Kurora Ebisisani by’Orwanju Kihwerekereza Obuswere

Mukazi we akazoora ensita ye. Akaikara naamusaba ekiganyiro. Akamuraganiza kuleka engeso ye, kandi akagireka kumara akasumi. Hanyuma akagarukirra, kandi yayongera yagumizaamu naayejumbira omu ngeso ye.

Na iwe oli mu nyikara niyo emu? Obu kiraaba nukwo kiri, osemeriire kumanya omulingo engeso ey’okurora ebisisani eby’orwanju ekwataho ow’oli na uwe omu buswere n’omulingo osobora kugirekera kimu.a

Ebiri omu kicweka kinu

• Eki osemeriire kumanya

• Eki osobora kukora

• Kakuba baro arora ebisisani by’orwanju

Eki osemeriire kumanya

Kurora ebisisani eby’orwanju nikisobora kumaraho obuswere. Kireetera omuntu ow’ataine musango kweijukya nookuleka kwesiga ow’ali na uwe omu buswere.b

Omukazi ow’aine iba ow’arukurora ebisisani eby’orwanju naasobora kuba n’enyehurra nka zinu:

• Agobeziibwe. Nyinabwenge ow’arukwetwa Sarah naagamba ati, “Kiba nikisisana oti rundi iba nyowe asiihaine emirundi nyingi.”

• Kwehurra nk’owatali w’omugaso. Nyinabwenge omu naagamba ati: Engeso ya iba nyowe ey’okurora ebisisani by’orwanju ekandetera kwehurra “mbiihire kandi nswaziibwe.”

• Kuteesiga mugenzi waawe. Nyinabwenge ow’arukwetwa Helen naagamba ati: “Nyekengera iba nyowe omu buli kimu kyona eki aba naakora.

• Kwetuntura. Nyinabwenge arukwetwa Catherine naagamba ati: “Obwomeezi bwange bwona nyikara nyetuntwire ha bw’engeso ya musaija wange.”

Eky’okuteekerezaaho Baibuli neetererra Abasaija kugonza bakazi baabo. (Abefeeso 5:25) Naaba namugonza kakuba amurabya munyikara ezitubalizeeho eruguru?

Eki osobora kukora

Engeso y’okurora ebisisani by’orwanju teyanguhira kugireka. “Musaija wange akaleka kunywa Sigara, enjaahi, hamu n’amarwa baitu na hati naakyarwanisa engeso y’okurora ebisisani by’orwanju.” Bikagambwa nyinabwenge arukwetwa Stacey.

Obu oraaba oli munyikara nk’egi amagezi ganu agahairwe hansi nigaija kukukoonyera kwecweraho kimu engeso y’okurora ebisisani by’orwanju

• Weetegereze ensonga habwaki kurora ebisisani by’orwanju kibi. Kurora ebisisani by’orwanju kiretera omuntu kukora ebikorwa by’okwegondeza wenka, ekimarraho kimu engonzi n’obwesigwa, ebintu ebikuru ebiretera amaka kubamu okusemererwa, kandi kyoleka ngu tarukutekamu Yahwe Ruhanga ekitiinisa ayatandikisizeeho obuswere.

  Omusingi gwa Baibuli: “Leka okuswerangana kube kwekitinisa.”—Abahebburaniya 13:4.

• Ikiriza ensobi yawe. Otaserra eby’okwekwasa nka binu: ‘Naakubaire ntarukurora bisisani eby’orwanju kakuba mukazi wange aba naanyoleka engozi.’ Tikiri kirungi kujunaana mukazi waawe,kandi eki kikugumanganiriza kusingura engeso egi ey’okurora ebisisani by’orwanju.

  Omusingi gwa Baibuli: “Buli muntu alengwa obu atwalirizibwa kandi akasoonwasoonwa okwegomba kwe.”—Yakobbo 1:14.

• Mubalizengana amananu. Nyineka arukwetwa Kevin naagamba ati: “Mbaza na mukazi wange buli kiro kunkoonyera kumanya obundaba mazire obwire nindora ha kisisani ekitasemiire rundi obu ndaaba nkyetantairege. Kwikara nitubalizangana omu mulingo gunu kimukoonyiire kukimanya ngu tiharoho ekinkumusereka.”

  Omusingi gwa Baibuli: “Nitugonza kuba beesigwa omu bintu byona.”—Abahebburaniya 13:18.

• Ikara oli bulindaara. Noosobora kugarukirra na hanyuma y’emyaka nyingi oyecwireho engeso egi. Kevin, ou tusangirwe tubalizeeho enyuma, naagamba ati: “Nkecwaho engeso y’okurora ebisisani by’orwanju kumara emyaka ikumi kandi nkateekereza nti nkaba ngisingwire. Baitu engeso enu ekaba eyeserekere erindiriire akaire kaayo akahikire.”

  Omusingi gwa Baibuli: “Nahabweki, leka ogu arukuteekereza ngu ayemeriire, ayerinde atagwa.”—1 Abakolinso 10:12.

• Obu orayohebwa,otaikiriza kukorra ha nyehurra zaawe. Noobu oraaba otasoboire kwetantarra kimu enyehurrra egi, noosobora kucwamu kugikorraho rundi nangwa. Noosobora kucwamu kuteeka omutima ha bintu ebindi kurora enyehurra egi yahwaho bwangu.

  Omusingi gwa Baibuli: “Buli omu omuli inywe amanye omulingo asemeriire kulemamu omubiri gwe omu burukwera hamu n’omu kitiinisa,hatali omu mururu, okwegomba okuhinguraine okw’okuteerana.”—1 Abasesalonika 4:4, 5.

• Weetantale enyikara ezisobora kukuletera kugarukirra. Ekitabu ekirukwetwa Willpower’s Not Enough nikigamba kiti “Obu oyesanga munyikara ey’esobora kukuletera kugarukirra, osisana nk’ow’ahembere ekibbiriti. Ekirukuba nikiburaho, amafuta make, omurro gutandike kwaka.”

  Omusingi gwa Baibuli: “Mutaikiriza ekibi kwikara nikirema nk’omukama omu mibiri yanyu enyakufa nukwo mukahondera okwegomba kw’omubiri.”—Abarooma 6:12.

• Otahwamu okunihira. Nikisobora kutwara obwire rundi emyaka nyingi kurora ow’oli na uwe omu buswere yayongera kukwesiga. Baitu haroho obwakaiso oburukwoleka ngu nikisoboka.

  Omusingi gwa Baibuli: “Okugonza kugumiisiriza.”—1 Abakolinso 13:4.