Ninsobora Nta Kufooka omu h’Abakaiso ba Yahwe?
Ebirukwetaagisa kufooka omu h’Abakaiso ba Yahwe Yesu akabibazaaho omu Matayo 28:19, 20. Enkara ezi, nizooleka kurungi omuntu eky’asemeriire kukora kufooka muhondezi wa Kristo. Binu nibitwarramu kutebeza rundi kuha obwakaiso hali Yahwe.
Eky’okubanza: Yega Baibuli. Yesu akaragira abahondezi be ati: “Muhindule amahanga gona abegeswa . . . , nimubegesa.” (Matayo 28:19, 20) Ekigambo ekihindwirwe nka “omwegeswa” nikimanyisa “omwegi.” Ebiri omu Baibuli, kukira muno Yesu ebiyayegeseze, nibisobora kukukonyera kuba n’obwomeezi oburumu okusemererwa n’okumarwa. (2 Timoseo 3:16, 17) Nikiija kutusemeza kukukonyera kumanya Baibuli ekyeyegesa kuraba omu ntekaniza ey’okwegesa Baibuli etali y’okusasurra sente.—Matayo 10:7, 8; 1 Abasesalonika 2:13.
Ekyakabiri: Teeka omu nkora ebyorukwega. Yesu akaragira abo boona abeega “okukwata byona” ebiyaragiire. (Matayo 28:20) Kinu nikimanyisa ngu kwega Baibuli tikirukugarukira ha kumanya kwonka, baitu nikisobora kukwetaagisa kukora empindahinduka ez’amaani omu entekereza hamu n’omu ngeso zaawe. (Engeso Ezabakwenda 10:42; Abefeso 4:22-29; Abaheburaniya 10:24, 25) Abo aborobera ebiragiro bya Yesu kibekambisa kukora encwamu ey’okumuhondera kuraba omu kuhayo obwomeezi bwabo hali Yahwe.—Matayo 16:24.
Ekyakasatu: Batizibwa. (Matayo 28:19) Baibuli erengesaniza kubatizibwa n’okuziika. (Lengesaniza Abarumi 6:2-4.) Kali kokurorraho ak’okufa habw’enyetwaza ey’obwomeezi obwakara kandi otandika obwomeezi obuhyaka. Obw’obatizibwa, oyoleka omu rwijwire ngu okozere ebintu bibiri eby’okubanza Yesu ebiyabalizeeho kandi oliyo n’osaba Ruhanga akuhe omuntu ow’omunda omurungi.—Abaheburaniya 9:14; 1 Petero 3:21.
N’omanya ota ngu ohikire kubatizibwa?
Baza n’abagurusi b’ekitebe. Nibaija kubaza naiwe kukigumya obwaraaba nomanya okubatizibwa nikitwarramu ki, n’oteeka omu nkora ebyorukwega, kandi ohaireyo obwomeezi bwawe hali Yahwe otahambiriziibwe.—Engeso Ezabakwenda 20:28; 1 Petero 5:1-3.
Ebintu binu nibikwataho n’abaana ab’Abakaiso ba Yahwe?
Ego. Tukuza abaana baitu “omu kuhanwa nomu kugambirirwa kwa [Yahwe]” nk’oku Baibuli eturagira. (Abefeso 6:4) Baitu obubakura, bekorra encwamu ey’okwega Baibuli, kwikiriza ebibeegere, n’okubiteeka omu nkora batakabatiziibwe. (Abarumi 12:2) Amananu gali ngu buli omu asemeriire kwekorra encwamu obukirukuhika ha kuramya.—Abarumi 14:12; Abagaratiya 6:5.