Omukuru omu by’Obwomeezi Agambire ngu Emikura ey’Okubalizaaho n’Esobora Kuba y’Akabi Hali Abaana—Baibuli n’Ekibazaaho Ki?

Maayi 23, 2023, omukuru omu by’obwomeezi omu United States akagamba ngu emikura ey’okubalizaaho n’ehikyaho abato baingi akabi.

• “N’obukiraaba ngu emikura ey’okubalizaaho n’esobora kugasira abato hamu n’ensinganto, haroho obwakaiso oburukumara oburukwoleka ngu emikura enu y’akabi hali obwomeezi bwabo.”—Social Media and Youth Mental Health: The U.S. Surgeon General’s Advisory, 2023.

Okuseruliiriza kunu kukooleka ensonga habwaki kinu nikyeraliikiriza.

• Abaana abali hagati y’emyaka 12 kuhika 15 “abamara esaaha ezirukuhingura omu 3 buli kiro bali ha mikura ey’okubalizaaho, bakira muno kutalibanizibwa oburwaire bw’omutwe, otwaliremu kwoleka obwokurorrabo bw’oburwaire obw’okwenuuba n’okweralikirra ekihinguraine.”

• Abaana abaine emyaka 14, “abarukukozesa muno emikura ey’okubalizaaho, bakira kuburwa oturo, bajumwa muno ha mikura, berora nk’abarukuzooka kubi, kandi behurra nk’abataine mugaso. Obwokurorraho bunu bukanya muno omu baisiki kukira omu boojo.”

Abazaire nibasobora bata kulinda abaana baabo? Omu Baibuli harumu obuhabuzi oburabakonyera.

Abazaire ekibasobora kukora

Lengaho kumanya ebirukukwata ha mikura. Nk’abazaire, mumanye akabi ak’emikura enu hanyuma mucwemu omwana wanyu obwaraaba n’asobora kugikozesa rundi kutagikozesa.

• Omusingi gwa Baibuli: “Yorora omwana omu muhanda ogumuhikiriire.”—Enfumo 22:6.

• Kumanya ebirukukiraho soma ekicweka “Omwana Wange Asemeriire Kukozesa Emikura ey’Okubalizaaho?”

Kakuba oikiriza omwana waawe kukozesa emikura enu, manya akabi akasobora kurugamu kandi oikale nomanya omulingo arukugikozesaamu n’ebyarukukorraho. Kinu n’osobora kukikora ota?

Linda omwana waawe hali ebintu ebibi. Yegesa omwana waawe kumanyirra ebintu eby’akabi n’omulingo asobora kubyetantara.

• Omusingi gwa Baibuli: “Obusihani nokutasemera kwona, nobukwakuba okwegomba, bitaligambwaho omulinywe, . . . nobubyakuba ebyensoni nebigambo ebyobutami, nobubyakuba ebyokuseka ebitali birungi.”—Abefeso 5:3, 4.

• Kumanya ebindi eby’osobora kukora, soma ekicweka “Kwegesa Omwana Waawe Kwerinda Obwarukuba Ali ha Mikura ey’Okubalizaaho.”

Mutereho ahokugarukira. Ekyokurorraho, mutereho ebiragiro ebirukwoleka nidi obwasemeriire kugenda ha mikura enu kandi kumara bwire ki.

• Omusingi gwa Baibuli: “Nukwo mwerindege okumugenda . . . nkabamagezi; nimwegurra omwanya.”—Abefeso 5:15, 16.

• Kozesa vidiyo ey’erumu kutera obusisani Kozesa Emikura ey’Okubalizaaho omu Mulingo gw’Amagezi kukonyera omwana waawe kwetegereza habwaki kirungi kweteraho ahokugarukira.