Omuntu n’Asobora Kucwamu Kuruga omu Diini ey’Abakaiso ba Yahwe?

Ego. Omuntu n’asobora kuruga omu kitebe kyaitu omu miringo ebiri:

• N’asobora kusaba. Kuraba omu bigambo rundi omu buhandiiki, omuntu n’asobora kwoleka ngu takyagonza kuba omu h’Abakaiso ba Yahwe.

• Ebikorwa. Omuntu n’asobora kukora ekintu ekirukwoleka ngu takyagonza kuba omu h’Abakaiso ba Yahwe. (1 Petero 5:9) Ekyokurorraho, n’asobora kweteranizaaho ediini endi kandi nakyoleka ngu nagonza kugiikaramu.—1 Yohana 2:19.

Baitu kakuba omuntu aleka kutebeza n’okwija omu nsorrokano? Omuntu ogu tumurora nk’ow’atakyali omu haliitwe?

Nangwa. Kuruga omu kitebe rundi kukyecweraho kimu, nikyahukana n’omuntu kuceka omu kwikiriza. Obwire oburukukira obwingi abaleka kutebeza n’okwija omu nsorrokano, baba batarugire omu diini yaitu oihireho baba bahoirwemu amaani. Omu kiikaro ky’okubecwaho, tulengaho kubagarramu amaani n’okubasagika. (1 Abasesalonika 5:14; Yuda 22) Omuntu nk’ogu kakuba ayetaaga obukonyezi, abagurusi b’ekitebe bamukonyera omu by’omwoyo.—Abagaratiya 6:1; 1 Petero 5:1-3.

Baitu abagurusi tibarukwikirizibwa kuhambiriza omuntu kwikara ali omu h’Abakaiso ba Yahwe. Buli muntu aine obugabe obw’okwecweramu ediini ey’arukugonza kubamu. (Yosuha 24:15) Nitwikiriza ngu abo abaramya Ruhanga basemeriire kukikora begondiize kandi kuruga ha mutima.—Zabuli 110:3; Matayo 22:37.