Abantu Kuleka Kwesiga ab’Eby’obulemi—Baibuli Ekibazaaho Ki?

Omu mwaka 2024, amahanga maingi omu nsi yoona nigaija kwejumbira omu kukoma abebembezi babo, ekintu ekitakabahoga omu mwaka gumu. Baitu, abantu baingi tibakyayesiga ab’eby’obulemi.

• Abamerika baingi obu baakaguziibwe bakagamba ngu “ab’eby’obulemi abarukukira obwingi ensonga ezibekambisa kwesimbaho ziba ez’okwefaaho bonka” omu kiikaro ky’okuba nekihika eky’okukorra abantu ababarukukikirra ebirungi.a—Pew Research Center, Sebutemba 19, 2023.

N’abato baingi tibakyayesiga ab’eby’obulemi.

• “Ensingato kasumi kanu emirundi erukukira obwingi bagonza kutunga ebintu ebirabakonyera kumaraho ebizibu byabo, baitu obu babakaguza bagamba ngu eb’eby’obulemi tibasoboire kubatungira ebintu ebisobora kuhikiriza ebyetaago byabo.”—The New York Times, Janwali 29, 2024.

• “Ebyarugire omu karuuru akaatiirwe nibyoleka ngu abato nibesiga muno abantu abanyakuli ha mikura ey’okubalizaaho kukira ab’eby’obulemi.”—The Korea Times, Janwali 22, 2024.

Nitusobora kwesiga ngu ab’eby’obulemi nibaija kufoora obusumi bwaitu obw’omumaiso burungi? Noha ou tusobora kwesiga?

Wegendereze ou orukwesiga

Abantu bahikire kwekengera ou barukwesiga. Baibuli egamba ngu “atanyina magezi aikiriza ekigambo kyona: Baitu omuntu omwekengi arora muno omuhandagwe.”—Enfumo 14:15.

• Kusobora kutunga amagezi agarakukonyera kumanya obutumwa obu buraaba buhikire rundi bugwire, rora vidiyo “Werinde Kubiihwabiihwa.”

Ekindi, n’ab’eby’obulemi ab’amazima kandi abaine ebigendererwa ebirungi tibasobora kukora byona ebi barukugonza. Egi niyo ensonga habwaki Baibuli etutererra eti:

• “Mutesiga abantu abebembezi; busaho muntu asobora kubajuna.”—Zabuli 146:3, Good News Translation.

Omwebembezi ou osobora kwesiga

Baibuli egamba ngu Ruhanga akomere omwebembezi ow’aine obusobozi kandi omwesigwa: Yesu Kristo. (Luka 1:32, 33) Yesu nuwe Omukama ow’Obukama bwa Ruhanga, gavumenti ey’erukulemera omu iguru.—Matayo 6:10.

• Kumanya ensonga habwaki osobora kwesiga Yesu hamu n’ebintu ebi alikora kumaraho ebizibu ebitutangatangana. Soma ebicweka “Nooha Omukama w’Obukama bwa Ruhanga?” na “Obukama bwa Ruhanga Bulikora Ki?”