Akata Obwomeezi Bwe omu Kabi Kulinda Eka Ye

YAKOBBO obu akaba atakafiire, akagamba ngu ebiro by’obwomeezi bwe bikaba “bike” kandi “bibi.” (Kub. 47:9) Eki yabalize gakaba gali mananu! Obu akaba akyali omu myaka y’obusigazi, akairuka yagenda omu nsi eya hara omu Harani habwokuba mugenzi we akaba naagonza kumwita. Obu akaba ali omu Harani, akagonza Rakeeri, baitu Labbaani ise Rakeeri akamubiiha yabanza kumuha mugenzi wa Rakeeri, Leeya. Nahabweki, Yakobbo akaba aine abakazi babiri abakaba batarukugonzangana. Yakobbo akamara emyaka nyingi naakorra Labbaani. Baitu Labbaani yaikaraga naalengaho kwiba Yakobbo obu naahindura omusaara gwe. Baitu Yakobbo akooleka obumanzi obw’amaani, okwikiriza hamu n’okugumiisiriza.

Kiro kimu, Yahwe akagambira Yakobbo ngu akasumi kakaba kahikire kuruga Harani, agaruke omu nsi y’owabu Kanaani. Baitu kinu kikaba kiri ky’akabi habwokuba Labbaani akaba aine omururu kandi akaba naateekereza ngu buli kimu Yakobbo eki akaba aine, kikaba kiri kye. Yakobbo akagambira ab’omu ka ye kandi baasorooza ebintu byabo baagenda bataragire Labbaani. Labbaani obu yakimanyire, akasorooza abasaija be kandi baabahambya. Hanyuma, akabasanga omu muhanda yakunganiza Yakobbo habw’okugenda atamuragire. Ekindi, Labbaani akatiinisiriza Yakobbo kandi yagamba ati: “Kiri omu busobozi obwomukono gwange okukukora kubi.” Baitu n’obumanzi, Yakobbo akeetonganaho. Akagambira Labbaani ngu nuwe akaba amutwaize omu mulingo ogutali gw’obwinganiza kandi ogw’obugobya kumara emyaka nyingi. Baitu nabwo, Yakobbo akaba naagonza kugarraho obusinge. Yakobbo na Labbaani obu bakaba batakarugirehongana bakakora endagaano ey’obusinge.

Baitu ebizibu bya Yakobbo bikaba bitakahoireho, habwokuba mugenzi we Esau akaba naija kumutangatangana. Emyaka nyingi enyuma, Nyinabo, Rebbeka akaba agambiire Yakobbo ngu, Esau akaba naagonza kumwita. Esau akaba naateekereza ngu Yakobbo amwibireho omugisa kuruga hali ise ogukaba gusemeriire kuba gwe. Baitu hati, Yakobbo akaba naagonza kugarraho obusinge na mugenzi we Esau. Akakyetegereza ngu Esau na basaija be 400 bakaba nibaija kumutangatangana n’ab’omu ka ye. Yakobbo akabanza kutumayo abasaija be kandi yabaha n’ebisembo eby’omuhendo babimutwarre. Baitu eki mali kikaba nikimara, kumaraho ekiniga kya Esau? Baibuli egamba ngu: “[Yakobbo] yatina muno, yatuntura.” Hanyuma, hakabaho ekintu ekirukuhuniiriza.

Omu bwire bw’ekiro, Yakobbo obu akaba ali wenka, akarora omusaija ou akaba atamanyire. Akaba ali malaika wa Yahwe kandi baatandika kufukaana. Habwokuba Yakobbo akateekereza ngu malaika akaba naija kumuha omugisa, akatunga obumanzi obw’okufukaana na malaika. Yakobbo ataleke kurwana na malaika noobu kiraaba ngu akaba aine emyaka 97 kandi malaika akaba naamukira amaani. Akarwana muno yahika na ha rulengo rw’okurra. (Hos. 12:4) Yakobbo akaba amanyire obukuru bw’omugisa kuruga hali Yahwe, nahabweki akaba acweriiremu kimu kukora kyona ekirukusoboka kugutunga. Obwire obu bwakiire, malaika akakwata Yakobbo ha nyugunyu kandi yahugura igufa lye. Baitu malaika akagambira Yakobbo ekintu ekirukusemeza ngu, hati ibara lye lifookere Isaleeri. Ibara linu nirimanyisa kurwana na Ruhanga. Yakobbo akaikara naarwana na malaika, kandi yatamu amaani maingi kusobora kutunga omugisa kuruga hali Yahwe.

Yakobbo akacumbagira yagaruka omuka ye. Kandi obu, Esau akaba aliyo naija kumutangatangana ali hamu n’abasaija be 400. Yakobbo akagenda wenka kubatangatangana. Yakobbo obu akaba ali haihi kumuhikaho, akamwinamira emirundi musanju. Hanyuma, Esau akairuka yaija nambere ali, ataine ky’okurwanisa kyona omu ngaro ze. Akanjurra emikono ye yamugwa omu kifuba! Boona bakarra. Obwebundaazi bwa Yakobbo hamu n’ebisembo ebi yasindikire, bikahindura omutima gwa Esau, yaleka ekiniga. Ekindi, naasobora kuba yakwasirweho habw’obumanzi bwa Yakobbo. Yakobbo akagarraho obusinge na mugenzi we.

Yakobbo akaikara naacumbagira obwomeezi bwe bwona habw’enyugunyu ye kuhuguka. Kandi akatunga n’emitalibaine endi nyingi. Baitu ateeyijukye habw’encwamu ezi akaba akozere kworobera Yahwe n’okufukaana na malaika. Obwire bukahika, omurago Yahwe akaba araganiize Yakobbo gwahikirra. Omurago ogu nugwo, Isaleeri kufooka ihanga erikooto. (Kub. 28:14) Kandi egi niyo ensonga habwaki obwire obumu Baibuli ebazaaho Yahwe nka “Ruhanga wa Yakobbo.” (Kurug. 3:6) Yesu na uwe akakozesa ebigambo ebi. Akongerraho yagamba ngu Yahwe: “Tali Ruhanga ow’abafu, baitu ow’aboomeezi, habwokuba hali Uwe boona boomeezi.” (Luk. 20:37, 38) Nahabweki, Yakobbo naija kutunga obusumi obw’omumaiso oburungi. Omu nsi empyaka, naija kwomeera ebiro n’ebiro kandi aine okusemererwa kwingi muno!

Soma Ebyahandiikirwe ebirukumubazaaho:

• Okubanza 27:41-45; 31:1-29, 36-55; 32:1–33:16

Kuleeta hamu ebiteekerezo:

Miringo ki Yakobbo ei yayolekeremu obumanzi?

Yega Ebirukukiraho

1. 1. Habwaki Yahwe yataireho obulyo, kurora ngu Yakobbo yatunga obugwetwa obw’omwana omuzigaijo omu kiikaro kya Esau? (w03 10/15 29 ¶2-wcgr)

   Eky’okugarukamu kyawe

2. 2. Yahwe akaleetera Yakobbo kuroota ekirooto kya mulingo ki, kandi kikamukoonyera kugumya ki? (w03 10/15 28 ¶3–29 ¶1-wcgr) A

   Eky’okugarukamu kyawe

   

3. 3. Habwaki Yakobbo akaba naakigumya ngu naasobora kutunga omugisa kuruga hali malaika? (w03 10/15 31 ¶1-wcgr) B

   Eky’okugarukamu kyawe

   

4. 4. Bintu ki Yakobbo ebi yakozere kulinda eka ye hali engeso embi ez’Abakanaani? (w95 9/15 21 ¶4, obugambo obuli hansi-wcgr)

   Eky’okugarukamu kyawe

Ebikaguzo eby’Okwecumiitirizaaho

• Yakobbo akeehurra ngu aine obujunaanizibwa obw’okurolerra kurungi entaama za Labbaani zoona. (Kub. 31:38-40) Abaliisa Abakristaayo kasumi kanu nibasobora bata kwoleka ngu nibafaaho muno entaama za Yahwe? C

  Eky’okugarukamu kyawe

  

• Yakobbo obu akaba atiinire, akasaba Yahwe. (Kub. 32:6-12) Kiki eki orukwegera hali Yakobbo ha mulingo tusemeriire kusabamu?

  Eky’okugarukamu kyawe

• Noosobora ota kwegera ha kyokurorraho kya Yakobbo eky’obumanzi?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Yakobbo obu alihumbuuka?

  Eky’okugarukamu kyawe

Manya na Binu

Nitusobora tuta kwegera hali Yakobbo kakuba tukyetegereza ngu tubihiize Omukristaayo mugenzi waitu?

“Mugumizeemu ‘Nimumuhurra’” (w21.12 25-27 ¶10-18)

Kozesa oruganikyo runu orw’omu Baibuli oruli omu mulingo gw’ebisisani kwegesa eka yaawe ebirukukwata hali Yakobbo.

“Yakobbo na Esau” (ijwis ekicweka 3-wcgr)