Watch Tower Bible and Tract Society Nikyo Kiki?
Watch Tower Bible and Tract Society of Pennsylvania kitongole ekitarukukora amagoba ekyatandikireho omu 1884, nikisigikirra ha biragiro bya Commonwealth of Pennsylvania, U.S.A. Abakaiso ba Yahwe bakozesa ekitongole kinu kusagika omulimo ogurukukorwa Abakaiso ba Yahwe omu nsi yoona kandi omulimo gunu nigutwarramu kuteera Baibuli, n’ebitabu ebisigikirra ha Baibuli.
Ebigendererwa by’ekitongole kinu nukwo “kwegesa abantu ebirukukwata ha diini n’okubakonyera,” kukira muno “kutebeza n’okwegesaho Obukama bwa Ruhanga oburukulemwa Yesu Kristo.” Kuba omu h’abantu abali omu kitongole kinu okomwa, kandi eki tikirukusigikirra ha sente ezorukuba ohaireyo. Kandi banu bakonyera Akatebe Akalemi ak’Abakaiso ba Yahwe.
Ebitongole Ebindi Ebirukukoragana Nakyo
Oihireho ekitongole ekya Watch Tower Bible and Tract Society of Pennsylvania, Abakaiso ba Yahwe bakozesa ebitongole ebindi omu mahanga agarukwahukana. Omu mabara gabyo, ebitongole binu bikozesa ebigambo nka “Watch Tower,” “Watchtower,” rundi bimu ha bigambo binu ebihindwirwe omu ndimi ezindi.
Ebitongole binu ebirukwahukana bitukonyiire kuhikiiriza emirimo yaitu kuruga bitandikwaho, kandi emu ha mirimo enu niyo:
Kuhandiika n’okuteera ebitabu. Tutiire Baibuli ezirukuhika nk’obukaikuru 220 n’ebitabu ebirukusigikirra ha Baibuli haihi nk’obuhumbi 40. Ebitabu byaitu biri omu ndimi ezirukuhingura omu 900. Omukura gwaitu ogwa jw.org gusobozesa abantu kusoma Baibuli omu ndimi ezirukuhingura omu 160 hataroho kusasura sente, n’okutunga eby’okugarukamu ebirukunanura eby’ebikaguzo ebirukukwata ha Baibuli nka, “Obukama bwa Ruhanga Nikyo Kiki?”
Amasomero. Twine amasomero maingi agarukwegesa ha Baibuli. Ekyokurorraho, kuruga omu 1943, bamu h’Abakaiso ba Yahwe nka 9,000 bagasiirwe omu kutendekwa okw’amaani kuruga omu isomero lya Watchtower Bible School of Gilead, kandi eki kibasobozesa kuheereza nk’abamiisani, kweyongera kugumya n’okugarramu amaani ebitebe. Buli wiiki, obukaikuru n’obukaikuru bw’abantu otwaliremu n’abatali Bakaiso ba Yahwe begesebwa omu nsorrokano zaitu ezibaho omu buli kitebe omu nsi yoona. Ekindi, twegesa abantu kusoma n’okuhandiika kandi ekitabu ekitukukozesa kihindwirwe omu ndimi 120.
Kukonyera abantu. Tusoboire kukonyera abantu abahikirweho ebigwererezi—kabibe ebireserweho abantu, nk’ekiita bantu akyabaireho omu Rwanda omu mwaka 1994, rundi ebireserweho enyikara y’obwire nk’omusisa ogwabaireho omu Haiti omu mwaka 2010.
N’obukiraaba ngu ebitongole binu bitukonyiire kukora ebintu bingi, omulimo oguturukukora tigusigikirra ha bitongle binu. Buli Mukristaayo aine kworobera ekiragiro Ruhanga ekiyatuhaire eky’okutebeza n’okwegesa abantu amakuru amarungi. (Matayo 24:14; 28:19, 20) Tukimanyire ngu Ruhanga nasagika omulimo gwaitu kandi naija kugumizaamu natuha omugisa.—1 Abakolinso 3:6, 7.