Abakazi Kuba n’Obulinzi​—Baibuli n’Ekibazaaho Eta?

“Obu nkaba nkyali muto, mugenzi wange omwojo yanteeraga kandi ambaliza ebigambo ebibi buli kiro. N’obu nataahire obuswere, nyinazaara nyowe akagumizaamu nantwaza kubi. Nyinazaara nyowe na isezaara nyowe baantwazaga nk’omwiru. Nkateekerezaaho n’okweyita.”—Madhu,a India.

Ekitongole kya World Health Organization nikigamba ngu: “Kutwaza kubi abakazi, kiri omu nsi yoona.” Nikitebereza ngu haihi omukazi omu, omu bakazi basatu ahikwaho ebikorwa eby’okutwazibwa kubi rundi ahambirizibwa ebikorwa eby’okuteerana.

Eki obu kiraaba kyakuhikireho, nosobora kwehurra otiinire ngu noija kugambirwa ebigambo ebibi, rundi ohikweho ebikorwa ebibi rundi ohambirizibwe kuteerana nambere oragenda hoona. Habw’okutwazibwa kubi oku, nosobora kwehurra ngu abantu baingi nibateekereza ngu ‘Abakazi tibali b’omugaso.’ Baitu mali abakazi b’omugaso hali Ruhanga?

Ruhanga arora ata abakazi?

Ekyahandiikirwe: “[Ruhanga] akabahanga omusaija nomukazi.”—Okubanza 1:27.

Eki kirukumanyisa: Ruhanga akahanga abasaija n’abakazi. Boona abarora nk’abasemeriire okuteekwamu ekitiinisa. Kwongerraho, naanihirramu omusaija ‘kugonza omukazi we nk’oku arukwegonza wenka,’ hatali kulengaho kumulema, obu naakozesa ebigambo ebibi rundi kumurwanisa. (Abefeso 5:33; Abakolosai 3:19) Nikyeyoleka kurungi ngu, abakazi kuba n’obulinzi, kikuru muno hali Ruhanga.

“Obu nkaba nkyali muto, abanyabuzaale bange bakampabiriza ebikorwa eby’okuteerana. Obu nkaba nyine emyaka 17, mukama wange ha mulimo akantiinisiriza kumbinga kakuba ntateerana na uwe. Hati obu nkuzire, omusaija wange, abazaire bange hamu n’abataaahi bange, tibanteekamu ekitiinisa. Baitu nkahika nayega hali Yahwe,b Omuhangi. Atwaza abakazi omu mulingo ogw’ekitiinisa. Kinu kikangumya ngu naangonza kandi ngu ndi w’omuhendo omu maiso ge.”—Maria, Argentina.

Kiki ekisobora kukukonyera kutandika kukira?

Ekyahandiikirwe: “Haroho enganjani ayehikya muno okukira mwene wabu.”—Enfumo 18:24.

Eki kirukumanyisa: Omunywani ow’amananu, naija kukusagika. Obu kiraaba kisobokere, gambiraho omuntu ou orukwesiga enyuhurra zaawe.

“Nkamara emyaka 20 ntakagambiraga omuntu weena ngu nkahambirizibwa ebikorwa eby’okuteerana. Ekyarugiremu, nkakura ntaine okusemererwa, nyetuntwire, kandi nyenuubire. Baitu obu nagambiire omuntu ow’akaba ayetegekere kumpuliiriza ebintu ebi nkaba ndabiremu, nkahurra nahuumura.”—Elif, Türkiye.

Ekyahandiikirwe: “Nimunagira okutuntura kwanyu kwona [hali Ruhanga], baitu nabitaho omutima ebigambo byanyu.”—1 Petero 5:7.

Eki kirukumanyisa: Obu osaba, Ruhanga ahurra. (Zabuli 55:22; 65:2) Habwokuba naakufaaho, naasobora kukukonyera kurora nk’oku oli w’omuhendo.

“Kwega hali Yahwe kikatandika kunkonyera kukira ebihooya eby’amaani ebi nkaba nyine. Hati ninsobora kusaba Ruhanga kandi nkamugambira buli kimu kyona eki ndi ha mutima. Ali nk’omunywani ow’ayetegereza nk’oku ndukwehurra.”—Ana, Belize.

Ruhanga aliihaho abantu abatwaza kubi abakazi?

Ekyahandiikirwe: ‘Yahwe . . . alicwa omusango ogw’enfuuzi n’abenderezebwa, nukwo omuntu owa hansi alekege okubatiinisiriza.’—Zabuli 10:​17, 18.

Eki kirukumanyisa: Omu kasumi akatali ka hara, Ruhanga naija kumaraho obutali bwinganiza bwona, otwaliiremu kutwaza kubi abakazi.

“Kikasisana nk’omubazi ogurukukiza kukimanya ngu Yahwe aliihaho abantu boona abatwaza kubi abakazi n’abaisiki abato. Kindetiire obusinge omu biteekerezo.” —Roberta, Mexico.

Kusobora kumanya ebirukukiraho ha mulingo Baibuli eha okunihira, habwaki osemeriire kwesiga ebi erukuraganiza, hamu n’omulingo Abakaiso ba Yahwe bahuumuzaamu abantu nibakozesa Baibuli, saba kubungirwa.

Hanura ekicweka kinu eki osobora kuteera ha mpapura.