Courtesy Jamie Christiani/Bulletin of the Atomic Scientists
IKARA OLI BULINDAARA!
Esaaha eya Mukaaga ey’Okumalirra Iriire Haihi
Omu Janwali 27, 2026, Abanyasayansi bakagamba ngu esaaha eya mukaaga gw’ekiro ey’okumalirra iriire haihi. Esaaha mukaaga ez’ekiro nizikikiira akasumi abantu obu balihwerekerezangana kandi bakahwerekereza n’ensi.
Orupapura rw’amakuru orurukwetwa Bulletin of the Atomic Scientists nirugamba ngu, “esaaha eya mukaaga ey’okumalirra ey’okuhwerekerezebwa iriire haihi muno kukira na kara.”
Omunyasayansi arukwetwa Alexandra Bell, ow’arukwebembera orupapura rw’amakuru orurukwetwa Bulletin of the Atomic Scientists akagamba ati: “Abanyasayansi nibakozesa esaaha ya mukaaga ey’okumalirra kutwegesa isomo erikuru muno. Ebintu eby’akabi byeyongiire muno omu nsi, abantu tibakyasobora kukorra hamu kumaraho ebizibu kandi ebintu nibyeyongera kusiisikarra kimu. Abantu nibetaaga kukora empindahinduka, kandi eki nikisoboka. Baitu, abantu omu nsi yoona basemeriire kwekambisa abebembezi baabo kugira eki baakoraho omu bwangu.”
Abantu boona nibaija kuhwerekerezangana kandi bahwerekereze n’ensi? Tusemeriire kutiina ebiraabaho omu kasumi ak’omumaiso? Baibuli ekibazaaho ki?
Kiki ekiraabaho omu kasumi ak’omumaiso
Baibuli egamba ngu ‘ensi eriikaraho ebiro byona’ kandi nihaija kubaho abantu ‘abaraagiikaramuga ebiro n’ebiro.’ (Omugambizi 1:4; Zabbuli 37:29) Nahabweki tibarukwija kuhwerekereza ensi rundi kugisiisa kuhika ha rulengo ngu tesobora kwikarwamu.
Baitu, Baibuli tebazaaho okuhwerekerra kw’ensi eiturukwikaramu. Ekyokurorraho egamba ngu “ensi neehwaho.”—1 Yohaana 2:17.
Kumanya Baibuli eky’emanyisa obu ebazaaho okuhwaho kw’ensi, soma ekicweka “Ensi Niija Kuhwaho? Kiki Ekirukukyoleka?”
Kumanya Baibuli eky’egamba ha bintu ebirukugenda kubaho omu nsi, soma ekicweka “Ensi n’Ehwaho Di?”
Ikara Oine Enteekereza Enungi Hali Akasumi ak’Omumaiso
Baibuli n’esobora kutukoonyera kwikara twine enteekereza enungi noobu kiraaba ngu ensi erumu ebizibu bingi kasumi kanu. Omu mulingo ki?
Baibuli etuha obuhabuzi obutukoonyera omu bwomeezi bwaitu. (2 Timoseo 3:16, 17) Ekyokurorraho, soma ekicweka “Omulingo Osobora Kugumira Okwetuntura” kurora omulingo Baibuli esobora kukukoonyera kwikara oine enteekereza enungi noobu kiraaba ngu oine ebizibu ebi orukurabamu.
Baitu etuha okunihira okurukwesigwa okw’omu kasumi ak’omumaiso. (Abarooma 15:4) Etusoborra biki byonyini ebi tusemeriire kulindirra kasumi kanu n’omu kasumi ak’omumaiso, ekitukoonyera kwikara tugumire noobu haraabaho ki omu nsi.
Baitu kusobora kwega ebirukukiraho omu Baibuli, nooraalizibwa kusaba kwegesebwa Baibuli hataroho kusasura sente.