Abakaiso ba Yahwe Baikiririza Muli Ki?

Nk’Abakaiso ba Yahwe tulengaho kuhondera enyegesa z’Ekikristaayo Yesu eziyayegeseze kandi abegeswa be ezibaahonderaga. Ekicweka kinu nikibazaaho enyikiriza zaitu enkuru omu bugufu.

1. Ruhanga. Turamya Ruhanga omu ow’amananu, Ow’obusobozi bwona, Omuhangi, kandi ibara lye nuwe Yahwe. (Zabuli 83:18; Okusuku’rwa 4:11) Nuwe Ruhanga wa Iburahimu, Musa na Yesu.—Okuruga 3:6; 32:11; Yohana 20:17.

2. Baibuli. Baibuli tugitwara nk’obutumwa bwa Ruhanga hali abantu. (Yohana 17:17; 2 Timoseo 3:16) Enyikiriza zaitu zisigikirra ha bitabu byona 66, ebitwarramu “Endagaano Enkuru” hamu na “Endagaano Empyaka.” Profesa Jason D. BeDuhn akabazaaho Abakaiso ba Yahwe ati: “Ebibaikiririzaamu n’ebibakora bisigikirra ha Baibuli eky’egamba batakamanyire ebibarasangamu.”a

   Twikiririza omu Baibuli yoona. Baitu obutuba nitulengaho kwetegereza Baibuli, tukimanya ngu ebicweka ebimu ebya Baibuli bisoborra ebintu ebyabaireho rundi ebiribaho omu kasumi ak’omumaiso kandi ngu ebicweka ebimu bikozesa ebigambo ebyakokurorraho kumanyisa ekintu ekindi.—Okusuku’rwa 1:1.

3. Yesu. Tuhondera enyegesa n’ekyokurorraho kya Yesu Kristo kandi tumutamu ekitiinisa nk’Omujuni waitu kandi nk’Omwana wa Ruhanga. (Matayo 20:28; Engeso Ezabakwenda 5:31) Nahabweki, tuli Bakristaayo. (Engeso Ezabakwenda 11:26) Baitu twegere kuruga omu Baibuli ngu Yesu tali Ruhanga Ow’obusobozi bwona kandi ngu busaho Kyahandiikirwe kyona ekirukubazaaho enyegesa ey’Obusatu.—Yohana 14:28.

4. Obukama bwa Ruhanga. Enu eri gavumenti ey’eroho kwo omu iguru, baitu teri nyikara ey’omu mitima y’Abakristaayo. Obukama bunu nibwija kugaruka omu kiikaro kya gavumenti ez’abantu kandi buhikiirize ekigendererwa kya Ruhanga hali ensi. (Danieri 2:44; Matayo 6:9, 10) Buli haihi kuhikiiriza ebintu binu byona, habwokuba obunabbi bwa Baibuli nibwoleka ngu tuli “omu biro bya hanyuma.”—2 Timoseo 3:1-5; Matayo 24:3-14.

   Yesu nuwe Omukama w’Obukama bwa Ruhanga. Akatandika kulema omu iguru omu 1914.—Okusuku’rwa 11:15.

5. Okujunwa. Kujunwa kuruga omu kibi n’okufa nikisoboka habw’ekicunguro kya Yesu. (Matayo 20:28; Engeso Ezabakwenda 4:12) Kusobora kugasirwa omu kicunguro eki, abantu basemeriire kutagarukira ha kwikiririza omu Yesu kwonka, baitu basemeriire kuhindura engeso zaabo kandi babatizibwe. (Matayo 28:19, 20; Yohana 3:16; Engeso Ezabakwenda 3:19, 20) Ebikorwa by’omuntu nibyo byoleka ngu aine okwikiriza. (Yakobo 2:24, 26) Baitu, ebikorwa by’omuntu tinibyo bimuleetera kujunwa—oihireho ‘habw’embabazi za Ruhanga ezitatusemeriire.’—Abagaratiya 2:16, 21.

6. Iguru. Yahwe Ruhanga, Yesu Kristo hamu na bamalaika abesigwa baikara omu kiikaro eky’omwoyo.b (Zabuli 103:19-21; Engeso Ezabakwenda 7:55) Abantu 144,000—nibaija kuhumbuurwa batunge obwomeezi obutahwaho omu iguru kandi baleme na Yesu omu Bukama bwa Ruhanga.—Danieri 7:27; 2 Timoseo 2:12; Okusuku’rwa 5:9, 10; 14:1, 3.



7. Ensi. Ruhanga akahanga ensi nukwo abantu bagiikalemu ebiro n’ebiro. (Zabuli 104:5; 115:16; Omugambizi 1:4) Ruhanga naija kuha abantu abahulizi obwomeezi oburungi hamu n’obwomeezi obutahwaho omu nsi enyakufookere orugonjo orurungi.—Zabuli 37:11, 34.

8. Obubi n’Okubonabona. Bikatandika omu ha bamalaika ba Ruhanga obuyajeemere. (Yohana 8:44) Malaika onu, ayayeserwe Sitaani rundi Diabolo hanyuma y’okujeema, akasoonasoona abantu ab’okubanza kumweteranizaaho, kandi ebyarugiremu bikaba bibi muno h’abaijukuru baabo. (Okubanza 3:1-6; Abarumi 5:12) Kusobora kugonjoora ensonga eyaleserweho Sitaani, Ruhanga alekere obubi n’okubonabona kubaho, baitu tarukwija kubiikiriza kugumizaamu ebiro byona.

9. Kufa. Abantu obubafa baba batakyaroho. (Zabuli 146:4; Omugambizi 9:5, 10) Tibabonabonesebwa omu murro ogutaraara.

   Ruhanga naija kuhumbuura obuhumbi n’obuhumbi bw’abantu abaafiire. (Engeso Ezabakwenda 24:15) Baitu abarayanga kwega emihanda ya Ruhanga hanyuma y’okuhumbuurwa, nibaija kuhwerekerezebwa kandi tibalyongera kuhumbuurwa.—Okusuku’rwa 20:14, 15.



10. Eka. Tuhondera entekaniza ya Ruhanga ey’obuswere ey’omusaija omu kuba n’omukazi omu, kandi ensonga yonka ey’esobora kubaleetera kugaitururwa nubwo omu halibo obwasiihana. (Matayo 19:4-9) Nitukigumya ngu amagezi agarukusangwa omu Baibuli gakonyera amaka kubamu okusemererwa.—Abefeso 5:22–6:1.

11. Okuramya Kwaitu. Titukozesa omusalaba rundi ebisisani omu kuramya kwaitu. (Ekyebiragiro 4:15-19; 1 Yohana 5:21) Okuramya kwaitu nikutwarramu ebintu binu ebikuru:

    • Kusaba Ruhanga.—Abafiripi 4:6.

    • Kusoma n’okwega Baibuli.—Zabuli 1:1-3.

    • Kwecumiitirizaaho ebitwega kuruga omu Baibuli.—Zabuli 77:12.

    • Kusorrokana hamu, kusaba, kwega Baibuli, kuzina, kubazaaho okwikiriza kwaitu, n’okugarramu Abakristaayo bagenzi baitu hamu n’abandi amaani.—Abakolosai 3:16; Abaheburaniya 10:23-25.

    • Kutebeza ‘amakuru amarungi ag’Obukama.’—Matayo 24:14.

    • Kukonyera abali omu bwetaago.—Yakobo 2:14-17.

    • Kwombeka n’okulinda Ebyombeko by’Obukama n’ebyombeko ebindi ebikozesebwa omu mulimo ogw’ensi yoona ogw’okwegesa Baibuli.—Zabuli 127:1.

    • Kukonyera obuhabaho ekigwererezi.—Engeso Ezabakwenda 11:27-30.

    

12. Ekitebe kyaitu. Tuteekaniziibwe kurungi omu bitebe kandi akatebe k’abagurusi nuko karolerra ekitebe. Baitu abagurusi banu tibali bebembezi b’ediini kandi tibasasurwa omusaara. (Matayo 10:8; 23:8) Tituhayo kimu kya ikumi, kandi titusorooza sente omu nsorrokano zaitu. (2 Abakolinso 9:7) Emirimo yaitu yoona esagikwa kuhayo okw’okwegondeza.

    Akatebe Akalemi eri guruupu entaito ey’Abakristaayo abakuzire omu by’omwoyo abaheereza ha kitebe ekikuru kandi baha oburagirizi Abakaiso ba Yahwe omu nsi yoona.—Matayo 24:45.

13. Obumu. Omu nsi yoona tuli omu bumu habw’enyikiriza zaitu. (1 Abakolinso 1:10) Ekindi, twekamba kutebaganizaamu kusigikirra ha biikaro nambere turuga, oruganda rwaitu hamu n’erangi yaitu. (Engeso Ezabakwenda 10:34, 35; Yakobo 2:4) Kandi buli muntu aine obugabe. Buli omu haliitwe akora encwamu nasikigirra ha muntu we ow’omunda ow’atendekerwe Baibuli.—Abarumi 14:1-4; Abaheburaniya 5:14.

14. Engeso zaitu. Twekamba kwoleka okugonza okw’okwefeereza omu bikorwa byaitu byona. (Yohana 13:34, 35) Twetantara kukora ebintu ebitasemeza Ruhanga, otwaliremu kuteekwamu esagama. (Engeso Ezabakwenda 15:28, 29; Abagaratiya 5:19-21) Tuba bantu ab’obusinge kandi titwejumbira omu bulemu. (Matayo 5:9; Isaya 2:4) Tuteekamu ab’obusobozi ekitiinisa omu biikaro nambere twikara kandi tworobera ebiragiro ebiteekwaho kakuba biba bitarukucwa ebiragiro bya Ruhanga.—Matayo 22:21; Engeso Ezabakwenda 5:29.

15. Enkoragana yaitu n’abantu abandi. Yesu akatugambira ati: “Gonza mutahi wawe nkokwoyegonza wenka.” Akongera yagamba ngu Abakristaayo “tibali bensi.” (Matayo 22:39; Yohana 17:16) Nahabweki twekamba kukorra abantu boona ebirungi, twetantara kugwera orubaju omu by’obulemi kandi titwine akakwate n’amadiini agandi. (Abagaratiya 6:10; 2 Abakolinso 6:14) Baitu tuteekamu ekitiinisa encwamu ez’abantu abandi obukirukuhika ha nyikara nk’ezi.—Abarumi 14:12.

Obworaaba oine ebikaguzo ebindi ebirukukwata ha nyikiriza z’Abakaiso ba Yahwe, n’osobora kusoma ebirukukiraho ha mukura gwaitu, ohikirre emu ha ofiisi zaitu, genda omu nsorrokano zaitu ha Kyombeko ky’Obukama ekiri haihi omu kiikaro kyawe, rundi obazeeho n’omu h’Abakaiso ba Yahwe obworaaba n’osobora kumutunga.