesa Hali Yahwe n’Ekigendererwa Kye
Isomo linu nirikwegesa ki hali Yahwe?
Ekyokurorraho kinu nikihikaana kita n’ebigendererwa bya Yahwe?
Kiki eki waakugondeze kukaguza Rebbeka obu alihumbuuka?
Manya na Binu
Weetegereze omulingo Rebbeka yagumiizeemu naayoleka obumanzi nk’omukazi omwesigwa kandi nk’omuzaire.
“Rebbeka—Omukazi Omwekambi Ayatiinaga Ruhanga” (w04 4/15 8-11-wcgr)
Masomo ki abaana aga barukwegera hali Rebbeka?
“Emiringo ya Rebbeka Enungi” (Ebicweka bya ha mukura “Kuteera Ebisisani”-E)