2 NUHA
Akacwera Ensi Omusango
HANYUMA y’okurabaho obwire Enoka amazire kufa, bamalaika abamu omu iguru bakajeemera Ruhanga. Bamalaika abo ababi bakeegomba abakazi omu nsi, nahabweki bakajwara emibiri y’abantu baayetungira abakazi boona ababakaba nibagonza. Bakazaara abaana abaayeserwe Nefirimu abakaba bali bakooto muno, abaagonzaaga kurwana, kandi abakaali muno. Ekyokurorraho kyabo ekibi kikaleetera abantu omu nsi kufooka babi muno. Ruhanga obu yahangire abantu, akabaha obwomeezi oburungi, baitu obwomeezi bwabo bukasiisikara, habwokuba bakafooka babi kandi baagonza muno kurwana. Baitu hakaba haroho omusaija omu ow’akaba ali w’embaganiza kandi ogu nuwe, Nuha mwijukuru wa Enoka.
Nuha akafooka musaija ow’ahikiriire nka Enoka. Baibuli egamba eti: “Nuha [yarubataga] hamu na Ruhanga.” Obwire bukahika yaswera kandi uwe na mukazi we, bakeegesa batabani baabo basatu kworobera Yahwe. Eki kikaleetera eka yabo kuba y’embaganiza muno hali abantu abakaba babeetoroire.
Kiro kimu, Yahwe akagambira Nuha ngu akaba acwiremu kuhwerekereza abantu boona ababi omu nsi, naakozesa Okusandaara kw’Amaizi. Baitu Yahwe akaha Nuha okunihira. Akamugambira kwombeka eryato erikooto nukwo ajune obwomeezi obw’abantu abamu abarungi. Nuha akaba atakaroraga Okusandaara kw’Amaizi omu nsi yoona, Yahwe oku akaba abalizeeho. Kandi akaba atakombekahoga ekintu ekikooto muno nk’eryato eri akaba aragiirwe kwombeka. Baitu akeesiga Yahwe ebi akaba amuraganiize kandi yatandika kwombeka.
Nuha n’eka ye bakaba baine abanyanzigwa ab’amaani kandi abarukutiinisa abakaba batarukugonza obutumwa bwabo n’omulimo ogu bakaba nibakora
Kikaba nikyetaagisa Nuha n’eka ye kuba bamanzi, kusobora kukora omulimo gunu. Abantu baingi nibasobora kuba baabahakaniize kandi baabasekeereza. Ekindi, bamalaika abakaba bajwaire omubiri bakaba bali bantu abarukutiinisa muno kandi abaana baabo baatwazaaga kubi abantu. Baitu Nuha, na mukazi we, batabani be basatu n’abakazi baabo, boona hamu munaana bakateeka omutima ha mulimo. Bakamara emyaka haihi nka 50 nibombeka eryato.
Omu kasumi ako, hakaba haroho ekintu ekindi Nuha eki akaba naakora. Baibuli emweta “omutebezi w’okuhikirra.” Nk’omutwe gw’eka, akeebembera omu kugambira abantu ha kikaba nikiija, baitu busaho n’omu ayahuliriize oihireho ab’eka ye. Nikizooka ngu n’abanyabuzaale ba Nuha baingi bakanga kuhuliiriza. Abantu bakaba batarukugonza kuleka kukora ebintu ebibi. Omusaija onu ow’okwikiriza akaba ali w’embaganiza muno hali abantu ab’omu kasumi ako. Egi niyo ensonga habwaki Baibuli emubazaaho eti: “Kuraba omu kwikiriza akacwera ensi omusango.”
Obwire bukahika eryato lyahwa kwombekwa. Nuha n’eka ye bakaba basemeriire kuteekamu ebyokulya ebikaba nibiija kubakoonyera hamu n’ebyokulya eby’ebisoro ebi bakaba nibaija kutahyamu. Hanyuma y’obwire, haroho ekintu ekirukuhuniiriza ekyabaireho. Ebika by’ebisoro byona, ekisaija n’ekikazi bikeereta bitahambiriziibwe, ‘byataaha bibiri-bibiri hali Nuha omu bwato!’
Ruhanga akaba amazire kuragira Nuha kutaahya eka ye omu lyato, habwokuba omu biro musanju enjura ekaba niija kutandika kugwa. Teekerezaaho eka ya Nuha neekora n’amaani omu bwire bw’okumalirra kutaahya omu lyato ebintu ebirukwetaagisibwa n’okuteekaniza ebi bakaba bamazire kutamu. Kinu nikisobora kuba kyaleetiire abantu kweyongera kubasekeereza. Obu baamazire kutaahya ebintu byona ebi barukwetaaga omu lyato, Yahwe akakinga orwigi. Boona abakaba nibasekeereza Nuha, baine kuba baatiirwe ibumba kanwa. Hanyuma, enjura ekatandika kugwa! Amaizi gakatandika kukanya, gaagumizaamu nigeeyongera kumara ebiro 40, kuhikya obu gaaswekere ensozi. Gunu nugwo omulingo Yahwe yamazireho obubi omu nsi.
Nuha n’eka ye bakamara omu lyato obwire oburukuhingura omu mwaka gumu bataine akabi koona akabahikireho. Omu kasumi ako, amaizi gakagenda nigakeeha mpora-mpora. Ha kumalirra, eryato likemerra ha rusozi, hanyuma Yahwe yabagambira barugemu. Obu baarugire omu lyato, bakaramya Yahwe nibamusiima habw’okubajuna. Yahwe akabaraganiza ngu akaba atarukwija kugaruka kuleeta Okusandaara kw’Amaizi nkooku, kandi yabaha omuhangaizima nk’akokurorraho akarukugumya okuraganiza kwe.
Buli muntu weena ow’ayomiire hati, akaruga omu ka egi. Mali nitusiima muno ngu bakatunga obumanzi obw’okuba b’embaganiza omu nsi egi embi!
Soma Ebyahandiikirwe ebirukumubazaaho:
Okubanza 6:1–8:22; 9:8-19
Abahebburaniya 11:7
2 Petero 2:5
Kuleeta hamu ebiteekerezo:
Miringo ki Nuha ei yayolekeremu obumanzi?
Yega Ebirukukiraho
1. Obwomeezi bukaba buli buta, Okusandaara kw’Amaizi kutakabaireho? (w02 3/1 5 ¶3–6 ¶4-wcgr)
2. Ni di Ruhanga obu yagambiire Nuha kwombeka Eryato? Ruhanga akagambira Nuha ngu Okusandaara kw’Amaizi kwakutandikire di? (w12 4/15 23 ¶5-8-wcgr)
3. Habwaki nitusobora kwikiriza ngu Okusandaara kw’Amaizi kukabaho kwo? (ijwbq ekicweka 156 ¶2-5, akasanduuko-wcgr) A
Historic Collection/Alamy Stock Photo
Ekisisani A: Oruganikyo rw’Abahindi rubazaaho omusaija ayayombekere Eryato kusobora kukiraho okusandaara kw’amaizi okw’ensi yoona. Hanyuma y’okusandaara kw’amaizi, akahayo ekihongwa kandi yafooka isenkuru abantu boona
4. Kintu ki ekyabaireho obu haarabireho emyaka erukuhingura omu kikumi hanyuma y’Okusandaara kw’Amaizi? Kandi nikisobora kuba kyakwasireho kita Nuha ow’akaba agurusire? (it “Nuha” Na. 1 ¶12-wcgr) B
Ekisisani B
Ebikaguzo eby’Okwecumiitirizaaho
Akasumi akaturumu nikasisana kata n’ebiro bya Nuha? (Mat. 24:36-39)
Ekyokurorraho kya Nuha nikwegesa ki ha bukuru . . .
obw’okweteekaniza kurungi? C
Ekisisani C
obw’okukora n’amaani? D
Ekisisani D
obw’okugumiisiriza? E
Ekisisani E
Noosobora ota kwegera ha bumanzi bwa Nuha?
Eki Birukunyegesa Hali Yahwe n’Ekigendererwa Kye
Isomo linu nirikwegesa ki hali Yahwe?
Ekyokurorraho kinu nikihikaana kita n’ebigendererwa bya Yahwe?
Kiki eki waakugondeze kukaguza Nuha obu alihumbuuka?
Manya na Binu
Rora omulingo nyineeka arukwekamba kwegera ha kyokurorraho kya Nuha.
Koonyera abaana baawe kwegera hali Nuha.